छत्तीसगढ़ म होही ‘पंजाबी अकादमी‘ के स्थापना : डॉ. रमन सिंह

गुरू गोविन्द सिंह के 350 वां प्रकाश पर्व के अवसर म आयोजित समारोह म करिन घोषणा


रायपुर, 17 दिसम्बर 2016। मुख्यमंत्री डॉं. रमन सिंह ह आज संझां रैपुर के राष्ट्रीय सिक्ख संगत के छत्तीसगढ़ इकाई द्वारा गुरू गोविन्द सिंह जी के 350 वां प्रकाश पर्व के अवसर म आयोजित समारोह ल सम्बोधित करत कहिन के छत्तीसगढ़ म ‘पंजाबी अकादमी‘ के स्थापना करे जाही। मुख्यमंत्री ह कहिन के अवईया बछर राज्य सरकार के बजट म एकर खातिर प्रावधान करे जाही। उमन पटना साहिब म अवईया 5 जनवरी को गुरू गोविन्द सिंह जी के 350 वां प्रकाश पर्व के अवसर म आयोजित होवईया समारोह म छत्तीसगढ़ ले जवईया श्रद्धालु मन खातिर निःशुल्क तीर्थ यात्री ट्रेन भेजे के घोषणा घलव करिन। मुख्यमंत्री ह कहिन के ये तीर्थ यात्री ट्रेन बर राज्य सरकार कोति ले जमो इंतजाम करे जाही। मुख्यमंत्री ह समारोह म गुरू गोविन्द सिंह सहित सिक्ख गुरू मन द्वारा देश, संस्कृति, समाज अउ धर्म के रक्षा खातिर दिए बलिदान मन ल सुरता करत उमन ल नमन करिन। पंडरी के खालसा स्कूल म आयोजित ये कार्यक्रम के अध्यक्षता छत्तीसगढ़ ओलम्पिक संघ के महासचिव बलदेव सिंह भाटिया ह करिन।

मुख्यमंत्री ह ये अवसर म कहिन के दुनिया के इतिहास म देश, समाज अउ संस्कृति के रक्षा खातिर सिक्ख गुरू मन के द्वारा दिए गए बलिदान जइसे कोनो दूसर मिसाल नइ हे। सिक्ख गुरू मन के बलिदान हम सबके खातिर प्रेरणादायक हे। उमन कहिन कि गुरू गोविन्द सिंह धार्मिक गुरू के संगे-संग एक योद्धा अउ कवि घलव रहिन। उमन खालसा पंथ के स्थापना करिन अउ पंथ के मार्ग दर्शन करत येकर गौरव अउ सम्मान स्थापित करिन। मुख्यमंत्री ह ये समय म ‘संगत संसार‘ छत्तीसगढ़ के विशेषांक के विमोचन घलव करिन। आयोजक मन द्वारा समारोह म मुख्यमंत्री के अभिनंदन करे गीस। ये अवसर म विधायक श्रीचंद सुन्दरानी, छत्तीसगढ़ राज्य अल्पसंख्यक आयोग के अध्यक्ष सुरेन्द्र सिंह केम्बो, छत्तीसगढ़ हिन्दी ग्रंथ अकादमी के पूर्व संचालक रमेश नैय्यर अउ राष्ट्रीय सिक्ख संगत महासचिव अविनाश जयसवाल सहित स्वर्ण सिंह केम्बो, कैलाश जी, सुनील डोंगरे, इंदरवीर सिंह बत्रा, डॉ. पूर्णेन्दू सक्सेना अउ दीपक शामिल रहिन।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment