सवाल पूछे मं छत्तीसगढ़ के सुस्त विधायक

हम अपन नेता ल ये खातिर वोट देके चुनथन के वो ह संसद, विधानसभा या निगम के सदन मं हमर हित मं सवाल-जवाब करे। फेर छत्तीसगढ़ मं दर्जनभर विधायक अइसन हें जेमन विधानसभा म सवाल-जवाब करे म ओत करथें।

पाछू पांच सत्र ले सदन मं जनता के हित म सरकार ले सवाल नई पुछैया विधायक मन म सबसे जादा बीजेपी के विधायक हावे. कांग्रेस के घलो दू विधायक हावे जेमन पाछू दू सत्र मं क्षेत्र के जनता के समस्या ल लेकर कोनो सवाल नइ करे हें। 

मिले खबर के मुताबिक एमा बेलतरा से भाजपा विधायक बद्रीधर दीवान, एंग्लो इंडियन समुदाय के नामांकित सदस्य रोड्रिग्स बर्नाड, पंडरिया से भाजपा विधायक मोतीराम चंद्रवंशी, पत्थल गांव से भाजपा विधायक शिवशंकर पैकरा, लोरमी से भाजपा विधायक तोखन साहू, पामगढ़ से भाजपा विधायक अंबेश जांगड़े, कटघोरा से भाजपा विधायक लखन देवांगन, साजा से भाजपा विधायक लाभचंद बाफना, बसना से भाजपा विधायक रूप कुमारी चौधरी, लैलूंगा से भाजपा सुनीता सत्यानंद राठिया के नाम हवय।

कुछ विधायक अईसे घलव हें जऊन सुस्त रहे हें, अंतागढ़ के भाजपा विधायक भोजराज नाग हर दिसंबर, 2015, मार्च 2016 मं कोनो सवाल नइ करिन। ओखर बाद जुलाई 2016 मं 8 सवाल लगाइन, नवंबर, 2016 मं क्षेत्र के अवाज नइ उठाईन। आपमन जानते होहू कि अंतागढ़ सबसे जादा नक्सल प्रभावित क्षेत्र हे। कुनकुरी ले भाजपा विधायक रोहित कुमार साय हर जुलाई 2015 के बाद के पांच सत्र मं सिरिफ मार्च 2016 मं सवाल करिन अऊ चार सत्र म कुछु नई पुछिन। तखतपुर के भाजपा विधायक राजू क्षत्रिय हर 3 सत्र म जनता के समस्या ल सदन मं नइ उठाइन। विंद्रानवागढ़ ले भाजपा विधायक गोवर्धन मांझी हर 4 सत्र मन मं जनता के समस्या बार कोनो सवाल सदन मं नइ करिन। भरतपुर सोनहत ले भाजपा चंपादेवी पावले हर 3 सत्र मन मं जनता के समस्या म कोनो सवाल सदन मं नइ करिन। कांग्रेस के पाली तनाखार ले विधायक राम दयाल उइके हर बीते दू सत्र मन मं जनता के समस्या म कोनो सवाल सदन मं नइ करिन। कोरबा के कांग्रेस विधायक जय सिंह अग्रवाल हर 2 सत्र मन मं जनता के समस्या म कोनो सवाल सदन मं नइ करिन।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment