अमर अग्रवाल

अवइया महिना ले बिना रसीद नइ बेंचाय दारू : श्री अमर अग्रवाल

रायपुर, 5 मार्च 2018। वाणिज्यिक कर अउ उद्योग मंत्री श्री अमर अग्रवाल ह कहिन हे कि अवइया महीना एक अपरेल ले दारू के बिक्री म जरूरी रूप ले बिल देना होही। देशी अऊ विदेशी दुनों दारू दुकान मन म ये निर्देश समान रूप ले लागू होही। दुकान मन म भीड़ होए या आन कोनो बहाना माने नइ जाए। बिलिंग नइ होए के सूचना मिले म संबंधित जिला के आबकारी अधिकारी सीधा जिम्मेदार होही अऊ ओखर उपर कठोर कारवाई करे जाही। श्री अग्रवाल आज इहां आबकारी भवन म आयोजित जिला आबकारी अधिकारी मन के राज्य स्तरीय मासिक समीक्षा बैठक म ए आशय के स्पष्ट निर्देश दीन हें। बैठक म आबकारी आयुक्त श्री डीडी सिंह संग संचालनालय के वरिष्ठ अधिकारी अऊ जिला के आबकारी अधिकारी उपस्थित रहिन।




श्री अग्रवाल ह आबकारी विभाग के टोल फ्री नम्बर 14405 के व्यापक प्रचार-प्रसार करे के निर्देश घलोक दीन। उमन आम नागरिक मन ले घलोक ए नम्बर म आबकारी विभाग ले जुड़े कोनो सूचना श शिकायत दर्ज कराए के अपील करे हें। उमन भरोसा देवाइन के टोल फ्री नम्बर म मिले शिकायत मन उपर गंभीरता ले कार्रवाई करे जाही। आबकारी मंत्री ह दारू बार मन के जांच बर विभाग के वरिष्ठ अधिकारी मन के समिति गठित करे के निर्देश दीन हे। उमन कहिन कि बार संचालन के संबंध म राज्य सरकार कोति ले नियम बनाए गए हे। ए नियम मन के कड़ाई ले पालन सुनिश्चित करे जाए। उमन समिति ल सबो संचालित बार मन के नाप-जोख अऊ सूख्म निरीक्षण करे ल कहिन हें। राज्य के अधिकांश बार रायपुर, बिलासपुर अऊ दुर्ग-भिलाई शहर म स्थित हे।




श्री अग्रवाल ह कहिन बिना स्कैनिंग के कोनो दारू सरकारी दुकान ले बिकना नइ चाही। उमन कबीरधाम जिला म बिना स्कैंनिग के दारू बेंचाए के बात म उहां के डीईओ ल शो कॉज नोटिस जारी करे के निर्देश दीन। आबकारी मंत्री ह साफ चेताइन कि बिना बिल अऊ स्कैनिंग के दारू बेंचें म कहूं कोनो तकनीकी दिक्कत अचानक आघू आवत हे, त एखर लिखित सूचना आबकारी संचालनालय ल दे जाय। नइ तो बख्शे नइ जाही। अधिकारी मन ह बताइन कि पाछू 11 महीना म म विभाग ल 4 हजार 655 करोड़ रुपए के आबकारी राजस्व मिले हे। श्री अग्रवाल ह जिलेवार देशी अऊ विदेशी मदिरा दुकान मन के खपत अऊ आमदनी के समीक्षा घलोक करिन। उमन अवैध मदिरा के खिलाफ अभियान तेज करे के निर्देश फ्लाईंग स्क्वायड के अधिकारी मन ल दीन। उमन नवा साल बर दुकान मन के व्यवस्थापन अऊ मदिरा परिवहन बर टेण्डर के प्रगति के घलोक जानकारी लीन। बताइए गीस कि ए साल दारू परिवहन के भाव पाछू साल ले तुलनात्मक रूप ले कम होए हे।



मुहाचाही:  श्री अमर अग्रवाल ले सिंगापुर के काउंसलेट जनरल के मुलाकात