नारायणपुर

एसपी साहेब लइका मन संग बनिन लइका, समर कैम्प के करिन विधिवत शुभारंभ

नारायणपुर, 07 मई 2018। जिला के पुलिस अधीक्षक श्री जितेन्द्र शुक्ल ह स्कूली लइका मन के संग कुछ समय बिताइन। उमन लइका मन के संग बॉलीबाल अऊ फुटबाल तको खेलिन। श्री शुक्ल ह लइका मन ल मया के संग उंखर संगवारी जइसे गोठ बात करिन। उमन नान्हे-नान्‍हे लइका मन के संग फोटो घलोक खिंचवाईन। ये सब तब देखे ल मिलीस जब जिला मुख्याल नारायणपुर म सुकरवार 4 मई के दिन पुलिस अधीक्षक श्री जितेन्द्र शुक्ल ह गरमी के दिन के खेल प्रशिक्षण शिविर के विधिवत शुभारंभ करिन। समर कैम्प बालक क्रीडा परिसर म आयोजित करे जात हे। समर कैम्प के शुरूआत 1 मई ले होए हे जऊन 21 मई तक चलही।
ए अवसर म सहायक आयुक्त जिला आदिम जाति कल्याण श्री के.एस. मसराम खेल प्रशिक्षक श्री ए.के. फारूखी समेत आन अधिकारी अऊ स्कूल के लइका मन मौजूद रहिन। समर कैम्प म लइका मन ल निःशुक्ल प्रशिक्षण देहे जात हे। प्रशिक्षण दू पारी म आयोजित करे जात हे। पहली पारी बिहनिया 6 बजे ले 9 बजे दूसर पारी संझा 4.30 ले 6.30 बजे तक हवय। समर कैम्प म बास्केटबाल, फुटबाल, तीरंदाजी, एथलेटिक्स, कबड्डी, खो-खो, व्हॉलीबाल आदि के प्रशिक्षण देहे जात हे।


मुहाचाही:  मुख्यमंत्री ह पांच महिना के नीलेश ल गोदी म उठाके दुलारिन अउ उज्जवल भविष्य बर दीन असीस