मुख्यमंत्री ल किसान मन ह भेंट करिन जैविक खेती के चांउर

दक्षिण छत्तीसगढ़ के जइसे अब उत्तर छत्तीसगढ़ म घलव जैविक खेती म बढि़स किसान मन के रूचि



रायपुर, 17 अप्रैल 2017। दक्षिण छत्तीसगढ़ जइसे अब उत्तरी छत्तीसगढ़ म घलव जैविक खेती म किसान मन के रूझान बढ़त जात हे। मुख्यमंत्री डॉ. रमन सिंह ह राज्य के जशपुर जिला के पहाड़ी इलाका म होवत जैविक खेती के तारीफ करत येमा लगे किसान मन ल बधाई दीन। डॉ. सिंह आज मंझनिया जब अचानक हेलीकॉप्टर म ये जिला के ग्राम साहीडांड (विकासखंड-बगीचा) पहुंचिन, त उहां आयोजित समाधान शिविर म क्षेत्र के किसान मन ह उमन ल जैविक खेती ले मिले चांउर के पैदावार के बारे म बताइन अउ उमन ल दोह म अउ कांवर म ये चांउर भेंट करिन। किसान मन ह ये बात उपर खुशी जताईन कि जैविक खेती बर उमन ल राज्य सरकार के कृषि विभाग कोति ले समुचित सहयोग अउ मार्गदर्शन देहे जात हे। मुख्यमंत्री ह कहिन कि प्रधानमंत्री श्री नरेन्द्र मोदी के लक्ष्य के अनुरूप वर्ष 2022 तक किसान मन के आमदनी दुगना करे म जैविक खेती के महत्वपूर्ण भूमिका होही। डॉ. सिंह ह कहिन कि ये खुशी के बात आए कि दक्षिण छत्तीसगढ़ के दंतेवाड़ा जिला जइसे उत्तरी छत्तीसगढ़ के जशपुर जिला म जैविक खेती म किसान अड़बड़ दिलचस्पी लेवत हें। जैविक खेती ले मिलइया अनाज काफी पौष्टिक होथे। डॉ. सिंह ह किसान मन ल आघू घलव एकर खातिर भरपूर सहयोग करे के भरोसा देवाइन। उमन के संग क्षेत्र के विधायक श्री राजशरण भगत घलव मौजूद रहिन। आप मन जानतेच होहू कि पाछू बछर के लोक सुराज अभियान म मुख्यमंत्री ल दंतेवाड़ा जिला के ग्राम कारली म उहां के किसान मन ह जैविक खेती ले तैयार चांउर भेंट करे रहिन।






Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment