लोक सुराज अभियान 2017 : नक्सल क्षेत्र मन मं दूसर दिन घलोक करिस मुख्यमंत्री सरलग दौरा

अपन सुरक्षा के परवाह करे बिना सड़क के रद्दा पहुंचिन केरलापाल
दुगोली के समाधान शिविर मं शराब कोचिया मन ल जेल भेजे के दीस चेतावनी
बीजापुर ल जिला बनाए के फैसला के मजाक उड़इया मन ल जिला मं आए अऊ विकास देखे के दीन नेवता
दुगोली के जनता ल 33.55 लाख के नल-जल योजना के दीस सौगात


 

रायपुर, 04 अपरेल 2017। राज्य के नक्सल हिंसा पीड़ित इलाका मन मं विकास अऊ विश्वास के पैगाम लेके तपत घाम अऊ झांझ के बीच मुख्यमंत्री डॉ. रमन सिंह के सघन दौरा आज घलोक सरलग जारी रहिस। प्रदेश व्यापी लोक सुराज अभियान के तीसर चरण के आज दूसर दिन रहिस।
मुख्यमंत्री राज्य के आखरी छोर के जिला मुख्यालय सुकमा ले रवाना होके पहिली उहां के ग्राम केरलापाल मं आयोजित समाधान शिविर मं सामिल होइन। मुख्यमंत्री ल केरलापाल ले जाय बर सुकमा मं हेलीकॉप्टरमौजूद रहिस, अधिकारी मन ह उमन ले कहिन कि सुरक्षा कारण ले ओ मन ल हेलीकॉप्टर मं जाना चाही, फेर डॉ. सिंह ह सड़क मार्ग ले उहां जाय के निर्णय लीस। ओ मन नक्सल खतरा के परवाह करे बिना सुकमा ले 18 किलोमीटर सड़क के रद्दा केरलापाल पहुंचिन अऊ समाधान शिविर मं सामिल होइन। आप मन ल बता दन कि ए सड़क म नक्सली मन कई घटना ल अंजाम देहें हें, इही इलाका मं साल 2012 म सुकमा के तत्कालीन कलेक्टर के अपहरण घलोक होय रहिस हे, जला बड़ कठिनाई ले छोड़ाए गए रहिस। लोक निर्माण विभाग अऊ सुरक्षा बल मन हर सुकमा ले केरलापाल तक सड़क निर्माण पूर्ण करवाए हे।

बीजापुर जिला के दुगोली समाधान शिविर मं पहुंचिन मुख्यमंत्री
मुख्यमंत्री केरलापाल ले हेलीकॉप्टर से बीजापुर जिला के ग्राम दुगोली आइन अऊ उहां उमन समाधान शिविर मं ग्रामीण मन ल सम्बोधित करत करत शराबबंदी मं जम्‍मो मनखे अऊ विशेष रूप ले महिला मन के भागीदारी के आव्हान करिन। मुख्यमंत्री हर दुगोली मं नल जल योजना बर 33 लाख 55 हजार रूपया मंजूर करे के घोषणा करिन। डॉ. सिंह हर शिविर मं क्षेत्र के किसान श्री नरसिंह गोंड ल सौर सुजला योजना मं सोलर सिंचाई पम्प, कमला राणा ल सामाजिक सुरक्षा पेंशन अऊ पंडरू कुंजाम ल देवगुड़ी निर्माण बर राशि के वितरण करिस। उमन ग्रामीण मन ल आबादी पट्टा घलोक दीन। दुगोली के समाधान शिविर मं दुगोली के संगें-संग तीर-तखार के आठ ग्राम पंचायत मन के किसान, मजदूर अऊ आन ग्रामीण अड़बड़ झन उपस्थित रहिन। मुख्यमंत्री हर दुगोली के समाधान शिविर मं प्रदेश व्यापी शाला प्रवेश उत्सव के तहत नवा शिक्षा सत्र मं कक्षा पहली अऊ कक्षा नवमी मं प्रवेश लेवत लइका मन के स्वागत करत ओ मन ल निःशुल्क स्कूल बैग, कापी अऊ पुस्तक भेंटकरके, लडडू खवा के अऊ माला पहना के आशीर्वाद प्रदान करिन।

