बलौदा बाजार

बलौदाबाजार जिला के सिंगारपुर गांव के दिव्‍यांग सुरेन्‍द्र वैष्‍णव के कलेक्‍ट्रेट के आघू आत्‍महत्‍या करे धमकी

फेसबुक, दिव्‍यांग सुरेन्‍द्र वैष्‍णव ह कलेक्‍टर ल धमकावत अंदाज म अरजी लिखे हे के भ्रष्‍ट अधिकारी मन उप्‍पर लउहे कार्यवाही नइ होही त वो ह कलेक्‍ट्रेट के आघू आत्‍महत्‍या कर लेहय। खबर के मुताबिक सिंगारपुर ल अभी हाल 13 जनवरी के 2018 दिन ओडीएफ घोषित करे गए हे, फेर सुरेन्‍द्र वैष्‍णव के घर म शौचालय नई हे। सुरेन्‍द्र वैष्‍णव अपन फेसबुक प्रोफाईल म कांग्रेस के नेता मन के पोस्‍ट ल लगाए हवय अउ अपन चिन्‍हारी के रूप म शायरी लिखे हे कि ‘जहाँ सच नही वहाँ झूठ सही। जहाँ प्यार नही वहाँ लूट सही।।’



दिव्‍यांग सुरेन्‍द्र वैष्‍णव कलेक्‍टर ल लिखे अरजी म लिखे हवय के ओला केन्‍द्र सरकार कोति ले विकलांग पेंसन मिलथे। ओला प्रधान मंत्री आवास अउ शौचालय प्राथमिकता ले मिलना चाही फेर नइ मिले हे। पंचायत सचिव धनेश ध्रुव ल बोले म वो ह बोलथे के जो करना हे कर ले, तोर कुछ नइ बनय। सचिव ह केन्‍द्र सरकार के पेंशन वाले लिस्‍ट ले नाम काट देहे के तको धमकी देथे। सुरेन्‍द्र के अरजी के मुताबिक वो ह सचिव उपर कार्यवाही के मांग करत हे। कलेक्‍टर ल ओकर बात के जांच करवाना चाही अउ सुरेन्‍द्र ल प्राथमिक सुविधा देवाना चाही।

आजकल अपन बात मनवाए खातिर सार्वजनिक जघा म आत्‍महत्‍या कर लेना आम बात हो गए हे। ते खातिर हमला ये खबर के गंभीरता ले मनन करना चाही। आजकल सोसल मीडिया के भड़कई म आके मनखे अपन संयम खो देथे अउ तुकतुका जाथे। जब वोकर मन के नइ होवय त वो ह निराशा अउ उत्‍तेजना म आत्‍महत्‍या जइसे कदम उठा लेथे। मीडिया अउ नेता दूरिहा बईठ के मजा लेथें अउ गरीब बिचारा अपन लइका मन ल बेसहारा छोड़ के मर जाथे। हमर हिसाब से सुरेन्‍द्र ल आत्‍महत्‍या के बात नइ करना चाही भलुक अइसन संकट के डटके मुकाबला करना चाही अउ लड़ के अपन हक लेना चाही।



मुहाचाही:  मुख्यमंत्री ह बलौदाबाजार म करिन 964 करोड़ के 79 काम के लोकार्पण-भूमिपूजन