बृजमोहन अग्रवाल

जनहित के काम मन बर हम चुनावी साल के अगोरा नइ करन : बृजमोहन अग्रवाल

●किसान मन के जीवन म समृद्धि लवईया बजट-बृजमोहन
●छत्तीसगढ़ के खुशहाली के बजट-बृजमोहन
●राज्य के तरक्की ल उड़ान देवइया बजट
रायपुर/10/02/2018/ छत्तीसगढ़ विधानसभा म मुख्यमंत्री डॉ रमन सिंह कोति ले प्रस्तुत राज्य के बजट ऊपर अपन प्रतिक्रिया व्यक्त करत प्रदेश के वरिष्ठ भाजपा नेता अउ कृषि सिंचाई मंत्री बृजमोहन अग्रवाल ह कहिन कि ये बजट राज्य के ढाई करोड़ जनता के विकास के बजट हे। ऊंखर जीवन मे खुशहाली लाय अऊ तरक्की के सफर ल उड़ान देवइया बजट हे। बीते साल के तुलना म 29 फीसदी के वृद्धि के संग कृषि क्षेत्र बर 13480 करोड़ के प्रावधान ये बताथे कि हमर भाजपा सरकार किसान मन के हित ल सबले ऊपर रखथे। 30 नवा कॉलेज, 6 नवा कृषि कॉलेज खोले जाना युवा पीढ़ी ल बेहतर शिक्षा देहे के दिशा म ठोस काम हे। अपन वादा के मुताबिक धान बोनस बर 2107 करोड़ रुपया के प्रावधान सरकार ह करे हे। 60 हज़ार हैक्टेयर अकतहा सिंचाई के लक्ष्य सरकार के किसान हितैसी नीति ल दर्शाथे। मितानिन मन के मानदेय म वृद्धि, पेंशन स्कीम, सरकारी अस्पताल मन के सबो जांच निःशुल्क करना, सरकार के संवेदनशीलता ल प्रदर्शित करथे।
बृजमोहन ह कहिन कि प्रधानमंत्री नरेंद्र मोदी ह देश के किसान मन के आय 2022 तक दुगुना करे के लक्ष्य निरधारित करे हे। हमर भाजपा सरकार घलोक इही दिशा म पूरा ताकत के संग काम करत हे। गांव-गरीब अऊ किसान मन के हित मे सरकार बेहतर निर्णय लेवत हे। विपक्षि मन कोति ले लगाए जात चुनावी बजट के आरोप म उमन कहिन कि हमर भाजपा सरकार पूरा 5 साल काम करथे। जनहित के काम मन बर हम चुनावी साल के अगोरा नइ करन। हमर सरकार हर साल परीक्षा के तैयारी करथे, परिणाम आघु हे, 14 बछर ले जनता के आशीर्वाद भाजपा के संग बने हे।

मुहाचाही:  योद्धा हे छत्तीसगढ़, अकेल्‍ला लड़त हे नक्सलवाद ले- बृजमोहन