गड़बड़ी के ताक म ताकत मनखे मन ल मुख्यमंत्री के चेतावनी

गरीब मन के आवास योजना म कोनो कांटा मारे के मत करहू कोसिस : डॉ. रमन सिंह
डॉ. सिंह ह कहिन कि गर्मी म जितका गरमी बढ़ही, ओतके मोर गांव कोती के बुलई बाढ़ही
बड़का स्वास्थ्य शिविर म संघरिन मुख्यमंत्री : चिन्हांकित मरीज मन ल जिहां जरूरी होही, सरकार उन्‍हें करवाही उंखर पूरा इलाज
प्रधानमंत्री आवास योजना म दस हजार परिवार मन ल 148 करोड़ के मकान मन के स्वीकृति पत्र
मुख्यमंत्री हर करिस ऐलान : कोतरा रोड म बनही रेल्वे ओव्हर ब्रिज, मंगल भवन बर दो करोड़ रूपया

रायपुर, 13 फरवरी 2017। मुख्यमंत्री डॉ. रमन सिंह हर आज मंझनिया जिला मुख्यालय रायगढ़ मं पूर्व सांसद स्वर्गीय श्री लखीराम अग्रवाल के 85वीं जयंती के अवसर म आयोजित विशाल स्वास्थ्य शिविर मं सामिल होइन। डॉ. सिंह हर ए मौका म मुख्यमंत्री कन्या विवाह योजना के तहत आयोजित सामूहिक विवाह समारोह मं 134 जोड़ा मन ल आशीर्वाद प्रदान करिन। उमन मिनी स्टेडियम मं होए ए कार्यक्रम म 66 करोड़ 62 लाख रूपया के 101 निर्माण कार्य मन के भूमिपूजन, शिलान्यास अऊ लोकार्पण घलोक करिन। उमन रायगढ़ शहर के कोतरा रोड म रेल्वे ओव्हर ब्रिज निर्माण के स्वीकृति प्रदान करे के घोषणा करिन अऊ शहर म सार्वजनिक मंगल भवन निर्माण बर दो करोड़ रूपया मंजूर करे के घलोक ऐलान करिन। मुख्यमंत्री हर कहिन सरकार हर जम्‍मो वर्ग मन बर योजना बनाए हे। उमन प्रधानमंत्री श्री नरेन्द्र मोदी के स्वच्छ भारत मिशन के उल्लेख करत करत रायगढ़ जिला के जनता ले पूरा जिला ल दिसम्बर 2017 तक खुले मं शौचमुक्त (ओडीएफ) जिला बनाए के घलोक आव्हान करिन।


डॉ. सिंह हर आयोजन म प्रधानमंत्री (ग्रामीण) आवास योजना के तहत जिला के दस हजार परिवार ल मकान स्वीकृति पत्र के घलोक वितरण करिन। डॉ. सिंह ह कहिन कि अंदाजन 148 करोड़ रूपया ए मकान मन के निर्माण म खर्च होही। हितग्राही मन ल राशि के भुगतान ऑनलाइन करे जाही। उमन प्रशासन ल ये सुनिश्चित करे के निर्देश दीन कि योजना म कोनो प्रकार के गड़बड़ी नइ होना चाही। मुख्यमंत्री हर कहिन के चुने गए परिवार मन ल शत-प्रतिशत राशि ऑनलाइन दे जाही। डॉ. सिंह हर संभावित गड़बड़ी के फिराक म लगे मनखे ल चेतावनी देवत कहिन कि ये प्रधानमंत्री के योजना आए। गरीब मन बर शुरू करे गए ए योजना मं कोनो कांटा मारे के कोनो उदीम मत करहू। जउन करही तेखर खिलाफ कड़ा कार्रवाई करे जाही। उमन बताइय कि प्रधानमंत्री (ग्रामीण) आवास योजना के तहत छत्तीसगढ़ म ए साल दू लाख परिवार मन ल मकान देहे जाही। डॉ. सिंह हर लोक सुराज अभियान फिर से शुरू करे के संकेत देवत कहिन कि जतका जतका गरमी बाढ़ही, मैं ओतके जनता मेर गांव गांव जाहूं अउ संग म अधिकारी-कर्मचारी, जनप्रतिनिधि सबला चलना परही।






मुख्य अतिथि के आसंदी ले विशाल स्वास्थ्य शिविर म जनता ल सम्बोधित करत करत डॉ. रमन सिंह हर कहिन के केवल सड़क अऊ पुल-पुलिया निर्माण ही नइ, बल्कि स्वस्थ पीढ़ी के निर्माण अऊ जनता ल बेहतर स्वास्थ्य सेवा दिलाना घलोक सरकार के सबसे बड़े जिम्मेदारी हे। उमन कहिन कि मोला सबले जादा तसल्ली अइसन स्वास्थ्य शिविर मन मं होथे, जिहां गरीब मन ल जटिल ले जटिल बीमारी के इलाज बर मदद मिलथे। डॉ. सिंह हर जिला स्तर के ए शिविर म 13 हजार ले जादा मरीज मन ल चिन्हांकित करके अऊ ऊंखर खातिर इलाज के समुचित व्यवस्था करइ ल देख के खुशी जताईन।


