राजिम महाकुंभ कल्प 10 फरवरी ले






त्रिवेणी संगम म लक्ष्मण झूला

राजिम महाकुंभ कल्प 10 फरवरी ले 24 फरवरी तक



रायपुर, 05 जनवरी 2017। धार्मिक न्यास और धर्मस्व मंत्री बृजमोहन अग्रवाल ह काली रतिहा छत्तीसगढ़ के प्रसिद्ध तीर्थ राजिम म माघी पून्‍नी ले महाशिवरात्रि तक आयोजित होवईया राजिम महाकुंभ कल्प के तैयारी के समीक्षा करिन। राजिम महाकुंभ 10 फरवरी माघ पून्‍नी ले शुरू होही अउ महाशिवरात्रि के दिन 24 फरवरी को एकर समापन होही।


राज्य शासन कोति ले महानदी, पैरी अउ सोंढूर नदी मन के पवित्र संगम म राजिम के पुरखौती मेला ल सन् 2005 ले कुंभ के रूप म आयोजित करे जात रहिस हे। ये आयोजन के बारा बछर येसाल पूरा होवत हे। येला सुरता राखत इंहा सालाना मेला महाकुंभ कल्प के रूप म मनाये के निर्णय लेहे गए हे। धार्मिक न्यास एवं धर्मस्व मंत्री अग्रवाल ह आयोजन स्थल के दौरा घलव करिन अउ राजीव लोचन मंदिर परिसर के तीर संबंधित अधिकारी अउ जनप्रतिनिधी मन के बैठक लीन। अग्रवाल ह बैठक म कहिन के राजिम के त्रिवेणी संगम म कुंभ आयोजन के ये बारवां बछर आए। ये खातिर ये साल महाकुंभ के भव्य स्वरूप म आयोजन होही। अग्रवाल ह कहिन कि राज्य सरकार ह राजिम कुंभ ल संत-महात्मा मन के भावना के अनुरूप कल्प के नाम घलव देहे हे। उमन कहिन के शासकीय विभाग, जनप्रति अउ आम नागरिक मन के सहयोग ले ये साल के आयोजन ल अउ अच्‍छा बनाना हे। उमन बताइन के राज्य सरकार ह त्रिवेणी संगम म लक्ष्मण झूला बनाए खातिर 25 करोड़ रूपया के मंजूरी देहे हे। आगू बछर त्रिवेणी संगम म कुलेश्वर मंदिर ले लोमश ऋषि आश्रम अउ लोमश ऋषि आश्रम ले राजीव लोचन मंदिर परिसर के तीर तक नदिया म सीमेंट कांक्रीट के सड़क बनही। एकर खातिर घलव राज्य सरकार ह 25 करोड़ रूपया पास करे हे।









धार्मिक न्यास मंत्री बृजमोहन अग्रवाल के अध्यक्षता म जनप्रतिनिधी अउ अधिकारी मन के बैठक के संगें-संग तैयारी मन के समीक्षा




बैठक म पर्यटन एवं संस्कृति मंत्री दयालदास बघेल, महिला एवं बाल विकास मंत्री अउ गरियाबंद जिला के प्रभारी मंत्री श्रीमती रमशिला साहू, संसदीय सचिव तोखन लाल साहू, संसदीय सचिव गोवर्धन मांझी, अपेक्स बैंक के अध्यक्ष अशोक बजाज, राजिम विधायक संतोष उपाध्याय, जिला पंचायत गरियाबंद के अध्यक्ष श्रीमती श्वेता शर्मा संग स्थानीय जनप्रतिनिधि मन उपस्थित रहिन। इंखर अलावा रायपुर संभाग के कमिश्नर बृजेश चंद्र मिश्रा, कलेक्टर रायपुर ओ.पी. चौधरी, कलेक्टर गरियाबंद श्रीमती श्रुति सिंह, कलेक्टर धमतरी सी.आर. प्रसन्ना अउ रायपुर, महासमुन्द, धमतरी अउ गरियाबंद जिला के वरिष्ठ पुलिस अधिकारी अउ संबंधित विभाग मन के वरिष्ठ अधिकारी घलव बैठक म संघरिन।


धार्मिक न्यास मंत्री अग्रवाल ह कहिन के राजिम कुंभ के बारा बछर होए के सेती ये साल भव्य रूप म आयोजन करे जाही। जेमा विश्व प्रसिद्ध संत-महात्मा मन के प्रवचन होही। महाकुंभ के आयोजन ल देखत हर विभाग ल पाछू बछर ले 25 परसेंट जादा अच्‍छा व्यवस्था सुनिश्चित करना होही। अग्रवाल ह लोक निर्माण विभाग, वन विभाग, लोक स्वास्थ्य यांत्रिकी विभाग, पुलिस विभाग, खाद्य विभाग, स्वास्थ्य विभाग, परिवहन, संस्कृति, पर्यटन, विद्युत विभाग, जल संसाधन विभाग के अधिकारी मन से महाकुंभ के प्रस्तावित तैयारी मन के जानकारी घलव लीन। अग्रवाल ह कहिन के मेला म साफ-सफाई, सुरक्षा, पेयजल, यातायात व्यवस्था, चिकित्सा सुविधा खातिर विशेष ध्यान देहे के जरूरत हावय। उमन राजिम कोती अवईया अउ जवईया चारो मुड़ा के सड़क मन के मरम्मत करे के आदेस दीन। एकर संगें-संग मेले के दौरान राजिम नवापारा के जमो मंदिर मन अउ संगम के तीनों पुल म अंजोर के सही व्यवस्था करे ल कहिन।


अग्रवाल ह विश्व प्रसिद्ध साधु-संत मन के आगमन ल ध्‍यान म रखत संत-समागम स्थल अउ मुख्य मंच म अउ जादा सुविधा वाले व्यवस्था करे के आदेस दीन। उमन कहिन के जमो विभाग के तैयारी हर हाल म 30 जनवरी तक पूरा हो जाना चाहिए। उमन त्रिवेणी संगम के खाल्‍हे बने एनीकट के साफ-सफाई करे के तको आदेस दीन। उमन बैठक के पाछू मुख्य मंच के निर्माण कार्य के जायजा तको लीन। संस्कृति मंत्री दयालदास बघेल अउ महिला एवं बाल विकास मंत्री श्रीमती रमशिला साहू ह बैठक में कहिन के राजिम कुंभ के कारन छत्तीसगढ़ के प्रसिद्धी देश-दुनिया म फैले हे। बारवां बछर के आयोजन ल अउ जादा भव्य बनाए खातिर सब के सहयोग के जरूरत हावय। बैठक के आखरी म राजिम विधायक संतोष उपाध्याय ह आभार व्यक्त करिन।

Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

1 comments:

  1. C gari bhasa me apka karya behad prasnsniya he.

    ReplyDelete