गांव म जाके, दुखिया मन के दुख देख के, बनथे योजना





दुर्ग, 13 अप्रैल 2017। मुख्‍यमंत्री रमन सिंह आज दुर्ग जिला के कलेक्‍टरेट म मंझनिया दुर्ग अउ बेमेतरा जिला के अधिकारी मन के जरूरी बइठक लीस अउ सरकार के योजना मन के कार्यान्‍वयन के जानकारी लीन। मुख्‍यमंत्री जिला मुख्‍यालय म अधिकारी मन के बइठक लेहे के बाद संझा पत्रकार मन संग मिलिंन। उमन लोक सुराज अभियान के क्रम के बारे म बतावत कहिन कि मैं स्‍वयं गांव-गांव दउरा करत हवं अउ जनता के बच जा के उखंर दुख-दरद ल देखते हंव। जनता से मिल के उंखर शिकायत अउ के तुरते निराकरन करत हंव। मैं गांव म दुखिया मन के दुख ल देख के योजना बनाथंव। उमन सरगुजा दउरा के समें मजदूर मन के खाना डब्‍बा के बारे म बतावत कहिन कि उहां के दउरा म देखेंव के मजदूर मन प्‍लास्टिक अउ अनहाईजनिक डब्‍बा म अपन खाना लाथें। ओला देखके तुरते योजना बन गए के उमन ल स्‍टील के टिफिन डब्‍बा देहे जाही। उमन बेमेतरा अउ दुर्ग जिला म केन्‍द्र अउ राज्‍य सरकार के लाभकारी योजना मन के सुघ्‍घर क्रियान्‍वयन उपर खुशी जताइन।
उमन हालेच म केन्‍द्रीय सड़क मंत्री श्री गड़करी मेर भेंट के बारे म बतावत कहिन कि दुरूग ले रईपुर के सड़क बर केन्‍द्र सरकार ह 348 करोड़ रूपया देहे के अस्‍वासन देहे हे। एखर से अब दुर्ग ले रईपुर के पहुंच मार्ग जादा सुगम हो जाही। एमा कई ठन ओवर ब्रिज अउ अंडर ब्रिज तको बनाए जाही जेकर से आवागम म सुविधा होही अउ आए-जाए म बेरा कम लगही। दुर्ग अउ बेमेतरा जिला के पेयजल, सिचाई अउ उज्‍वला योजना के बारे म बतावत उमन कहिन के दुनो जिला लउहे शतप्रतिशत विद्युतीकृत जिला बन जाही।
ये बेरा म दुर्ग के अड़बड़ अकन पत्रकार उपस्थित रहिन जेमन जनता से संबंधित कई ठन सवाल तको करिन जखर जवाब मुख्‍यमंत्री इ दीन। ए बेरा म महिला अउ बालविकास मंत्री श्रीमती रमशिला साहू, राजस्‍व मंत्री श्री प्रेमप्रकाश पाण्‍डेय, संसदीय सचिव श्री लाभचंद बाफना, मुख्‍य सचिव श्री विवेक ढ़ाढ़, उर्जा सचिव श्री सुबोध सिंह अउ जनसंपर्क संचालनालय के संचालक श्री सुकुमार टोप्‍पो तको उपस्थित रहिन।






Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment