कोण्डागांव डॉ. रमन सिंह विकास यात्रा

विकास के नवा परिभासा लिखत हे बस्तर – डॉ. रमन सिंह

केशकाल ल उद्यान अऊ मिनी स्टेडियम बर मिलीस 40 लाख रूपिया के सौगात

कोण्डागांव, 15 मई 2018। मुख्यमंत्री डॉ. रमन सिंह 14 मई के दिन कोण्डागांव जिला के केशकाल म आयोजित विकास यात्रा के कार्यक्रम म सामिल होइन। उमन विकास यात्रा के उद्देश्य मन उपर प्रकाश डालिन। मुख्यमंत्री ह कहिन कि प्रदेश के मनखे मन के सुविधा बर चहुमुखी विकास कार्य होवत हे। पाछू 15 बछर ले प्रदेश के जनता के भागीदारी विकास कार्य मन म रहे हे। उमन कहिन के देश के प्रधानमंत्री के मंशा के मुताबिक लोगन मन ल विद्युत सुविधा मुहैया कराए बर प्रयास होवत हे। आयुष्मान भारत योजना के तहत मनखे मन ल स्वास्थ्य सुविधा देहे के काम होवत हे। डॉ. सिंह ह केशकाल म उद्यान अऊ मिनी स्टेडियम के निर्माण बर 40 लाख रूपिया के स्वीकृति के घोषणा करत कहिन कि विकास यात्रा के दूसर चरण म पूरा प्रदेश के पचास लाख बहिनी अउ युवा मन ल स्मार्ट फोन बांटे जाही जेखर से ओ मन दुनिया के कोना-कोना ले जुड़ सकहीं। पूरा बस्तर ल रेल, विमान अउ फोन कनेक्टिविटी ले जोड़े बर राज्य सरकार प्रतिबद्ध हे।
मुख्यमंत्री ह कहिन कि विकास यात्रा म लोगन के अपार समर्थन अऊ सहयोग मिलत हे। महिला, सियान, युवा सबो विकास यात्रा म सहभागी बनत हें, ये अभूतपूर्व हे। उमन कहिन कि जब कोंडागांव जिला के निर्माण करे गीस, तब मनखे संदेह व्यक्त करत रहिन के ये कइसे विकसित होही। आज कोंडागांव म जिला मुख्यालय के सबो आधारभूत संरचना विकसित हो गए हे। केशकाल घाट के उन्नीयनीकरण अउ बायपास रोड बर काम चालू हो गए हे जेखर से जादा ले जादा लोगन मन ल बस्तर आए म सुविधा होही।
ए दौरान मुख्यमंत्री डॉ. रमन सिंह ह जनसभा म अमर शहीद गेंदसिंह, गुंडाधूर अऊ शहीद वीर नारायण सिंह ल सुरता करिन। कार्यक्रम म सांसद कांकेर विक्रम उसेण्डी, नान अध्यक्ष सुश्री लता उसेण्डी, पूर्व विधायक केशकाल सेवकराम नेताम, जिला कलेक्टर नीलकंठ टीकाम अउर कई ठन संस्था मन के बहुत अकन वरिष्ठ पदाधिकारी मांझी ,मुखिया अउ केशकाल के बहुत अकन वरिष्ठ जनप्रतिनिधि संग जिला के सबो अधिकारी घलोक उपस्थित रहिन।

मुहाचाही:  सौर सुजला हमार बर हे ’टेंशन-फ्री’ मधु के बात सुनके मुख्यमंत्री मुसकियाइस