डॉ. रमन सिंह

छत्तीसगढ़ संग पांच राज्य के कैंसर मरीज मन ल मिलही इलाज के बढि़या सुविधा: डॉ. रमन सिंह

नया रायपुर म बाल्को मेडिकल सेन्टर के मुख्यमंत्री ह करिन लोकार्पण
मरीज मन ल अड़बड़ कमती कीमत म मिलही अत्याधुनिक इलाज के सुविधा

रायपुर, मुख्यमंत्री डॉ. रमन सिंह ह आज इहां नया रायपुर म वेदान्ता मेडिकल रिर्सच फाउण्डेशन कोति ले बने अत्याधुनिक कैंसर अस्पताल बाल्को मेडिकल सेन्टर के बटन दबाके लोकार्पण करिन। मुख्यमंत्री ह ए अवसर म कहिन कि ए अस्पताल म छत्तीसगढ़ संग तीर-तखार के पांच राज्य के कैंसर मरीज मन ल अत्याधुनिक इलाज के सुविधा मिलही। छत्तीसगढ़ के मनखे मन ल अब कैंसर के इलाज बर मुम्बई, कलकत्ता जइसे महानगर मन म जाना नइ परय। कैंसर के इलाज बर ये अस्पताल छत्तीसगढ़ बर बड़का उपलब्धि ये जिहां विश्व स्तरीय इलाज के सुविधा हे।
मुख्यमंत्री ह समारोह ल सम्बोधित करत कहिन कि रामनवमी अऊ अष्ठमी के पावन अवसर म नवा रायपुर म कैंसर अस्पताल के सौगात मिलत हे। उमन कहिन कि ये अस्पताल टाटा मेडिकल सेन्टर कलकत्ता के सहयोग ले चालू करे गए हे। छत्तीसगढ़ म कैंसर मरीज मन के बाढ़त संख्या ल देखत ए प्रकार के अत्याधुनिक अस्पताल के जरूरत महसूस करे जात रहिस। उमन कहिन ए अस्पताल ले छत्तीसगढ़ अऊ झारखंड संग तीर-तखार के पांच राज्य मन के मरीज मन ल इलाज बर बड़े महानगर जाना नइ परय। डॉ. सिंह ह कहिन कि इहां विश्वस्तरीय चिकित्सा सुविधा अड़बड़ कमती कीमत म मिलही। ये अस्पताल कैंसर पीडित मरीज मन बर मील के पत्थर साबित होही। ए अस्पताल के संचालन बिना लाभ के आधार म करे जात हे, एखर से गरीब परिवार मन ल कम कीमत म बेहतर अऊ अत्याधुनिक चिकित्सा सुविधा मिलही। उमन उम्मीद जताईन के इहां कैसर पीडि़त मरीज मन के इलाज अऊ देखभाल के व्यवस्था पूरा समर्पणभाव ले करे जाही।




ए अवसर म विधानसभा अघ्यक्ष श्री गौरी शंकर अग्रवाल ह घलोक अपन विचार व्यक्त करिन। वेदांता लिमिटेड के चेयरमेन श्री नवीन अग्रवाल ह कहिन कि टाटा मेडिकल सेन्टर कलकत्ता के डारेक्टर डॉ. मामेन चांडी अऊ पद्मविभूण अलंकरण ले सम्मानित डॉ.सुरेश एच.आडवानी के देख-रेख म कैंसर के मरीज मन के इलाज बर ये मेडिकल सेन्टर विकसित करे गए हे। इहां कैंसर के पहिचान बर जर्मनी अऊ जापान ले अत्याधुनिक उपकरण मन ले सुसज्जित लैब हे, ए अस्पताल म मरीज मन बर 170 बेड हे। उमन बताइन कि इहां कैसर के मरीज मन बर अत्याधुनिक इलाज के सबे सुविधा मौजूद हे। श्री अग्रवाल ह ए केन्द्र के स्थापना अऊ कैंसर के मरीज मन के इलाज बर विजन देहे बर मुख्यमंत्री डॉ. रमन सिंह के प्रति आभार व्यक्त करिन। मुख्यमंत्री डॉ. सिंह अऊ विधानसभा अध्यक्ष श्री अग्रवाल ह ए कैंसर अस्पताल के आपात चिकित्सा कक्ष, कीमोथेरोपी वार्ड अऊ अत्याधुनिक लैब संग कई ठन वार्ड मन म सुविधा मन के अवलोकन घलोक करिन। कार्यक्रम म वेदांता मेडिकल रिसर्च फाउण्डेशन के अध्यक्ष ज्योति अग्रवाल, वेदांता लिमिटेड के चेयरमेन श्री नवीन अग्रवाल, मुख्य सचिव श्री अजय सिंह, खनिज विभाग के सचिव श्री सुबोध कुमार सिंह संग बहुत अकन प्रशासनिक अधिकारी अऊ बड़ संख्या म गणमान्य नागरिक उपस्थित रहिन।



मुहाचाही:  राज्य शासन के योजना मन ले किसान मन के जीवन म आवत हे सकारात्मक बदलाव : डॉ. रमन सिंह