डॉ. रमन सिंह

हमर सरकार सिरिफ नारा भर नइ लगावय भलुक गरीबी के खिलाफ लड़े बर गरीब मन के मदद तको करथे: डॉ. रमन सिंह

रायपुर, 17 अप्रैल 2018। मुख्यमंत्री डॉ. रमन सिंह ह कहिन हे कि छत्तीसगढ़ सरकार सिरिफ नारा भर नइ लगावय भलुक अपन योजना मन के संग गरीबी के खिलाफ लड़े बर गरीब मन के मदद तको करथे। सरकार के योजना मन आम जनता के जीवन म बदलाव लाय बर हे अऊ सर्व समाज के बेहतरी बर हे। प्रधानमंत्री श्री नरेन्द्र मोदी ह देश म गांव, गरीब अऊ किसान मन के विकास ल सर्वोच्च प्राथमिकता देहे हे अऊ एखर बर कई योजना मन के शुरूआत करे हे।



मुख्यमंत्री काल मंझनिया सरगुजा जिला के ग्राम-बटवाही (विकासखण्ड-लुण्ड्रा) म प्रगति अऊ आवास मेला के शुभारंभ करे के बाद विशाल जनसभा ल संबोधित करत रहिन। डॉ. सिंह ह कहिन -सरकार के योजना मन ले पाछू करीबन दस बछर म सरगुजा के तस्वीर अड़बड़ बदल गए हे। पूरा सरगुजा संभाग म सड़क मन अऊ पुल-पुलिया मन के जाल बिछाए जात हे। सरगुजा विकास के ऊंचाई ल छूवत हे। उमन बटवाही म ए विशाल आयोजन के उल्लेख करत कहिन -अतका बड़ संख्या म जनता के उपस्थिति विकास योजना मन के प्रति लगातार बाढ़त जनभागीदारी के परिचायक हे। डॉ. सिंह ह कहिन- अकेल्‍ला सरगुजा संभाग म ए समय 670 करोड़ रूपिया के सड़क बनत हे। संभागीय मुख्यालय अम्बिकापुर म एयरपोर्ट निर्माण बर शासन कोति ले 23 करोड़ 53 लाख रूपिया मंजूर करे गीस, जेखर निर्माण लउहे पूरा होवइया हे। रेल अऊ रोड कनेक्टिविटी के बाद सरगुजा बहुत जल्दी विमान यातायात सेवा मन ले घलोक जुड़ जाही। डॉ. रमन सिंह ह प्रगति अऊ विकास मेला म जन प्रतिनिधि मन के आग्रह म ग्राम रघुनाथपुर म नवा बए स्टैण्ड के निर्माण, ग्राम पंचायत बटवाही, लामगांव अऊ रघुनाथपुर म सीमेंट कांक्रीट सड़क के मंजूरी देहे के घोषणा करिन। उमन बटवाही ग्राम पंचायत के नवापारा म 125 एकड़ के सिंचाई क्षमता वाले स्टॉप डेम निर्माण बर एक करोड़ 25 लाख रूपिया अऊ विकासखण्ड मुख्यालय लुण्ड्रा म सब्जी उत्पादक किसान मन बर नर्सरी निर्माण बर एक करोड़ 50 लाख रूपिया घलोक तुरंते मंजूर करे के ऐलान कर दीस।


मुहाचाही:  मुख्यमंत्री ह जनता ल दीस होली के बधाई