डॉ. रमन सिंह

विधान सभा म कांग्रेस ल हकन के सुनाइस रमन

2014 लोकसभा के चुनाव परिणाम कांग्रेस के आँखी खोले बर बहुत
कांग्रेस के हालात दयनीय, राष्ट्रीय पार्टी के दर्जा घलोक जल्दी खतम होही
कांग्रेस ह लोकतंत्र म कुठाराघात करत 90 पइत धारा 356 के दुरूपयोग करिस
नारा गरीबी हटाओ, फेर गरीबे मन ल हटाए के काम कांग्रेस करत हे
प्रधानमंत्री नरेंद्र मोदी माँ भारती के असल सपूत
सरगुजा अऊ छत्तीसगढ़ के विकास म भाजपा ह मील के पत्थर स्थापित करे हे

विधानसभा म बजट सत्र के बेरा मुख्यमंत्री डॉ रमन सिंह ह राज्यपाल के अभिभाषण म धन्यवाद प्रस्ताव उपर चर्चा करत कांग्रेस ल जमके घेरिन। उमन कहिन कि देश के राजनैतिक परिस्थिति म तेजी ले बदलाव आवत हे, जेमां 2014 म लोकसभा चुनाव के परिणाम कांग्रेस के आँखी खोले बर बहुत हे। डॉ. रमन सिंह ह प्रधानमंत्री श्री नरेन्द्र मोदी ल माँ भारती के असल सपूत बतात कहिन कि मोदी जी के साहसिक अऊ दूर दृष्टिता के बल म कांग्रेस मुक्‍त भारत के परिकल्पना जल्दी साकार करे जा सकही। उमन सदन ल बताइन कि ये भारतीय जनता पार्टी के सुशासन के परिणाम हे कि आज देश के 19 राज्य मन म भाजपा के सरकार हे, 1382 विधायक भारतीय जनता पार्टी के हें।
डॉ. रमन सिंह ह कांग्रेस उपर कटाक्ष करत कहिन कि कांग्रेस के हालात अतका दयनीय हो गए हे कि जब-जब सदन म मोर कोति ले भाषण दे जाथे कांग्रेस या कांग्रेस समर्थन वाले एक राज्य कम हो जाथे, पाछू बछर बिहार, अभी हाले के चुनाव म हिमाचल अऊ अब आवइया बेरा म कर्णाटक ले कांग्रेस के विदाई तय हे। उमन आशा व्यक्त करिन कि कांग्रेस कहूं अइसनहे जनता ल ठगे वाले राजनीति करत रहिही त जल्दीच ये राष्ट्रीय पार्टी के मान्यता घलोक खतम हो जाही।




उमन सदन म कहिन कि कांग्रेस हमेशा लोकतंत्र के गरिमा ल खतम करके जातिवाद के राजनीति ल बढ़ाए के काम करे हे, ए बात ल उमन प्रधानमंत्री रहत इंदिरा गाँधी च ल भारत रत्न देहे के बात ले जोडि़न। डॉ. रमन ह सदन म बताइस कि लौह पुरुष वल्लभ भाई पटेल जमन देश ल एकता के सूत्र म बाँधे के अभिनव काम करिस ओ मन ल कांग्रेस ह आजादी के 44 साल बाद 1991 म अऊ भारत के संविधान के बनइया बाबा साहब भीम राव आंबेडकर ल 1990 म भारत रत्न दीस। उमन सदन ल ए बात ले घलोक अवगत कराइन कि कांग्रेस ह 90 पइत देश म अऊ बहुत अकन राज्य मन म धारा 356 के उपयोग करके इमरजेंसी लगाके अपन अधिकार के दुरूपयोग करिस, राज्य के जनता ले मिले विश्वास ल घलोक कांग्रेस ह हमेशा दरकिनार करत अपन फायदा बर बहुत अकन राज्य म हर दू-दू साल म मुख्यमंत्री ल बदले के रिकार्ड कायम करे हे।
डॉ रमन ह नेता प्रतिपक्ष टी.एस. सिंहदेव ले सवाल करत पूछिन के आप मन खुदे बतावव कि 1947 ले लेके 2003 तक आप मन के क्षेत्र ल कांग्रेस ह का देहे हे? एखर जबाब म मुख्यमंत्री ह बताइस कि भारतीय जनता पार्टी ह कभू जाति, पक्ष-विपक्ष के राजनीति नइ करिस एकर परिणाम हे नेता प्रतिपक्ष के क्षेत्र म करे गए विकास, साल 2003 के बाद भारतीय जनता पार्टी के सरकार ह सरगुजा म मेडिकल कॉलेज के स्थापना कराइ, सरगुजा विकास प्राधिकरण के गठन करिस, सरगुजा ल संभाग बनाइस, सरगुजा म रिंग रोड के निर्माण, स्वास्थ्य, सड़क, बिजली पानी के अभूतपूर्व विकास भारतीय जनता पार्टी के सरकार ह सरगुजा म करे हे, अभी हाले म सरगुजा म 4300 करोड़ के सड़क निर्माण के काम जारी हे।



डॉ रमन ह कांग्रेस के राजनीति ल झूठ अऊ फरेब के राजनीति करइया पार्टी बतात कहिन कि कांग्रेस नारा तो गरीबी हटाओ के लगाथे फेर गरीबे मन ल हटाए के काम करथे। उमन कहिन कि कांग्रेस के आज जऊन स्थिति बने हे ओखर बर कांग्रेसेच जिम्मेदार हे। आज देश मेर एक सशक्त नेतृत्व हे, प्रधानमंत्री श्री नरेंद्र मोदी के नेतृत्व म देश विकास के रस्ता म अग्रसर हे, देश के जनता के भारतीय जनता पार्टी के प्रति विश्वास बाढ़त हे, उमन सदन म विश्वास व्यक्त करिन कि अवइया विधानसभा चुनाव म भारतीय जनता पार्टी मिशन 65+ ल सहजेच म पा लीही।

मुहाचाही:  राज्य म बालिका शिक्षा ल लेके अभूतपूर्व जागरूकता: डॉ. रमन सिंह