मुख्यमंत्री हर सुनीस आम जनता के समस्या





एटम नदी म आठ बछर ले अधूरा पुल जल्दी होही पूरा : डॉ. रमन सिंह
केला उत्पादक किसान मन करिन जादा उत्पादकता वाले पौधा देवाए के गिलौली
संजीवनी कोष ले गंभीर बीमारी ले पीड़ित 19 मरीज मन ल मिलही आर्थिक सहायता


रायपुर, 02 फरवरी 2017। मुख्यमंत्री डॉ. रमन सिंह ह सूरजपुर जिला के प्रेमनगर विकासखण्ड के चंदन नगर-सलका मार्गम एटम नदी म आठ बछर ले अधूरा परे पुल के निर्माण जल्दी पूरा कराए के आश्वासन क्षेत्र के ग्रामीण मन ल दीन। डॉ. सिंह आज बिहनिया इहां अपन निवास म आम जनता ले मुलाकात के कार्यक्रम ‘जनदर्शन’ म लोगन के समस्या सुनत रहिन। ए दौरान ग्राम सलका ले आये ग्रामीण मन के प्रतिनिधि मण्डल हर उंखर ले मुलाकात करके ए आधा बने पुल ले ग्रामीण मन ल होवत दिक्कत मन के बारे म बताईन। मुख्यमंत्री ह प्रतिनिधि मण्डल के बात सहानुभूतिपूर्वक सुनिन अउ उमन ए संबंध म लोक निर्माण विभाग के सचिव ल ए प्रकरण के परीक्षण कर जरूरी कार्रवाई करे के निर्देश दीन। संसदीय सचिव श्री मोतीराम चंद्रवंशी घलोक ए अवसर म उपस्थित रहिन।


कबीरधाम जिला के लोहारा विकासखण्ड के ग्राम बिसाटोला ले आये केला उत्पादक किसान मन के प्रतिनिधि मण्डल हर मुख्यमंत्री ले टिश्यू कल्चर ले तैयार अधिक उत्पादकता वाले केला के पौधा अनुदान म देवाए के गिलौली करिस। प्रतिनिधि मण्डल हर मुख्यमंत्री ल बताइस कि अच्छा गुणवत्ता वाले अइसन पौधा आसानी ले मिलथे। प्रतिनिधि मण्डल हर मुख्यमंत्री ल बताइस के अच्छा गुणवत्ता वाले एक पौधा म अंदाजन 50 ले 60 किलो केला होथे। प्रति किलो 16 रुपए के दर ले केला बाजार म बेंचावत हे। उमन बताइन कि केले के उत्पादन म प्रति एकड़ दो ले ढाई लाख रुपए तक के शुद्ध मुनाफा होथे। मुख्यमंत्री हर किसानों के मांग के परीक्षण कराके ए संबंध म समुचित कार्रवाई के आश्वासन दीन।






महासमुंद जिला के पिथौरा विकासखण्ड स्थित आदर्श ग्राम अरंड ले आये ग्रामीण मन के प्रतिनिधि मण्डल हर मुख्यमंत्री ले गांव म हाई स्कूल चालू कराए के आग्रह करिस। उमन मुख्यमंत्री ल बताइन कि गांव म साल 1914 म प्राथमिक शाला, साल 1984 म पूर्व माध्यमिक शाला अऊ साल 2002-03 म जनभागीदारी समिति ले हाई स्कूल चालू करे गए रहिस, जऊन साल 2008-09 म बंद हो गे। प्रतिनिधि मण्डल हर मुख्यमंत्री ल बताइस कि यदि अरंड म हाई स्कूल चालू होथे, तो एखर ले आस-पास के गांव के लइका घलोक लाभान्वित होही। मुख्यमंत्री हर स्कूल शिक्षामत्री ल प्रतिनिधि मण्डल के आवेदन के परीक्षण कर जरूरी कार्रवाई के निर्देश जारी करे हावे। मुख्यमंत्री ले ए दौरान बहुत अकन मरीज मन मुलाकात करके इलाज बर आर्थिक सहायता देवाए के मांग करिन। मुख्यमंत्री हर गंभीर बीमारियों ले पीड़ित 19 मरीज मन ल संजीवनी कोष ले आर्थिक सहायता प्रदान करे के स्वीकृति प्रदान करिन। ऊंखर निर्देश म 21 मरीज मन ल निःशुल्क इलाज बर रायपुर स्थित डॉ. अंबेडकर अस्पताल भेजे गीस। मेडिकल कॉलेज के जनदर्शन म लगाए गए स्टॉल म 46 लोगन के रक्त परीक्षण करके मधुमेह अऊ सिकलिंग के जांच करे गीस।


मुख्यमंत्री हर ए अवसर म छत्तीसगढ़ मैदानी स्वास्थ्य कर्मचारी संघ के साल 2017 के कैलेण्डर के विमोचन घलोक करिन। कर्मचारी संघ के प्रांताध्यक्ष श्री चंद्रभूषण कुर्रे अऊ महामंत्री श्री मुन्नालाल निर्मलकर घलोक ए अवसर म उपस्थित रहिन। गरियाबंद जनपद पंचायत के सदस्य श्री गेंदलाल साहू हर मुख्यमंत्री ले मुलाकात करके ओ मन ल बताइसन कि ग्राम किरवई म महिला अउर बाल विकास विभाग ले झूला घर संचालित करे जात हे, ये वाले झूला घर एक जनवरी 2017 ले बंद कर दे गए हे। उमन ए झूला घर ल फेर चालू कराए के आग्रह करिन। मुख्यमंत्री हर महिला अउर बाल विकास विभाग के सचिव ल ऊंखर आवेदन के परीक्षण करके जरूरी कार्रवाई के निर्देश दीन। दुर्ग जिला के पाटन विकासखण्ड के बठेना गांव ले आये ढीमर अउर केवट समाज के लोगन मन बठेना म सामुदायिक भवन के निर्माण करे के आग्रह मुख्यमंत्री ले करिन। मुख्यमंत्री हर सामुदायिक भवन के निर्माण बर प्राधिकरण मद ले तुरते चार लाख रुपया के मंजूरी दिहीन।





Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment