Chhattisgarhi Success story

हीरालाल ल सिंचाई बर मुफ्त मिले लगिस बिजली

सोलर पंप ले दूर हो गीस डीजल बिसाये के चिंता




रायपुर 15 मई 2017। प्रदेश व्यापी लोक सुराज अभियान के समय मुख्यमंत्री डॉ. रमन सिंह के घोषणा के अनुसार सरगुजा जिला के ग्राम पैगा निवासी श्री हीरालाल यादव के खेत मं सोलर सिंचाई पम्प लग जाय ले अब ओ मन ल डीजल पम्प बर डीजल बिसाये के चिंता नइ हे। मुख्यमंत्री डॉ. सिंह अपन अचानक दउरा के समय ए महीना के शुरूआत मं सरगुजा जिला के मैनपाट विकासखण्ड के ग्राम पैगा पहुंचे रहिन। ए दौरान ओ मन पैगा गांव के किसान श्री हीरालाल यादव के घर घलोक गए रहिन। ओ समय हीरालाल गेहूँ के मिसाई करत रहिस। मुख्यमंत्री के पूछे म हीरालाल हर बताए रहिस कि वो धान, गेहूँ अऊ सब्जी-भाजी के खेती करथे अऊ सिंचाई बर ओला डीजल पम्प के उपयोग करना परथे। मुख्यमंत्री हर श्री हीरालाल यादव ल सोलर पम्प देहे के घोषणा करे रहिस। मुख्यमंत्री के घोषणा म तुरंते अमल करत सरगुजा जिला प्रशासन कोति ले श्री हीरालाल के खेत मं मई के दूसरेच हफ्ता मं सोलर सरफेस पम्प लगा दे गीस। श्री हीरालाल हर बताइस कि ओखर परिवार म तीन बेटा अऊ तीन बेटी हे। तीनों बेटी मन के बिहाव हो गए हे अऊ बेटा मन खेती-बाड़ी मं ओखर मदद करथें। अंदाजन दस एकड़ खेती के जमीन मं हीरालाल रबी अऊ खरीफ के फसल लगाथे। पहिली सिंचाई बर वो ह डीजल पम्प के उपयोग करत रहिस, जेमां कुछ जादाच खरचा आत रहिस। अब मुख्यमंत्री के घोषणा के बाद ओला तीन हार्स पॉवर के 3 लाख 50 हजार रूपया के लागत वाले सोलर सरफेस पम्प सिरिफ 10 हजार रूपये मं देहे गए हे। सोलर सिंचाई पम्प लग जाय ले श्री हीरालाल अब धान अऊ गेहूं के फसल के संग आलू, गोभी, भटा, बरबट्टी, मिर्ची, लाल भाजी, पालक, लौकी आदि के खेती करना शुरू कर देहे हे। ओखर पत्नी बचिया बाई के आंखी मं लइका मन के अच्छा भविष्य के सपना घूने लगे हे। हीरालाल के कुटुंब शासन के सोलर सुजला योजना के तहत सोलर सिंचाई पम्प मिले ले अड़बड़ खुश हे।

मुहाचाही:  कृषक परमानंद हर लीस शासकीय योजना मन के लाभ