डॉ. रमन सिंह

अच्छा स्वास्थ्य सुविधा सुलभ कराए बर सरकारी अऊ निजी क्षेत्र ल मिलके करना होही काम: डॉ रमन सिंह

रायपुर, 05 मार्च 2018। मुख्यमंत्री डॉ. रमन सिंह ह कहिन कि आम जनता ल, विशेष रूप ले ग्रामीण अंचल मन म अच्छा स्वास्थ्य सुविधा मुहैया कराए म सरकारी अऊ निजी क्षेत्र ल मिलके काम करना होही। मुख्यमंत्री आज संझा इहां एसोसिएशन ऑफ सर्जन्स ऑफ इंडिया (ए.एस.आई.) के छत्तीसगढ़ चेप्टर के 17वां वार्षिक सम्मेलन के शुभारंभ करत रहिन। ए अवसर म उमन बहुत अकन बछर ले मानवता के सेवा करइया वरिष्ठ शल्य चिकित्सक मन ल लाइफ टाइम एचिवमेंट एवार्ड ले सम्मानित करिन। मुख्यमंत्री ह कहिन कि हर शल्य चिकित्सक कहूं महिना म कम से कम दू जरूरतमंद मरीज मन के निःशुल्क शल्य चिकित्सा करंय त ये मानवता के सेवा के एक बड़का काम होही।




मुख्यमंत्री ह कहिन कि नवा राज्य छत्तीसगढ़ म स्वस्थ पीढ़ी के निर्माण सबले बड़े चुनौती रहिस। ए चुनौती के सामना करे बर स्वास्थ्य संबंधी अधोसंरचना के विकास बर पाछू 14 बछर म योजनाबद्ध उदीम करे गए हे। आज दूरस्थ अंचल के बीजापुर जिला चिकित्सालय म जिहां पहिली ओपीडी म आठ ले दस मरीज रोजेच आत रहिन, आज उहां एक महिना म 200 ले 300 मरीज मन के शल्य चिकित्सा करे जात हे। ए अस्पताल म 36 चिकित्सक काम करत हें। सबो जिला अस्पताल मन ल बेहतर स्वास्थ्य सुविधा मन ले सुसज्जित करे जात हे। बलरामपुर जिला अस्पताल म घलोक मॉड्यूलर ऑपरेशन थिएटर के निर्माण जल्दी करे जाही। ए अवधि म प्रदेश म मेडिकल कॉलेज मन के संख्या दू ले बढ़के 10 हो गए हे। पहिली प्रदेश म एको नर्सिंग कॉलेज नइ रहिस, जेकर संख्या अब बाढ़के 68 हो गए हे। डॉ. सिंह ह चिकित्सक के रूप म अपन प्रेक्टिस के अनुभव साझा करिन। उमन मुख्यमंत्री स्वास्थ्य सुरक्षा योजना के उल्लेख करत कहिन कि ए योजना म प्रदेश के 56 लाख परिवार मन ल 50 हजार रूपिया तक के निःशुल्क इलाज के सुविधा देहे जात हे।
डॉ. सिंह ह बताइस कि मुख्यमंत्री बाल हृदय सुरक्षा योजना के अंतर्गत अब तक करीबन 7000 लइका मन के हृदय रोग के इलाज बर शासन के खरचा म सर्जरी करे गए हे। मुख्यमंत्री ह सम्मेलन म अम्बिकापुर मिशन अस्पताल के डॉक्टर एम.एल बेट्रिस, डॉ. अनुराधा दुबे, डॉ. दिलीप एस. गोरे, डॉ. आर.एस. नायक, डॉ. एस.जे. रिजवी अऊ डॉ. संदीप दवे ल लाइफटाईम एचिवमेंट अवार्ड ले सम्मानित करिन। मुख्यमंत्री ह डॉ. बेट्रिस के सेवा भाव के उल्लेख करत कहिन कि ओ मन सरगुजा अंचल म पाछू 40 बछर ले जरूरतमंद मरीज मन के निःशुल्क सर्जरी करत हें। डॉ. अनुराधा दुबे ह मुख्यमंत्री बाल हृदय सुरक्षा योजना के तहत 800 लइका मन के ऑपरेशन करे हें। एसोसिएशन ऑफ सर्जन्स ऑफ इंडिया के अध्यक्ष डॉ. दिलीप एस.गोरे, आयोजन समिति के अध्यक्ष डॉ. सुभाष अग्रवाल, सम्मेलन आयोजन समिति के सचिव डॉ. देवेन्द्र नायक ह घलोक अपन विचार प्रकट करिन। ए अवसर म एएसआई छत्तीसगढ़ चेप्टर के अध्यक्ष श्री तरूण नायक संग बहुत अकन वरिष्ठ सर्जन उपस्थित रहिन। ये आयोजन श्री बालाजी ग्रुप ऑफ हास्पिटल्स एण्ड कॉलेजेस कोति ले रायपुर मेडिकल कॉलेज के सर्जरी विभाग अऊ सर्जन्स क्लब रायपुर के सहयोग ले ए.एस.आई. छत्तीसगढ़ चेप्टर के तत्वावधान म करे गीस।



मुहाचाही:  राज्य के विकास म साहू समाज के घलोक सराहनीय भूमिका: डॉ. रमन सिंह