छत्तीसगढ़ के पीडीएस सबले बढि़या: श्री नीतीश कुमार

बिहार-छत्तीसगढ़ के मुख्यमंत्री मन करिन सौजन्य मुलाकात
डॉ. रमन सिंह हर श्री नीतीश कुमार के करिन आत्मीय स्वागत







रायपुर, 26 मार्च 2017। बिहार के मुख्यमंत्री श्री नीतीश कुमार हर छत्तीसगढ़ सरकार के सार्वजनिक वितरण प्रणाली (पीडीएस) के प्रशंसा करत कहिन कि ये देश के सर्वाधिक पारदर्शी वितरण प्रणाली हावे। उमन आज संझा इहां मुख्यमंत्री डॉ. रमन सिंह ले ऊंखर निवास मं सौजन्य मुलाकात करिन।
ए दौरान श्री कुमार हर अपन संग आए बिहार के शिक्षामंत्री श्री अशोक चौधरी अऊ जल संसाधन मंत्री श्री राजीव रंजन ले डॉ. सिंह के परिचय करात कहिन - इनखर (डॉ. रमन सिंह के) पीडीएस देश मं सबले अच्छा हे। ए प्रणाली मं गरीब मन बर राशन वितरण के बेहतर व्यवस्था के संग-संग किसान मन से समर्थन मूल्य म धान खरीदी के घलोक अच्छा व्यवस्था करे गए हे। श्री नीतीश कुमार हर कहिन - छत्तीसगढ़ के पीडीएस मं धान खरीदी बर जऊन कम्प्यूटरीकृत ऑनलाईन व्यवस्था हावे, ओखर ले हर दिन संझा कुन ये बताय जा सकत हे कि कोन से समिति मं कोन-कोन किसान मन अपन धान बेंचिन अऊ ओ मन ल ऑनलाईन कतका भुगतान होइस।
श्री नीतीश कुमार हर डॉ. रमन सिंह ले कहिन - मोला आप मन के पीडीएस अऊ धान उपार्जन अउ उंखर सुरक्षित भण्डारण के व्यवस्था हर बहुत प्रभावित करे हावे। आप मन समिति मन के उपार्जन केन्द्र मन मं धान के सुरक्षित रख-रखाव बर प्लेटफार्म निर्माण के जऊन निर्माण शुरू करे हव, वो घलोक काफी अच्छा हावे। डॉ. सिंह हर कहिन - उत्तरप्रदेश के मुख्यमंत्री योगी आदित्यनाथ हर घलोक हमार इहां के पीडीएस के कल एक जनसभा मं सार्वजनिक रूप ले प्रशंसा करे हावें। डॉ. सिंह हर एखर खातिर श्री नीतीश कुमार अऊ योगी आदित्यनाथ के प्रति अपन कृतज्ञता व्यक्त करिन। डॉ. रमन सिंह हर पुष्प गुच्छ भेंटकरके श्री नीतीश कुमार के आत्मीय स्वागत करिन अऊ दुनों राज्य के कई ठन जनकल्याणकारी योजना मन म आपसी विचार-विमर्श के बाद ओ मन ल शुभकामना सहित स्मृति चिन्ह भेंट करिन। डॉ. सिंह हर ऊंखर संग आए बिहार के मंत्रीद्वय श्री अशोक चौधरी अऊ श्री राजीव रंजन के घलोक आत्मीय स्वागत करिन। सौजन्य मुलाकात के बेरा दुनों मुख्यमंत्रि मन एक-दूसरे के राज्य मं चलत विकास योजना मन के बारे मं जानकारी मन के आदान-प्रदान करिन।
अनौपचारिक विचार-विमर्श के बेरा मुख्यमंत्री हर श्री नीतीश कुमार ल लगभग 237 वर्गकिलोमीटर इलाका मं विकसित होवत नवा रायपुर के बारे मं घलोक बताइन। श्री कुमार हर कहिन - निश्चित रूप ले नवा रायपुर के रूप मं उभरत आधुनिक शहर मं मोला काफी दिलचस्पी हावे। अगले पइत इहां आहू त जरूर नवा रायपुर देखना चाहहूं। डॉ. सिंह हर श्री नीतीश कुमार ल छत्तीसगढ़ मं किसान, ग्रामीण, युवा अऊ छात्र-छात्रा मन बर संचालित कई ठन नवां योजना मन के जानकारी दीन। डॉ. सिंह हर ओ मन ल बताइन कि राज्य सरकार किसान मन के धान उपार्जन के बाद ओला बेहतर ढंग ले सुरक्षित रखे बर उपार्जन केन्द्र मन मं चबूतरा बनवावत हावे, जिहां धान ल केप-कव्हर ले ढांक के अड़बड़ दिन तक रखे जा सकेत हे। डॉ. रमन सिंह हर श्री नीतीश कुमार ल छत्तीसगढ़ के नक्सल प्रभावित दंतेवाड़ा जिला मं राज्य सरकार कोति ले संचालित एजुकेशन सिटी के बारे मं घलो बताइन। डॉ. सिंह हर कहिन कि ए एजुकेशन सिटी मं नक्सल हिंसा पीड़ित इलाका के अंदाजन सात हजार लइका एके आवासीय कैम्पस मं निवास करत-करत कक्षा पहली ले बारहवीं तक पढ़ाई करत हें। ऊंखर खातिर पॉलीटेक्निक अऊ आईटीआई घलोक खोले गए हे। दंतेवाड़ा के तर्ज म सुकमा अऊ बीजापुर जिला मन मं घलोक एजुकेशन सिटी परियोजना म तेजी लं काम चलत हे।
