केदार कश्यप रायपुर

केदार कश्यप ह एडुसैट नेटवर्क के माध्यम ले पढ़ईया लईका मन ल करिस सम्बोधित

रायपुर, 25 अप्रेल 2018। स्कूल शिक्षा मंत्री श्री केदार कश्यप ह आज इहां राज्य शैक्षणिक अनुसंधान अउ प्रशिक्षण परिषद स्थित छत्तीसगढ़ एडुसैट नेटवर्क के माध्यम ले पढ़ईया लईका मन ल संबोधित करिन। श्री कश्यप ह एडुसैट नेटवर्क के माध्यम ले जुड़े प्रदेश के कई सेंटर मन के पढ़ईया लईका मन ले बातचीत करिन। उमन PET, PMT, नर्सिंग, पीएटी अउ नेट के तैयारी करत सबो पढ़ईया लईका मन ल सफलता के टिप्स दीन अउ एडुसैट नेटवर्क के माध्यम ले विसय खांटी जानकार कोति ले देहे जात जानकारी मन के विशेष लाभ लेहे ल कहिन ताकि जादा ले जादा लइका सफल हो सकंय। उमन छात्र-छात्रा मन ल अपन कोति ले बधाई अउ शुभकामना दीन। श्री कश्यप ह जगदलपुर, परचंपाल, दहीकांगा, कोंडागांव, बालोद ,नारायणपुर, बेमेतरा, धमतरी, बैकुंठपुर, रायगढ़, सूरजपुर(सालका) आदि सेंटर मन म आके प्रतियोगी परीक्षा मन के तैयारी करत पढ़ईया लईका मन अउ शाला मन के प्राचार्य ले बातचीत करके परीक्षा के तैयारी मन के जायजा लीन। श्री कश्यप ह कहिन कि इहां हमार विभाग कोति ले करे जात उदीम बहुतेच अच्छा हे। सुदूर ग्रामीण अंचल के विद्यार्थी प्रतियोगी परीक्षा मन बर कोचिंग के लाभ नइ ले पावंय अइसन म ओ मन ल एडूसेड नेटवर्क के माध्यम ले कई ठन सेटेलाइट केंद्र मन ले जोड़के 4 अपरेल ले 30 अपरेल तक रिफ्रेशर कोर्स कराये जात हे। हमार प्रदेश के विद्यार्थी निश्चित रूप ले एकर लाभ उठा पाहीं। श्री कश्यप ह लइका मन ले कहिन कि वो सकारात्मक सोच अउ विश्वास के संग, सही दिशा म मन लगाके तैयारी करव, सफलता अवश्य मिलही।




स्कूल शिक्षा सचिव अउ छत्तीसगढ़ व्यवसायिक शिक्षा मंडल के अध्यक्ष गौरव द्विवेदी ह पढ़ईया लईका मन ले कहिन कि वो सिलेबस के अनुसार तैयारी करंय अउ विसय खांटी जानकार कोति ले देहे जात जानकारी कहूं समझ म नइ आत हे त ओला दुबारा पूछ के अपन डाउट क्लियर करव। परीक्षा म घबराना नइ चाही, उमन सबो केंद्र के लइका मन ल बधाई अउ शुभकामना दीन एडुसैट प्रभारी श्री भौमिक ह बताइस कि अभी हाले म 260 केंद्र मन के विद्यार्थी कोचिंग के लाभ लेवत हें। ए अवसर म एससीईआरटी के अकतहा संचालक श्रीमती सुनीता जैन विशेष विशेषज्ञ श्री एच एल संग बहुत अकन वरिष्ठ अधिकारी उपस्थित रहिन।


मुहाचाही:  चित्रकोट म राष्ट्रपति श्री रामनाथ कोविंद के आत्मीय स्वागत