बृजमोहन अग्रवाल रायपुर विकास यात्रा

छत्तीसगढ़ म जीत के चौका लगाही भाजपा- बृजमोहन

  • कृषि-सिंचाई मंत्री बृजमोहन अग्रवाल ह लीन गरियाबंद जिला भाजपा के बैठक। सरकार के विकास यात्रा के संबंध म लीन तैयारी मन के जायजा, कार्यकर्ता मन ल दीन जरूरी दिशा निर्देश।
  • 6 जून के दिन गरियाबंद पहुंचही मुख्यमंत्री के विकास यात्रा

रायपुर, 14 मई 2018। प्रदेश के कृषि-सिंचाई मंत्री अउ गरियाबंद के प्रभारी बृजमोहन अग्रवाल ह कहिन कि बीते 14 बछर म सम्पूर्ण छत्तीसगढ़ म विकास के गंगा बोहाये हे। गाँव, गरीब अऊ किसान मन के जीवन म खुशहाली लाय बर प्रदेश के हमर भाजपा सरकार ह पूरा निष्ठा अऊ लगन के संग काम करे हे। इही सेती जनता ह भारतीय जनता पार्टी ल सरलग 3 चुनाव मन म असीस देके जीत देवाये हे। अवइया विधानसभा चुनाव म घलोक जनता के असीस हमार पक्ष म होही अऊ हम फेर से जीत के चौका लगाबोन। उमन ये बात गरियाबंद जिला भाजपा कार्यसमिति बैठक के बेरा म कहिन। अवइया 6 जून के दिन मुख्यमंत्री डॉ रमन सिंह के जिला म होवईया विकासयात्रा के तैयारी मन के संबंध म ये बैठक ऑक्शन हॉल गरियाबंद म आयोजित रहिस। बैठक म खनिज निगम के अध्यक्ष शिवरतन शर्मा,आरडीए अध्यक्ष संजय श्रीवास्तव उपस्थित घलोक विशेष रूप उपस्थित रहिन।
बैठक ल सबोधित करत बृजमोहन अग्रवाल ह कहिन के सरकार के विकासयात्रा ल ऐतिहासिक बनाए बर सबो कार्यकर्ता मन ल मेहनत करना हे। मुख्यमंत्री के विकास रथ के स्वागत करे बर हरेक बूथ ले 100 मनखे जुटयं अइसन तैयारी करना होही। विकास यात्रा के दिन भाजयुमों कार्यकर्ता मन ल 2 हज़ार मोटरसाईकल के रैली निकालने के लक्ष्य दे गीस।
उमन भाजपा किसान मोर्चा, महिला मोर्चा, पिछड़ा वर्ग प्रकोष्ठ, अल्पसंख्यक मोर्चा, अनुसूचित जाति जन जाति मोर्चा, सहकारिता प्रकोष्ठ के पदाधिकारी मन ले विकासयात्रा के तैयारी मन म जुटे मनखे मन ल यात्रा के संबंध म अवगत करात रहे के बात कहिन।
जिला भाजपा अध्यक्ष रामकुमार साहू, जिला प्रभारी डॉ अजय राव, राजिम विधायक संतोष उपाध्यय, संसदीय सचिव गोवर्धन सिंह मांझी, पूर्व विधायक डमरूधर पुजारी, पुनित राम साहू, अशोक राजपूत, जीव जंतु कल्याण बोर्ड के सदस्य केके अवधिया, संदीप शर्मा, बलदेव हुंडल, राजेश साहू, मुरलीधर सिन्हा, गफ्फू मेमन, रिखीराम यादव, पुनितराम सिन्हा, आशीष शर्मा, अजय रोहरा, मुकेश गंगवानी, सचिन मेघानी आदि उपस्थित रहिन।
जनता ल 53 बछर तक विकास ले दूरिहा रखईया कांग्रेसी मन के विरोध समझ ले परे-
ये बैठक म खनिज निगम के अध्यक्ष शिवरतन शर्मा ह विकास यात्रा के आलोचना करत कांग्रेसी मन उपर कहिन के जऊन मनखे आज़ादी के 53 साल तक छत्तीसगढ़ ल अंधियारी म रखिन ओ मन ल विकास यात्रा म अंगरी उठाए के अधिकारेच नइ हे। उमन कांग्रेसी मन ऊपर सवाल दागत पूछिन के आप मन के जब सरकार रहिस तब कोन गरीब मन ल 1 रुपये किलों म चाँउर देहे ल, किसान मन ल मुफ्त बिजली देहे, धान के बोनस देहे ले रोके रहिस? आप मन के सरकार जनहित के कोनो काम नइ कर सके रहिस। हमर सरकार अच्छा काम करत हे त आप कांग्रेसी मन विरोध करत हव। अइसन कांग्रेसी विरोध ल जनता सिरे ले नकारत हे।

मुहाचाही:  उपराष्ट्रपति श्री एम. वेंकैया नायडु ल माना विमान तल म दे गीस विदाई