सुरुज देवता ले घलोक किसान मन ल मिलत हे मुफत बिजली

सौर सुजला योजना के कमाल : बंजर धरती म घलोक लहलहाए लगिस हरियाली
अब तक अंदाजन सात हजार किसान मन के खेत मन म लगे हे सोलर सिंचाई पम्प






रायपुर, 24 अप्रैल 2017। देश के एक अइसन राज्य हावय छत्तीसगढ़, जिहां प्रदेश सरकार के कृषक समृद्धि योजना के तहत किसान मन ल तीन हॉर्स पावर के सिंचाई पम्प मन बर छह हजार यूनिट अउ पांच हॉर्स पावर तक पम्प मन बर साढ़े सात हजार यूनिट बिजली पाछू आठ साल ले निःशुल्क दे जात हवय। उहें हालेच म, अंदाजन साढ़े छह महीना पहिली राज्य सरकार द्वारा शुरू करे गए सौर सुजला योजना म सुरुज देवता के कृपा ले ओ मन ल खेती बर पूरा बिजली बिल्कुल मुफत मिलत हावय।
सौर सुजला योजना ले छत्तीसगढ़ के दूरिहा के आदिवासी बहुल इलाका के गांव मन म बंजर धरती उपर रबी मौसम म अउ अइसन तेज गर्मी म घलोक हरियाली दिखे लगे हावय। एखर ताजा उदाहरण नगरी विकासखंड के ग्राम मारदापोटी म देखे ल मिले हावय, जिहां 48 बछर के आदिवासी किसान श्री राधेश्याम नेताम हर ए योजना के लाभ उठाके पहली पइत अपन चार एकड़ खेत मन म मूंग अउ भांटा संग आन साग-भाजी के खेती शुरू करिन हें। ए योजना के तहत ओ मन ल तीन हॉर्सपावर के साढ़े तीन लाख रूपया के सोलर पम्प सिरिफ 10 हजार रूपया म देहे गए हावय। पम्प बर ओ मन ल सिरिफ सात हजार रूपया देहे ल परे हावय, बाचें तीन हजार रूपया के टैक्स वोमा जुड़े हावय।
श्री नेताम ह कहिथे कि मुख्यमंत्री डॉ. रमन सिंह के सरकार हर ओ मन ल साढ़े तीन लाख रूपया कीमत के सोलर सिंचाई पम्प लअतका कम कीमत म ओ मन ल देवाए हावंय। ये ऊंखर जइसे छोटे किसान बर बहुत बड़े बात हावय। सूरूज के रौशनी ले सौर पैनल मन म बनइया बिजली के जरिये रबी मौसम के फसल मन बर ऊंखर खेत ल पानी मिले लगे हावय। ओ मन एखर खातिर मुख्यमंत्री ल धन्यवाद देवत हावय। श्री नेताम ए बात ले घलोक खुश हावय कि ये वाले बिजली ओ मन ल सुरुज देवता के कृपा ले मुफ्त म मिलत हावय। एखर लिए ओ मन ल बिजली विभाग म जाके कोनो बिल नइ देना होवय। श्री नेताम हर 15 साल पहिली ग्राम मारदापोटी म जब ये वाले जमीन खरीदे रहिस त वो पूरा पटपर भांठा रहिस। उमन अपन पत्नी श्रीमती रम्हीन नेताम के संग कड़ा मेहनत करके ओला खेती लइक बनाइस अउ पांच साल पहिली सिंचाई नलकूप के घलोक खनन करवाइस, फेर वो नलकूप फेल रहिस। एखर ले ओखर खेती रबी मौसम म बंजर रहे लगिस। सिरिफ मानसून के बारिश के भरोसा धान के खेती करय, फेर एक फसल ले घर के जरूरते पूरा नइ होवत रहिस।
इही बीच श्री नेताम ल मालूम होइस कि मुख्यमंत्री डॉ. रमन सिंह हर अइसन इलाका मन के किसान मन बर सौर सुजला योजना के शुरूआत करे हावय, जिहां सिंचाई बर खेत तक परम्परागत बिजली पहुंचाए म कई दिक्कत आथे। श्री नेताम हर एखर खातिर कृषि विभाग अउ क्रेडा के अधिकारी मन ले सम्पर्क करिन। ओ मन ल अधिकारी मन हर बताइस कि ए योजना म आदिवासी अउ अनुसूचित जाति वर्ग के किसान मन ल तीन हॉर्स पावर के साढ़े तीन लाख रूपया मूल्य के सोलर सिंचाई पम्प सिरिफ सात हजार रूपया म, आन पिछड़े वर्ग के किसान मन ल सिरिफ 12 हजार रूपया म अउ सामान्य वर्ग के किसान मन ल केवल 18 हजार रूपया म देहे जात हावय। श्री नेताम हर एखर खातिर आवेदन करिस अउ ओ मन ल तुरंते सोलर सिंचाई पम्प के स्वीकृति मिल गे। ओ मन धमतरी जिला के पहिली अइसन किसान आंय, जेन सबले पहिली ए योजना के लाभ लेहे हावंय। प्रदेश भर म ऊंखर जइसन अब तक लगभग छै हजार 988 किसान मन के खेत मन म सौर सुजला योजना के सिंचाई पम्प पहुंच गे हावय अउ ओमां हरियाली फैइले लगे हावय। ये योजना के जादा जानकारी बर राजधानी रायपुर म छत्तीसगढ़ राज्य अक्षय ऊर्जा विकास अभिकरण (क्रेडा) के अधिकारी मन ले उहां के

फोन नम्बर 8370009923 या 8370009927 म सम्पर्क करे जा सकत हावय।






Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment