Uncategorized

प्रधानमंत्री ह छत्तीसगढ़ के स्वच्छता दूत स्वर्गीय श्रीमती कुंवर बाई ल सुरता करिन

रायपुर, 08 मार्च 2018। प्रधानमंत्री श्री नरेन्द्र मोदी ह आज अंतर्राष्ट्रीय महिला दिवस के अवसर म छत्तीसगढ़ के वयोवृद्ध 106 वर्षीय दिवंगत स्वच्छता दूत श्रीमती कुंवर बाई ल विनम्रता पूर्वक सुरता करिन। श्री मोदी ह अपन ट्वीटर म जारी संदेश म कहिन कि श्रीमती कुंवर बाई ह छेरी बेचके शौचाल के निर्माण करके स्वच्छ भारत अभियान म जऊन योगदान देहे हे, वो कभू भुलाए नइ जा सकय। मैं ऊंखर ए पवित्र काम ले अड़बड़ प्रभावित होय हंव। आपमन जानतेच होहू के श्रीमती कुंवर बाई छत्तीसगढ़ के धमतरी जिला के ग्राम कोटाभर्री (ग्राम पंचायत बरारी) के निवासी रहिन। पाछू महीना के 23 तारीक के दिन राजधानी रायपुर के अम्बेडकर अस्पताल म उंखर निधन हो गीस। प्रधानमंत्री श्री मोदी ह करीबन दू साल पहिली 21 फरवरी 2016 के दिन छत्तीसगढ़ प्रवास के समय राजनांदगांव जिला के ग्राम कुर्रूभाठ (डोंगरगढ़) म आयोजित विशाल जनसभा म चरण स्पर्श करके उंखर सम्मान करे रहिन। उमन आज महिला दिवस के मौका म अपन ट्वीटर म ’शी इंस्पायर्स मी’ हैशटैग म ये वाले यादगार तस्वीर घलोक पोस्ट करिन।
जब प्रधान मंत्री उंखर से मिले रहिन तब वो करीबन 104 साल के रहिन। श्रीमती कुंवर बाई ह छेरी बेचे ले मिले पइसा ले अपन घर म शौचालय बनवाइस अऊ गांव वाले मन ल घलोक शौचालय निर्माण बर प्रोत्साहित करिन। ऊंखर गांव के सबो 18 घर मन म शौचालय बन गे हे अऊ ये गांव स्वच्छ भारत मिशन के तहत खुले म शौचमुक्त (ओडीएफ) घोषित हो चुके हे।



मुहाचाही:  दुर्ग : ग्राम पंचायत मन म ’’साथिन‘‘ पद बर आवेदन 15 फरवरी तक