डॉ. सिंह हर कहिन कि राज्य सरकार के मंशा हे कि छत्तीसगढ़ के हर एक कुटुंब ल वक्त जरूरत म इलाज के अच्छा सुविधा मिले। लगभग आठ साल पहिली जब मोला ये पता चलिस कि हजारों लइका दिल मं छेद होए के कारन बीमार हें अऊ परिवार के गरीबी के कारन उंखर इलाज नइ हो पावत हे, उही दिन हम तय करेन के अइसन नइका मन के इलाज सरकार करवाही अऊ मुख्यमंत्री बाल हृदय सुरक्षा योजना के शुरूआत करे गीस। डॉ. सिंह ह कहिन कि करोड़ों रूपया के पुल के उद्घाटन करे म जतना खुशी होथे, ओखर ले कहूं जादा खुशी मोला उन लइका अऊ ऊंखर माता-पिता के आंखी मं चमक देखके होथे, जउन मन ल ए योजना के लाभ मिलथे। डॉ. सिंह हर कहिन अइसन योजना सुकून देहे वाला होथे इंखर वोट के राजनीति ले कोनो लेना-देना नइ रहे। डॉ. सिंह हर कहिन कि रायगढ़ के ए विशाल स्वास्थ्य शिविर म जतेक मरीज मन के स्क्रीनिंग करे गए हावे, ऊंखर इलाज के पूरा इंतजाम करे जाही, चाहे रायगढ़ या रायपुर म ऑपरेशन करवाना हो या दिल्ली, जहां जरूरत होही उहां उंखर पूरा इलाज सरकार करवाही।






डॉ. रमन सिंह हर कहिन राज्य सरकार स्वास्थ्य बीमा योजना म स्मार्ट कार्ड के राशि तीस हजार रूपया ले बढ़ाके पचास हजार रूपया करत हे। उमन कहिन- जऊन लोगन स्मार्ट कार्ड नइ बनवाए हे, ओ मन जल्दी बनवा लेवव। डॉ. सिंह हर ड्रायवर मन के आंखी के जांच के जरूरत के घलोक बल दीन। उमन कहिन कि अधिकांश ड्रायवर मन ल पताच नइ रहय के ओ मन ल चश्मा के जरूरत हावे। कई वाहन चालक मधुमेह, हृदय रोग आदि ले पीड़ित रहिथें, फेर अपन काम-काज म व्यस्त रहे के कारण ओ मन ल एखर पता नइ चल पावय। वाहन चालक मन के घलोक फिटनेस टेस्ट नियिमत रूप से होत रहना चाही। डॉ. सिंह हर मुख्यमंत्री कन्या विवाह योजना ल घलोक एक बहुत महत्वपूर्ण योजना बताइन अऊ कहिन कि ए योजना ले गरीब परिवार के बेटी मन के हाथ पिंवरा होए म ऊंखर माता-पिता अऊ परिवार के चेहरा म जऊन खुशी दिखथे, एक बाप होए के नाते मैं सोचथंव कि एखर ले बढि़या काम अऊ कुछु नइ हो सकय।


मुख्यमंत्री हर प्रसन्नता प्रकट करत करत कहिन कि रायगढ़ जिला मं पाछू कुछ बछर मं विकास के बहुत अकन काम होए हे। जिला मं लगभग दो हजार ले तीन हजार करोड़ रूपया के लागत ले सड़क मन के जाल बिछाए के काम तेजी ले होवत हे। हम सबके प्रिय नेता स्वर्गीय श्री लखीराम अग्र्रवाल के स्मृति मं इहां स्थापित मेडिकल कॉलेज जिला के विकास यात्रा मं मील के पत्थर साबित होय हे। स्वर्गीय श्री अग्रवाल हर संयुक्त मध्यप्रदेश के समय राष्ट्रीय स्तर म छत्तीसगढ़ के प्रतिनिधित्व करिन। उमन राज्य निर्माण बर घलोक दिल्ली मं अवाज उठाईन।


