Sanskruti

संस्कृति विभाग कोति ले छत्तीसगढ़ के प्राचीन धरोहर मन म चित्रकला अऊ प्रश्नोत्तरी प्रतियोगिता आयोजित

रायपुर, 17 मई 2018। राज्य सरकार के संस्कृति अऊ पुरातत्व विभाग कोति ले आज इहां महंत घासीदास संग्रहालय के सभागृह म छत्तीसगढ़ के प्राचीन धरोहर मन म चित्रकला प्रतियोगिता अऊ वस्तुनिष्ठ प्रश्नोत्तरी प्रतियोगिता के आयोजन करे गीस। दुनों प्रतियोगिता मन म लइका मन, युवा अऊ कई आयु वर्ग के मनखे मन ह उत्साह के संग हिस्सा लीन। विशेष रूप ले ए स्पर्धा मन म भिनसरहा ले मंझनिया तक लइका मन के भारी चहल-पहल देखे गीस। ए प्रतियोगिता मन म चुने गए प्रतिभागी मन ल काल 18 मई के दिन अंतर्राष्ट्रीय संग्रहालय दिवस समारोह म पुरस्कृत करे जाही। ये समारोह महंत घासीदास संग्रहालय परिसर म बिहनिया 10.30 बजे शुरू होही।
संग्रहालय म आज 17 मई के दिन आयोजित चित्रकला प्रतियोगिता म सीनियर ग्रेड म जसवंत रंगेल ल पहिली, साक्षी यादव ल दूसर अऊ अंकिता बोधवानी ल तीसर स्थान प्राप्त होइस। जूनियर ग्रेड के चित्रकला प्रतियोगिता म मनोज कुमार साहू पहिली, करण निषाद दूसर अऊ शशिकांत यादव तीसर स्थान म रहिस। एकर अलावा दस सांत्वाना पुरस्कार बर खुशी सिंह, आयुषी वर्मा, मनीष कुमार सोना, विहान दास, हेमलाल धीवर, जैनाब अजीन, विशाल हियाल, सूरज जांगड़े, स्वर्णलता ध्रुव अऊ सोनल बघेल के चयन करे गीस। वस्तुनिष्ठ प्रश्नोत्तरी प्रतियोगिता छत्तीसगढ़ के इतिहास, प्राचीन स्मारक अऊ पुरातत्व अउ संग्रहालय विसय म आयोजित करे गीस। ये मां खुशवंत ल पहिली, योगेश सोना ल दूसर अऊ नेहा मंडावी ल तीसर स्थान मिलीस। ए प्रतियोगिता म शालिनी धीवर, वैभवी साहू, छत्रपति सिंह, तनिष्क वैष्णव अऊ आयुषी वर्मा ल सांत्वना पुरस्कार घोषित करे गीस।
चित्रकला प्रतियोगिता म सीनियर वर्ग के अंतर्गत विजेता मन ल 3100 रूपिया के पहिली पुरस्कार, 2100 रूपिया के दूसर पुरस्कार अऊ 1500 रूपिया के तीसर पुरस्कार दे जाही। जूनियर वर्ग के अंतर्गत पहिली पुरस्कार के रूप म 2100 रूपिया, दूसरी पुरस्कार के रूप म 1500 रूपिया अऊ तीसर पुरस्कार म 1100 रूपिया दीए जाही। एखर अलावा सांत्वना पुरस्कार घलोक दिए जाही। वस्तुनिष्ठ प्रश्नोत्तरी प्रतियोगिता म पहिली पुरस्कार 2100 रूपिया, दूसरी पुरस्कार 1500 रूपिया अऊ तीसर पुरस्कार 1100 रूपिया के होही।

मुहाचाही:  खुमान साव के अभूतपूर्व नागरिक अभिनंदन : मधूसूदन तको पहूंचिस