डॉ. सिंह हर ओ मन ल बताइन - प्रदेश के नक्सल जिला मन के ग्यारहवीं अऊ बारहवीं के विद्यार्थि मन बर जम्‍मो पांच संभागीय मुख्यालय मन मं प्रयास आवासीय विद्यालय घलोक चलाए जावत हे। डॉ. रमन सिंह हर श्री नीतीश कुमार ल बताइन कि छत्तीसगढ़ के युवा मन के कौशल प्रशिक्षण अऊ कौशल उन्नयन बर हमन राज्य के जम्‍मो 27 जिला मं लाईवलीहुड कॉलेज के स्थापना करे हावे, जिहां अल्पशिक्षित युवा मन ल घलोक विभिन्न व्यवसाय मन मं हुनरमंद बने के मौका मिलत हावे। ऊंखर खातिर आवासीय व्यवस्था घलोक करे गए हे। मुख्यमंत्री हर श्री नीतीश कुमार ल राजधानी रायपुर तीर बीरगांव मं लगभग 11 महीना पहिली शुरू करे केन्द्रीय प्लास्टिक इंजीनियरिंग अऊ तकनीकी संस्थान (सीपेट) मं प्लास्टिक उद्योग ले संबंधित कार्य मं युवा मन ल देहे जात कौशल उन्नयन प्रशिक्षण के बारे मं घलोक बताइन। डॉ. सिंह हर कहिन कि सिरिफ 11 महीना के भीतर सीपेट मं 730 युवा प्रशिक्षित हो गए हें अऊ ओमां ले 508 युवा मन ल राज्य अउ राज्य के बाहिर के कई ठन उद्योग मन मं नौकरी मिल गए हे।
श्री नीतीश कुमार हर ए परियोजना बर मुख्यमंत्री के तारीफ करिन अऊ कहिन - कौशल उन्नयन मं प्रशिक्षित युवा मन ल रोजगार के अवसर के कमी नइ रहय। हमन घलोक बिहार के कुछ इलाका मं ग्राम पंचायत स्तर म युवा मन के कौशल उन्नयन बर प्रशिक्षण कार्यक्रम मन के शुरूआत करे हवन। मुख्यमंत्री हर श्री कुमार ल बताइन - नक्सलि मन ह जऊन स्कूल ल क्षतिग्रस्त कर देहे रहिन, उहां के बच्चा मन के पढ़ाई बर हमन हर पोटा केबिन स्कूल मन के स्थापना करे हवन। उहां आठवीं तक के पढ़ाई होवत हे, फेर अब हम पोटा केबिन स्कूल मन मं हाईस्कूल कक्षा (9वीं-10वीं) बर घलोक मंजूरी मिल गे हावे। डॉ. रमन सिंह हर छत्तीसगढ़ मं निवासरत प्रवासी बिहारी मन के तारीफ करत करत श्री नीतीश कुमार से कहिन कि ए मन हर सुरुज उपासना के महापर्व ‘छठ पूजन’ के अपन परम्परा ल छत्तीसगढ़ मं घलोक कायम रखे हें। जिहां कहीं जादा संख्या मं प्रवासी बिहारी कुटुंब रहिथें, ओ मन ल छठ पूजा के सुविधा दे बर हमन तालाब मन के साफ-सफाई अऊ आन जरूरी इंतजाम अवश्य करथन। डॉ. रमन सिंह ले सौजन्य मुलाकात मं श्री नीतीश कुमार हर पाछू बछर मन मं समय-समय म अपन छत्तीसगढ़ प्रवास ल घलोक सुरता करिन। उमन डॉ. सिंह ले कहिन - वर्ष 2008 मं आप मन के शपथ ग्रहण समारोह मं घलोक मोला आए के सौभाग्य मिले रहिस।


style="display:block"
data-ad-client="ca-pub-3208634751415787"
data-ad-slot="4115359353"
data-ad-format="link">



style="display:block"
data-ad-format="autorelaxed"
data-ad-client="ca-pub-3208634751415787"
data-ad-slot="1301493753">


loading...


Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment