सुघ्‍घर रैली अउ रींगी-चींगी नाच संग राज्य स्तरीय युवा उत्सव सुरू

जमो 27 जिला के साढ़े ग्यारह सौ जवान संघराईन







बेलासपुर, 06 जनवरी 2017। प्रदेश सरकार के खेल अउ युवा कल्याण विभाग कोति ले आयोजित 17वां तीन दीन के प्रदेश स्तरीय युवा उत्सव सुरू हो गए हे। खेल अउ युवा कल्याण मंत्री भईयालाल राजवाड़े, लोक सभा सांसद लखन लाल साहू अउ राज्य युवा आयोग के अध्यक्ष कमल चंद्र भंजदेव के विशेष उपस्थिति म मुख्य अतिथि पूर्व विधानसभा अध्यक्ष धरमलाल कौशिक ह आयोजन के शुभारंभ करिन। जिला मुख्यालय बिलासपुर के बहतराई म आउटडोर स्टेडियम म चलत ये आयोजन म छत्तीसगढ़ के जमो 27 जिला के एक हजार 154 युवा प्रतिभागी 18 आन-आन सांस्कृतिक प्रतियोगिता मन म भाग लेवत हें। शुभारंभ समारोह म रंगारंग लोकनृत्य के संग प्रतिभागी मन रिंगी-चींगी कुरथ-कपड़ा म सुघ्‍घर रैली निकालीन।


इमन लोकनृत्य अउ लोकगीत के संगें-संग शास्त्रीय गायन, सितार वादन, बांसुरी, तबला, मृदंगम, हार्मोनियम, गिटार आदि वाद्य यंत्र मन म घलव अपन कला प्रतिभा के प्रदर्शन करत हें। छत्तीसगढ़ी लोकनृत्य के संग मणिपुरी, ओड़िशी, भरतनाट्यम, कथक, कुचिपुड़ी नृत्य अउ नाटक के घलव छत्तीसगढ़ के युवा मन मंचन करत हें। येमा चुने युवा मन ल रोहतक (हरियाणा) म होवईया राष्ट्रीय युवा उत्सव म संघरे के मौका मिलही। राष्ट्रीय युवा उत्सव 12 जनवरी को स्वामी विवेकानंद के जयंती के समय म आयोजित करे जाही। राज्य स्तरीय युवा उत्सव के सुरूवात करत माई पहुना धरमलाल कौशिक ह कहिन के ये प्रकार के आयोजनों ले युवा मन के रचनात्मक प्रतिभा ल प्रोत्साहन मिलथे।







कौशिक ह स्वामी विवेकानंद के व्यक्तित्व अउ कृतित्व के उल्लेख करत उमन ल युवा मन के प्रेरणास्त्रोत बताइन। खेल अउ युवा कल्याण मंत्री भईयालाल राजवाड़े ह कहिन के युवा पीढ़ी हमार संस्कृति अउ परम्परा के सम्वाहक आंय। उमन आघू कहिन के राज्य स्तरीय युवा उत्सव म प्रदेश के आन-आन जिला के युवा एक-दूसर के जिला के बारे म बने जान समझ पाहीं। प्रदेश सरकार के मन हवय के युवा मन ल, अपन दबे सृजनात्मक प्रतिभा ल आघू लाए के मौका मिलय। इही उद्देश्य ले ये आयोजन हर बछर करे जाथे। शुभारंभ समारोह ल छत्तीसगढ़ राज्य युवा आयोग के अध्यक्ष कमलचंद्र भंजदेव, लोक सभा सांसद लखन लाल साहू, खेल अउ युवा कल्याण विभाग के सचिव सोनमणि बोरा अउ कलेक्टर बिलासपुर अन्बलगन पी. ह घलव सम्बोधित करिन। खेल अउ युवा कल्याण विभाग के सचिव सोनमणि बोरा ह बताईन के राज्य स्तरीय युवा उत्सव म चुने गए युवा मन ल रोहतक म होवइया राष्ट्रीय युवा उत्सव म भेजे खातिर विशेष रेल के व्यवस्था करे जावत हे।


युवा उत्सव के शुभारंभ समारोह म आयोजित रैली म जशपुर जिला ल पहिली इनाम मिलिस। उहां के टीम ल दस हजार रूपए के पुरस्कार देहे गईस। साढ़े सात हजार रूपया के दूसरा दनाम दंतेवाड़ा के टीम ल अउ पांच हजार रूपया के तीसरा पुरस्कार मुंगेली जिला के टीम ल मिलिस। शुभारंभ समारोह म नगर निगम बिलासपुर के महापौर किशोर राय, राज्य युवा आयोग के सदस्य, संभागीय कमिश्नर श्रीमती निहारिका बारिक सिंह अउ आन वरिष्ठ अधिकारी अउ बहुत झन जनप्रतिनिधि, प्रबुद्ध नागरिक मन उपस्थित रहिन।





Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment