Chhattisgarhi Pradesh

स्वास्थ्य मंत्री स्वैच्छिक रक्तदान करइया मनखे अउ संस्था मन ल करहीं सम्मानित

  • विश्व रक्तदाता दिवस 14 जून के दिन
  • श्री अजय चन्द्राकर ह प्रदेशवासी मन से रक्तदान करे के करिन अपील

रायपुर, 13 जून 2017। स्वास्थ्य अउ परिवार कल्याण मंत्री श्री अजय चन्द्राकर कल 14 जून के दिन विश्व रक्तदाता दिवस के अवसर म आयोजित एक कार्यक्रम म प्रदेश के रक्तदाता मन ल सम्मानित करहीं। श्री चन्द्राकर ह बताइन कि रक्तदान से कोनो प्रकार के कमजोरी नइ आवय। रक्तदान युवा साथी मन संग कोनो मनखे जेकर उमर 18 ले 65 साल के बीच होवय ओ मन रक्तदान कर सकत हावंय। आप मन के करे रक्तदान से कोनो जरूरतमंद ल नवा जीवन मिल सकत हावय। उमन प्रदेशवासी मन से स्वैच्छिक रक्तदान करे के अपील करिन। कार्यक्रम के आयोजन नवीन विश्राम भवन सिविल लाईन म करे जाही। ए अवसर स्वास्थ्य विभाग के प्रमुख सचिव स्वास्थ्य श्री सुब्रत साहू, सचिव श्री अनिल साहू, आयुक्त श्री आर. प्रसन्ना, संचालक स्वास्थ्य सेवाएं श्री नरेन्द्र शुक्ल रहिहीं।
स्वास्थ्य आयुक्त श्री प्रसन्ना ह आज इहां बताइन कि स्वास्थ्य विभाग कोति ले आयोजित कई ठन शिविर मन म रक्तदान करइया रक्तदाता मन अउ स्‍वयं सेवी संगठन जऊन स्वैच्छिक रक्तदान ल बढ़ावा देहे म सहयोग प्रदान करे हें, तउन मन ल सम्मानित करे जाही। प्रदेश म पाछू 5 बछर ले सरलग सबले जादा रक्तदान करइया धार्मिक संस्था, स्वैच्छिक संस्था, औद्योगिक संस्था, सामाजिक संस्था, विशिष्ट संस्था, सौ ले जादा बार रक्तदान करइया मनखे, 25 ले जादा बार स्वैच्छिक रक्तदान करइया महिला ल सम्मानित करे जाही। इही प्रकार अइसन रक्तदाता जेकर ब्लड ग्रुप नेगेटिव होवय अउ 25 या ओकर ले जादा बार रक्तदान करे होवय, युवा रक्तदाता 25 या जादा बार रक्तदान करे होवय, इमन ल सम्मानित करे जाही। स्वैच्छिक रक्तदान करे बर प्रेरित करे अउ सबले जादा रक्तदान संग्रहण करइया शासकीय ब्लड बैंक, निजी क्षेत्र के बल्ड बैंक संग रक्तदान ल बढ़ावा देहे के क्षेत्र म उल्लेखनीय काम करइया ल घलोक सम्मनित करे जाही।

मुहाचाही:  मुख्यमंत्री ल राष्ट्रीय सुरक्षा कोष खातिर 5.51 लाख रूपए का चेक

Leave a Reply

Your email address will not be published. Required fields are marked *