Chhattisgarhi Lok Suraj

दिव्यांग मन के सम्मान बर संवेदनापूर्ण वातावरण बनाव: श्री अजय चंद्राकर

  • पंचायत मंत्री हर 154 दिव्यांग मन ल सहायक उपकरण वितरित करिन

रायपुर, 19 मई 2017। पंचायत अउ ग्रामीण विकास मंत्री श्री चन्द्राकर हर कुरूद के जुन्ना कृषि मंडी परिसर म दिव्यांग मन बर बैट्रीयुक्त ट्रायसिकल अउ सहायक उपकरण वितरण कार्यक्रम ल संबोधित करत कहिन कि दिव्यांग मन के सम्मान बर संवेदनापूर्ण वातावरण बनाना चाही। ओ मन ल दया नही, स्वाभिमान चाही। दिव्यांग घलोक बराबरी के अपेक्षा रखथें। समाज कल्याण विभाग के तरफ ले आयोजित सहायक उपकरण वितरण समारोह म श्री चन्द्राकर हर कुरूद के 154 दिव्यांग हितग्राही मन ल कई ठन सहायक उपकरण निःशुल्क वितरित करिन। ये मां 50 मोटराइज्ड ट्रायसिकल, 10 ट्रायसिकल, 5 व्हीलचेअर संग 20-20 जोड़ी बैसाखी, वॉकिंग स्टीक अउ श्रवण यंत्र अउ दू-दू नग ब्रेलकिट, 10 श्वेत छड़ी अउ पांच स्मार्ट फोन सामिल हावय। ए मौका म 10 दिव्यांग जोड़ा ल विवाह प्रोत्साहन योजना के तहत चेक घलोक वितरित करे गीस।
श्री चन्द्राकर हर कहिन कि दिव्यांग मन ल आत्मनिर्भर बनाए के दिशा म राज्य सरकार कोति ले उठाए गए कदम ले एक स्वस्थ समाज के निर्माण होही। दिव्यांग मन ल सुविधा दे के उनला समाज के मुख्य धारा म सामिल करना हम सबो के कर्तव्य हे। कार्यक्रम म धमतरी जिला पंचायत अध्यक्ष श्री रघुनंदन साहू, राज्य समाज कल्याण बोर्ड के सदस्य श्रीमती ज्योति चंद्राकर, कुरूद जनपद पंचायत के अध्यक्ष श्रीमती पूर्णिमा साहू, नगर पंचायत के अध्यक्ष श्री रविकांत चंद्राकर, जनपद उपाध्यक्ष श्री छत्रपाल बैस संग बड़ अकन गांव वाले मन उपस्थित रहिन।

मुहाचाही:  कवर्धा ले सिमगा सड़क के दू लेन के उन्नयन के काम पूरा होवईया हे