Success Stories

मुख्यमंत्री ह छत्तीसगढ़ के उमर ले दू साल बड़े दीपक के सुनाईस सच्ची कहानी

09, फरवरी, 2018। विधान सभा म आज मुख्‍यमंत्री डॉ.रमन सिंह ह प्रदेश के चारो कोति होत विकास के बात बतावत जशपुर जिला के ग्राम कोड़ेकेला (विकासखण्ड-पत्थलगांव) निवासी खेतिहर मजदूर परिवार के युवक दीपक कुमार के उदाहरण दीन। उमन एला सफलता के एक सत कहानी बताइन। डॉ. सिंह ह कहिन दीपक के उम्‍मर छत्तीसगढ़ राज्य के उम्‍मर ले दू साल जादा होही मने 17 साल के छत्तीसगढ़, 14 साल के हमर सरकार अऊ 19 साल के उम्‍मर के दीपक। दीपक ह होस संभालिस त ओला हमर सरकार के संग मिलीस अऊ ओखर कदम आगू बाढ़े लागिस। ओखर माता-पिता खेतिहर मजदूर हे। ओखर तीन भाई-बहिनी हे। घर के हालत एकदमेच सादा हे, फेर हमर सरकार के योजना मन के सेती ओखर परिवार संभलिस।
दीपक जइसे बहुत अकन परिवार के घर मन म हमर सरकार ह बिजली दीस, उज्ज्वला रसोई गैस के कनेक्शन, बीपीएल कार्ड ले खाद्यान्न सुरक्षा के भरोसा दीस, स्वच्छ शौचालय दीस। एखर से दीपकेच नहीं भलुक ओखर पूरा परिवार के आत्मविश्वास बाढि़स। दीपक ह हमर योजना मन के लाभ लेत प्रतियोगी परीक्षा पास करिस अऊ अब वो आईआईटी दिल्ली म पढ़त हे। डॉ. सिंह ह जशपुर जिलाच के गांव जुरगुम (विकासखण्ड-बगीचा) निवासी नितेश गुंजन पैकरा के सफलता के बारे म घलोक बताइस अऊ कहिन कि अभाव ल झेलके घलोक लगन, मेहनत अऊ हमर योजना मन के लाभ लेकर नितेश ह प्रतियोगी परीक्षा पास करिस अऊ आज वो आईआईटी दिल्ली म पढ़ाई करत हे। मुख्यमंत्री ह राज्य लोक सेवा आयोग अऊ संघ लोक सेवा आयोग के परीक्षा मन म उत्तीर्ण छत्तीसगढ़ के आदिवासी क्षेत्र के बहुत अकन युवा मन के घलोक उदाहरण दीन। उमन कहिन-ये हमर योजना मन के सफलता के जीवंत उदाहरण हे।



मुहाचाही:  दंतेवाड़ा के जवान मन म परिस्थिति मन ल बदले के ताकत-डॉ रमन सिंह