मुख्यमंत्री हर आघू कहिन कि अवइया डेढ़ साल के भीतर रायगढ़ जिला के शत-प्रतिशत गांव, मजरा-टोला मन म बिजली पहुंचा दे जाही। मुख्यमंत्री हर सौर सुजला योजना के उल्लेख करत करत कहिन कि ए योजना म किसान मन ल काफी कम कीमत म सोलर सिंचाई पम्प दे जात हे। डॉ. सिंह हर कहिन कि गरीब मन के जीवन म बदलाव लाय, ओखर जीवन स्तर ऊंचा उठाए बर छत्तीसगढ़ मं कई योजना मन के जन्म होय हावे। गरीब मन बर एक रूपया किलो चावल के हमर योजना आज पूरा देश बर मॉडल बन गे हावे। डॉ. सिंह हर प्रधानमंत्री उज्ज्वला योजना के उल्लेख करत करत कहिन कि प्रधानमंत्री श्री मोदी हर देश के पांच करोड़ गरीब परिवार मन के महिला मन ल रंधनी कुरिया म धुंवा ले होवइया परेशानी ल देखत ओ मन ल गैस कनेक्शन दे बर एखर योजना के शुरूआत करे हावे। छत्तीसगढ़ मं योजना के तहत 35 लाख परिवार ल निःशुल्क रसोई गैस कनेक्शन देहे जात हे। विशाल स्वास्थ्य शिविर के आयोजन बर मुख्यमंत्री ह जनप्रतिनिधी मन, समाज सेवी संगठन अऊ जिला प्रशासन के जम्‍मो अधिकारी अउ कर्मचारी मन के योगदान के प्रशंसा करिन। कार्यक्रम म केन्द्रीय इस्पात राज्य मंत्री अऊ रायगढ़ के लोकसभा सांसद श्री विष्णुदेव सांय, छत्तीसगढ़ के गृह, जेल अऊ लोक स्वास्थ्य यांत्रिकी मंत्री श्री रामसेवक पैकरा, नगरीय प्रशासन अऊ उद्योग मंत्री श्री अमर अग्रवाल, संसदीय सचिव श्रीमती सुनीति राठिया, रायगढ के विधायक श्री रोशन लाल अग्रवाल, सारंगढ़ के विधायक श्रीमती केराबाई मनहर अऊ जिला के कई क्षेत्र के बहुत अकन वरिष्ठ जनप्रतिनिधि घलोक उपस्थित रहिन।






मुख्यमंत्री डॉ. रमन सिंह हर आज मंझनिया जिला मुख्यालय रायगढ़ मं आयोजित कार्यक्रम मं आदिवासी विकासखंड लैलूंगा, तमनार अऊ धरमजयगढ़ अऊ घरघोड़ा के विशेष पिछड़ी जनजाति बिरहोर के 243 हितग्राही मन ल 11 सूत्रीय कार्यक्रम के तहत रेडियो अऊ छाता प्रदान करिन...

रायपुर, 13 फरवरी 2017। मुख्यमंत्री डॉ. रमन सिंह हर आज मंझनिया जिला मुख्यालय रायगढ़ मं आयोजित कार्यक्रम मं आदिवासी विकासखंड लैलूंगा, तमनार अऊ धरमजयगढ़ अऊ घरघोड़ा के विशेष पिछड़ी जनजाति बिरहोर के 243 हितग्राही मन ल 11 सूत्रीय कार्यक्रम के तहत रेडियो अऊ छाता प्रदान करिन। मुख्यमंत्री के संग कार्यक्रम मं केन्द्रीय इस्पात राज्य मंत्री अऊ रायगढ़ के लोकसभा सांसद श्री विष्णदेव साय, प्रदेश के गृह, जेल अऊ लोक स्वास्थ्य यांत्रिकी मंत्री श्री रामसेवक पैकरा, नगरीय प्रशासन अऊ विकास मंत्री श्री अमर अग्रवाल, संसदीय सचिव श्रीमती सुनीति राठिया अऊ रायगढ़ विधायक श्री रोशन लाल अग्रवाल सहित बहुत अकन जनप्रतिनिधि सामिल होइन।






मुख्यमंत्री डॉ. रमन सिंह हर आज मंझनिया जिला मुख्यालय रायगढ़ मं आयोजित कार्यक्रम मं जिला प्रशासन रायगढ़ से नोनी सुरक्षा योजना म केन्द्रित ‘लाडली नोनी’ पुस्तिका के विमोचन करिन...

रायपुर, 13 फरवरी 2017। मुख्यमंत्री डॉ. रमन सिंह हर आज मंझनिया जिला मुख्यालय रायगढ़ मं आयोजित कार्यक्रम मं जिला प्रशासन रायगढ़ ले नोनी सुरक्षा योजना म केन्द्रित ‘लाडली नोनी’ पुस्तिका के विमोचन करिन। पुस्तिका मं रायगढ़ जिला मं लिंगानुपात मं सुधार बर करे गए उदीम अउ उपलब्‍धी मन के जानकारी हवय। ए पुस्तिका के अनुसार जिला प्रशासन कोति ले करे विशेष प्रयास के फलस्वरूप जिला मं लिंगानुपात पहिली 1000:917 ( 1000 पुरूष-917 महिला ) रहीस, जऊन अब बढ़के 1000:934 हो गए हे। ए मौका म केन्द्रीय इस्पात राज्य मंत्री अऊ रायगढ़ के लोकसभा सांसद श्री विष्णदेव साय, प्रदेश के गृह, जेल अऊ लोक स्वास्थ्य यांत्रिकी मंत्री श्री रामसेवक पैकरा, नगरीय प्रशासन अऊ विकास मंत्री श्री अमर अग्रवाल, संसदीय सचिव श्रीमती सुनीति राठिया अऊ रायगढ़ विधायक श्री रोशन लाल अग्रवाल सहित बहुत अकन जनप्रतिनिधि घलोक पुस्तिका विमोचन कार्यक्रम मं सामिल रहिन।





Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment