वनवासी मन ल दू साल के तेन्दूपत्ता बोनस नइ मिले के शिकायत





सहसपुर के समाधान शिविर मं सामिल होइन डॉ. रमन सिंह
नवा सड़क, ग्रामीण नल-जल योजना अऊ पंचायत भवन तुरंते मंजूर करे के घोषणा


रायपुर, 13 अप्रैल 2017। लोक सुराज अभियान के तहत आज मंझनिया मुख्यमंत्री डॉ. रमन सिंह राजनांदगांव जिला के ग्राम पंचायत मुख्यालय सहसपुर (विकासखंड छुई खदान) के समाधान शिविर मं सामिल होइन। ये गांव मध्यप्रदेश के बालाघाट जिला के सीमा स्थित हावे। शिविर मं ग्रामीण मन हर मुख्यमंत्री ल बताइन कि लघु वनोपज सहकारी समिति के माध्यम ले तेन्दूपत्ता संग्रहण करइया वनवासी मन ल पाछू दू साल (2015 अऊ 2016) के प्रोत्साहन पारिश्रमिक (बोनस) नइ मिले हावे।
मुख्यमंत्री हर ए शिकायत ल काफी गंभीरता से लीन अऊ वन विभाग के अनुविभागीय अधिकारी (एस.डी.ओ.) अऊ रेंजर ल मौका म तलब कर एखर बारे मं जानकारी मांगीन। डॉ. सिंह हर उमनले संतोषजनक जवाब नइ मिले म नाराजगी व्यक्त करिन अऊ कलेक्टर ल 24 घंटा के भीतर ए मामला के जांच करे अउर रिपोट भेजे के निर्देश दीन। मुख्यमंत्री हर कहिन कि जांच रिपोट मं जऊन दोषी होही, ओखर खिलाफ कड़ा अनुशासनात्मक कार्रवाई करे जाही। मुख्यमंत्री हर ग्रामीण मन ल कहिन कि तेन्दूपत्ता संग्रहण करइया के संग अन्याय नइ होवय। ओ मन ल उंखर बकाया बोनस जरूर देवाए जाही। डॉ. सिंह हर ग्रामीण मन ल बताइन कि राज्य सरकार हर ए साल ले तेन्दूपत्ता संग्रहण बर पारिश्रमिक के राशि 1500 रूपए प्रति मानक बोरा ले बढ़ाके 1800 रूपया कर देहे हावे। उमन समाधान शिविर के जनसभा मं ग्रामीण मन के आग्रह म सहसपुर-रेंगाखार दू किलोमीटर सड़क निर्माण, सहसपुर मं नल-जल योजना अऊ नवीन पंचायत भवन निर्माण के स्वीकृति तुरंते प्रदान कर दीन। डॉ. सिंह हर निकटवर्ती ग्राम साल्हेवारा मं राष्ट्रीकृत बैंक खोले बर राज्य शासन के स्तर म जल्दी उदीम करे के आश्वासन दीन। उमन एखर खातिर मुख्य सचिव श्री विवेक ढांड ल सरकार के स्तर म जरूरी कार्रवाई करे के निर्देश दीन।
समाधान शिविर मं सहसपुर संग तीर-तखार के 10 ग्राम पंचायत मन के ग्रामीण अऊ पंचायत प्रतिनिधि सामिल होइन। मुख्यमंत्री हर सहसपुर, साल्हेवारा, जमेनिया, भाजीडोंगरी, खादी, आमगांवघाट, जामगांव, समनापुर, गोलरडीह अऊ देवपुरघाट के आश्रित गांव मन ले बड़ अकन आए ग्रामीण मन ल राज्य सरकार के कई ठन योजना मन के बारे मं बताइन। मुख्यमंत्री हर कहिन ए गांव मन मं पेयजल समस्या ल दूर करे बर जहां जरूरी होही, उहां कुंआ अऊ नलकूप खोदके सोलर पम्प ले पीए के पानी के व्यवस्था करे जाही। डॉ. सिंह हर एखर खातिर अधिकारी मन ल जरूरी कार्रवाई जल्दी शुरू करे के निर्देश दीन। ग्रामीण मन हर मुख्यमंत्री ले समीपवर्ती ग्राम नवागांव मं लगभग 18 एकड़ के वनभूमि मं सघन वृक्षारोपण कराए के अनुरोध करिन। डॉ. सिंह हर कहिन कि ए संबंध जल्दी कार्रवाई करे जाही। मुख्यमंत्री ल शिविर मं छठवीं कक्षा के छात्र मनीष जंघेल हर छत्तीसगढ़ के अमर शहीद वीर नारायण सिंह उपर आधारित कविता सुनाईस। मुख्यमंत्री हर ए लइका ल शाबाशी दीन अऊ ओला लोक सुराज के कैप भेंट कर के ओखर उत्साह बढ़ाइस। डॉ. सिंह हर ए दौरान कई स्कूली बच्चा मन ल तीर म बलाके उमन ले पहाड़ा सुनिस। कई बच्चा मन से कविता सुनीन अऊ उंखर हौसला बढ़ाइन।






Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment