डॉ. रमन सिंह

जगदलपुर म शुरू होही शूटिंग, तीरंदाजी अऊ वाटर स्पोर्ट्स अकादमी : डॉ. रमन सिंह

  • एनएमडीसी ह स्पोर्ट्स अकादमी बर मंजूर करिस 20 करोड़ रूपिया
  • छत्तीसगढ़ ओलंपिक संघ के कार्यकारिणी के बैठक म राष्ट्रीय खेल मन के तैयारी के समीक्षा
  • अंतर्राष्ट्रीय ओलंपिक दिवस म आयोजित करे जाही पांच किलोमीटर के दौड़

रायपुर, 15 मई 2018। मुख्यमंत्री अऊ छत्तीसढ़ ओलंपिक संघ के अध्यक्ष डॉ. रमन सिंह ह कहिन के बस्तर संभाग के मुख्यालय जगदलपुर म शूटिंग, तीरंदाजी अऊ वाटर स्पोर्ट्स के अकादमी राष्ट्रीय खनिज विकास निगम (एनएमडीसी) के सहयोग ले चालू करे जाही। करीबन 90 करोड़ रूपिया के लागत के ए खेल परियोजना बर एनएमडीसी के अध्यक्षसह प्रबंध निदेशक श्री एन. बैजेन्द्र कुमार ह सीएसआर मद ले ए अकादमी बर पहिली चरण 20 करोड़ रूपिया के स्वीकृति प्रदान कर दीन। डॉ. सिंह ह आज संझा इहां नवीन थिरावन गृह म आयोजित छत्तीसगढ़ ओलंपिक संघ कार्यकारिणी के बैठक म ये जानकारी दीन।
मुख्यमंत्री ह ये घलोक बताइन के साल 2018-19 के बजट म एथलेटिक अकादमी रायपुर बर 16 करोड़ रूपिया अऊ सरगुजा के एथलेटिक अकादमी बर घलोक बजट प्रावधान करे गए हे। जल्दीच ये दुनों अकादमी मन चालू होही। डॉ. सिंह ह ये घलोक बताइन के टेनिस अकादमी के स्थापना बर सैद्धांतिक सहमति प्रदान कर दे गए हे। जशपुर म निर्माणाधीन अंतर्राष्ट्रीय स्तर के एस्ट्रोटर्फ हॉकी मैदान पूर्णता के तरफ हे। बैठक म गोवा म ए साल आयोजित होवइया 36वां राष्ट्रीय खेल अऊ छत्तीसगढ़ म आयोजित होवइया 37वां राष्ट्रीय खेल मन के तैयारी मन के समीक्षा करे गीस। बैठक म बताइए गीस कि अवइया 23 जून के दिन ओलंपिक दिवस के अवसर म छत्तीसगढ़ ओलंपिक संघ से पांच किलोमीटर के दौड़ के आयोजन करे जाही। मुख्यमंत्री ह बैठक म कहिन कि प्रदेश म खेल अधोसंरचना विकास के हर संभव प्रयास करे जात हे। करीबन दू हजार स्कूल मन म ओपन जिम के व्यवस्था करे जात हे। करीबन 50 ले 70 लाख रूपिया के लागत ले 31 स्टेडियम अऊ 60 मिनी स्टेडियम ग्रामीण अंचल मन म बनाए जात हे। जिला खनिज न्यास निधि ले 32 स्टेडियम स्वीकृत करे गए हे।
बैठक म लोकसभा सांसद श्री रमेश बैस, पंचायत अउ ग्रामीण विकास मंत्री श्री अजय चन्द्राकर, नगरीय प्रशासन मंत्री श्री अमर अग्रवाल, छत्तीसगढ़ गृह निर्माण मंडल के पहिली अध्यक्ष श्री सुभाष राव, डॉ. अनिल वर्मा, अंतर्राष्ट्रीय हॉकी खिलाड़ी श्रीमती नीता डूमरे अऊ श्रीमती सबा अंजुम, छत्तीसगढ़ ओलंपिक संघ के सचिव श्री संजय मिश्रा, कोषाध्यक्ष डॉ. विष्णु श्रीवास्तव संग कई ठन खेल संघ मन के बहुत अकन पदाधिकारी ए अवसर म उपस्थित रहिन।

मुहाचाही:  छत्तीसगढ़ के ’लोक सुराज’ देश के सबले बड़े सोशल ऑडिट अभियान: डॉ. रमन सिंह