अवैध शराब बेचइया कोचिया होही गिरफ्तार, आघू दू साल मं समस्या मन के सफाया के लक्ष्य हे- डॉ. रमन सिंह
मुख्यमंत्री हर ओ मन ल सम्बोधित करत कहिन कि राज्य सरकार हर शराब के अवैध कारोबार ल खतम करे बर तीन हजार या ओखर ले कम आबादी वाले गांव मन मं शराब दुकान मन ल बंद करवा दे हावे। अब कहूं कोनो कोचिया अवैध शराब बेचत दिखही तो ओखर खिलाफ कड़ा कार्रवाई करे जाही अऊ ओला गिरफ्तार कर जेल भेजे जाही। अवैध शराब के वाहन मन ल सरकार जब्त कर लेही। मुख्यमंत्री हर समाधान शिविर मं ए नक्सल प्रभावित इलाके के ग्रामीण मन ल सरकार के कई ठन जनकल्याणकारी योजना मन के जानकारी दीन। उमन कहिन कि ए योजना मन के संग जनता के हर समस्या के निराकरण होही। जऊन प्रकार हम देवारी के पहिली अपन घर मन के विशेष रूप ले सफाई करथन, ठीक वइसनहे आघू दू साल मं समस्या मन के घलोक सफाया करे के हमर लक्ष्य हे। डॉ. सिंह हर कहिन कि अवइया दू साल मं बीजापुर जिला के हर गांव अऊ हर मंजरा टोला मं बिजली पहुंच जाही।
डॉ. सिंह हर कहिन कि ये इलाके के लोगन के मांग म हमन अंदाजन दस साल पहिली बीजापुर ल जिला बनाए रहेंन। ओ समय ए क्षेत्र के बाहिर के कुछ मनखे मन मोर ए निर्णय म विश्वास नइ करे रहिन अऊ मजाक उड़ावंय अऊ सवाल उठावंय कि ए अंचल ल जिला बनाए के का फायदा होही। मैं आज ओ मन ल नेवता देना चाहत हंव कि ओ मन बीजापुर आवंय अऊ इहां होवत विकास कार्य ले जनजीवन मं आवत सकारात्मक बदलाव मन ल खुद देखंय। डॉ. सिंह हर कहिन कि जिला बने के सिरिफ एक दशक के भीतर बीजापुर ल एक तेजी ले विकसित होत जिला के रूप मं पहिचान मिले हावे। उमन कहिन कि लोक सुराज अभियान के स्वरूप बदलके अब समाधान म जोर दे जावत हे। अभियान के पहिली चरण मं लोगन से आवेदन बुलाए गए रहिस। पूरा प्रदेश मं 28 लाख आवेदन आए हावे। मुख्यमंत्री हर कहिन कि पहली ग्रामीण मन कोति ले स्कूल, सड़क अऊ आंगनबाडी के मांग आवय, ये जम्‍मो मांग मन ह लगभग पूरा हो गए हे। अब ग्रामीण जनता के तरफ ले मोबाइल कनेक्टीविटी, मोबाइल टावर अऊ मोबाइल फोन के मांग आथे। ये विकास के जनता के एक नवा नजरिया के उदाहरण आए।
मुख्यमंत्री हर कहिन कि प्रधान मंत्री आवास योजना के तहत राज्य मं 700 करोड़ रूपया के कार्य योजना बनाके जम्‍मो जरूरतमंद गरीब परिवार मन ल पक्का मकान देवाए के काम शुरू हो गए हे। उज्जवला योजना मं 35 लाख परिवार मन ल सिरिफ 200 रूपए पंजीयन शुल्क लेके रसोई गैस कनेक्शन, डबल बर्नर चूल्हा अऊ पहली भरे सिलेण्डर निःशुल्क दे जात हे।

