अजय चन्द्राकर

गांव मन के विकास बर समर्पित भाव ले काम करयं पंच-सरपंच: श्री चंद्राकर

पंचायत मंत्री ले धमतरी, कुरूद अऊ मगरलोड के पंचायत प्रतिनिधि मन करिन मुलाकात

रायपुर, 12 फरवरी 2018। पंचायत अउ ग्रामीण विकास मंत्री श्री अजय चंद्राकर ले आज इहां ऊंखर निवास कार्यालय म हमर छत्तीसगढ़ योजना के तहत अध्ययन भ्रमण बर रायपुर आए पंचायत प्रतिनिधि मन ह सौजन्य मुलाकात करिन। श्री चंद्राकर ह पंचायत प्रतिनिधि मन ल सम्बोधित करत कहिन कि जऊन आगू बढ़ना चाहथें, वो लगन अऊ ईमानदारी ले ओ दिशा म काम करथें। उमन पंच-सरपंच मन ल गांव मन के विकास बर समाज हित म समर्पित भाव ले काम करे के अपील करिन। श्री चंद्राकर ह कहिन कि अधोसंरचना निर्माण ल ही विकास नइ कहे जा सकय। समाज के विकास बर कई ठन क्षेत्र मन जइसे शिक्षा, स्वास्थ्य, नशा मुक्ति म घलोक अपन सहभागिता देनी चाहे हें। उमन प्रतिनिधि मन ले कहिन कि किसान मन ल धान के अलावा वैकल्पिक फसल घलोक लेना चाही, ताकि अकतहा आमदनी होवय अऊ किसान आर्थिक रूप ले मजबूत हो सकयं। उमन पर्यावरण संरक्षण बर घलोक प्रतिनिधि मन ल सीख दीन। श्री चंद्राकर ह कहिन कि जनप्रतिनिधि शिक्षा के क्षेत्र म घलोक आम मनखे मन ल जागरूक करयं। उमन शासन के कल्याणकारी योजना मन ल आम मनखे मन तक पहुंचाए बर अऊ जादा सक्रियता ले काम करे ल कहिन।


मुहाचाही:  मुख्यमंत्री ह धमतरी जिला के कुरूद विकासखंड के जोरातराई गांव ल दीन बहुत अकन भेंट