Yojana

छत्तीसगढ़ म ए साल सवा करोड़ मनखे मन के योगाभ्यास के विश्व कीर्तिमान बनाए के करत हे तैयारी

रायपुर, 09 मार्च 2018। अंतर्राष्ट्रीय योग दिवस के उपलक्ष्य म छत्तीसगढ़ म ए साल एक करोड़ 25 लाख मनखे मन ल एक संग योगाभ्यास करवाए के लक्ष्य निरधारित करे गए हे। एखर बर 15 जून ले एक हफ्ता के प्रदेश व्यापी अभियान चलाए जाही, जेखर समापन 21 जून ल चौथा विश्व योग दिवस के अवसर म होही। समापन समारोह म मुख्य अतिथि के रूप म प्रधानमंत्री श्री नरेन्द्र मोदी ल आमंत्रित करे गए हे। राज्य म तीसर अंतर्राष्ट्रीय योग दिवस के मौका म पाछू बछर 55 लाख 87 हजार मनखे मन एक संग योगाभ्यास करे के कीर्तिमान बनाए रहिन, जऊन ल गोल्डन बुक ऑफ वर्ल्ड रिकार्ड म दर्ज करे गए हे।




ये जानकारी आज संझा इहां छत्तीसगढ़ योग आयोग के सामान्‍य सभा के दुसर बैठक म आयोग के अध्यक्ष श्री संजय कुमार अग्रवाल ह दीन। उमन बताइन कि मुख्यमंत्री डॉ. रमन सिंह ह प्रधानमंत्री श्री मोदी ल चिट्ठी लिखके योग दिवस म आमंत्रित करे हें। आयोग कोति ले केन्द्रीय आयुष अऊ स्वास्थ्य अउ कुटुंब कल्याण विभाग के राज्य मंत्री (स्वतंत्र प्रभार) श्री श्रीपद यस्सो नाईक ल पत्र लिखे गए हे। श्री अग्रवाल ह बैठक म बताइस कि ए साल के योग दिवस म छत्तीसगढ़ के सवा करोड़ नागरिक मन के योगाभ्यास के विश्व कीर्तिमान बनाए के तैयारी करे जात हे। एखर बर गिनीज बुक ऑफ वर्ल्ड रिकार्ड, लिम्का बुक ऑफ वर्ल्ड रिकार्ड अऊ गोल्डन बुक ऑफ वर्ल्ड रिकार्ड के अधिकारी मन ल घलोक योग आयोग कोति ले आमंत्रित करे जात हे।



मुहाचाही:  पंचायत प्रतिनिधि मन ह देखिन रायपुर अऊ नया रायपुर