मउहा बीनइया अऊ तेन्दूपत्ता तोड़इया वाले मन ल घलोक दे जाही स्मार्ट मोबाइल फोन
डॉ. रमन सिंह हर प्रधानमंत्री के डिजिटल भारत के सपना ल साकार करे बर मुख्यमंत्री संचार क्रांति योजना (स्काई) शुरू करे गए हे, जेमां राज्य के 45 लाख लोगन ल स्मार्ट फोन दे के लक्ष्य हावे। एखर खातिर 1600 टॉवर लगाए जाही। स्मार्ट फोन मिले ले लोगन मन ल कैशलेस भुगतान अऊ छात्र-छात्रा मन ल पढाई म आसानी होही। अब मउहा बीने अऊ तेंदुपत्ता तोडइया ग्रामीण मन ल घलोक मोबाइल फोन मिलही। हमर काम सड़क पुल पलिया बनाए के संग लोगन के जीवन मं बदलाव घलोक लाना हावे। सौर सुजला योजना के तहत लाभ 51000 किसान मन ल बहुत कम कीमत म सोलर सिंचाई पम्प दे जात हावे। उमन कहिन कि प्रधानमंत्री हर देश 2019 तक ओडीएफ करे के संकल्प ले हावे फेर छत्तीसगढ़ के महिला मन हर 2 अकटूबर 2018 तक राज्य ल खुले मे शौच मुक्‍त करे के संकल्प ले हावे, जऊन ल पूरा करे मे हम सफल होबोन।

छत्तीसगढ़ के पीडीएस मं उत्तर प्रदेश के दिलचस्पी
मुख्यमंत्री हर कहिन कि छत्तीसगढ़ के सार्वजनिक वितरण प्रणाली (पीडीएस) मं उत्तर प्रदेश सरकार हर घलोक अपन दिलचस्पी दिखाए हावे। उहां के मुख्यमंत्री योगी आदित्यनाथ हर घलोक हमार इहां के ए प्रणाली के तारीफ करे हावे। उहां के दू मंत्री हालचे मं छत्तीसगढ़ आके हमार इहां के राशन वितरण व्यवस्था के अध्ययन करके गए हावें। मुख्य सचिव विवेक ढांड हर शिविर म ग्रामीण मन ल सरकार के कई ठन योजना मन के जानकारी दीन। उमन कहिन कि सुविधा देहे के काम शासन करत हे, एखर खातिर पूरा छत्तीसगढ़ मं 1600 मोबाईल टॉवर लगाय के कार्रवाई करे जात हावे। कार्यक्रम मं वन मंत्री श्री महेश गागडा, जिला पंचायत अध्यक्ष श्रीमती जमुना सकनी, मुख्य सचिव श्री विवेक ढांड, पर्यटन, संस्कृति अऊ जनसम्पर्क विभाग के सचिव श्री संतोष मिश्रा, लोक निर्माण विभाग के सचिव श्री सुबोध कुमार सिंह, कमिश्नर बस्तर दिलीप वासनीकर, डीआइजी पी सुदंरराज, कलेक्टर डॉ अयाज तंबोली अउ एसपी श्री के.एल.ध्रुव अऊ मुख्यमंत्री के ओएसडी श्री विक्रम सिसोदिया घलोक शिविर मं उपस्थित रहिन। दुगोली समाधान शिविर मं कलेक्टर डॉ अयाज तंबोली हर बताइन कि 8 ग्राम पंचायम मन के क्लस्टर मं 26 ले 28 फरवरी के बीच शिविर लगाके 1397 आवेदन ग्रामीण मन से लिये गये रहिस जेमा जिलास्तर म 1220 आवेदन मन ल निराकरण करे जा चुके हे।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment