नक्सल पीड़ित जिला के गांव म उतरिस मुख्यमंत्री के हेलीकॉप्टर

मुख्यमंत्री हर हूंत करइस ग्रामीण मन के घर म
राजोबाई अउ मितानिन राधा सोरी के घर पहुंचिन मुख्यमंत्री
अमरईया के छांव म लगीस डॉ. रमन के चौपाल
ग्रामीण मन ल सामुदायिक भवन अउ सिंचाई कुंआ के दीस सौगात


रायपुर, 13 अप्रैल 2017। मुख्यमंत्री डॉ. रमन सिंह आज बिहनिया राज्य के नक्सल हिंसा पीड़ित कोंडागांव जिला म केशकाल तीर ग्राम पंचायत मुख्यालय कोदोभाट म हेलीकॉप्टर ले अचानक पहुंचिन, जिहां उमन अपन आत्मीय व्यवहार ले लोगन के दिल जीत लीन।

मुख्यमंत्री ए गांव म राजोबाई नाम के महिला अउ मितानिन श्रीमती राधा सोरी के घर म अचानक दस्तक दीन। दरवाजा खोले म दुनों परिवार मुख्यमंत्री ल आघू देख के चकरित हो गें। उमन सहज-सरल ढंग ले उंखर आत्मीय स्वागत करिन। राजोबाई अपन दू बेटी मन के संग उहां रहिथें।
मुख्यमंत्री हर ऊंखर नान्हें नाती विवेक ल गोदी म उठा लीन अउ ओला मया के संग असीस देवत कहिन कि ये कतका बहादुर लइका हावय। बिना कोनो संकोच के मोर गोद म आ गीस। मुख्यमंत्री जब ऊंखर घर पहुंचिन, त राजोबाई अउ ओखर बेटी मन भोजन बर चावल बिने के काम करत रहीन। डॉ. सिंह स्वास्थ्य सेवा मन बर गांव म तैनात मितानिन श्रीमती राधा सोरी के घर म ऊंखर कुटुंब म लगातार होए हादसा के बारे म सुनके काफी द्रवित हो गे। मुख्यमंत्री ल श्रीमती सोरी हर बताइस कि कुछ समय पहिली मोर पति के अउ हाल ही म जवान बेटा के निधन हो गए हावय। बेटा के निधन से पहिली ओखर पत्नी के घलोक निधन हो गीस।
मुख्यमंत्री हर श्रीमती सोरी के प्रति अपन संवेदना अउ सहानुभूति प्रकट करिन अउ ओ मन ल हरसंभव सहयोग के आश्वासन दीन। डॉ. सिंह हर मितानिन श्रीमती सोरी के दवा पेटी म रखे दवाई मन ल देखिन। उमनले टीकाकरण, स्वास्थ्य बीमा योजना के स्मार्ट कार्ड अउ गांव के लोगन मन बर प्राथमिक चिकित्सा व्यवस्था के जानकारी लीन। ओ मन श्रीमती सोरी के कर्त्तव्य परायणता ले काफी प्रभावित होइन। उमन श्रीमती राजोबाई के घर टेलीविजन सेट, एलईडी बल्ब अउ रसोई गैस के व्यवस्था देखके खुशी जताईन। मितानिन श्रीमती राधा बाई ल इंदिरा आवास मंजूर करे गए हे, ओ मन ए योजना के तहत निर्मित घर म निवास करत हावंय।
लोक सुराज अभियान के तहत मुख्यमंत्री के अचानक कोदोभाट पहुंचे म ग्रामीण मन म आश्चर्य मिश्रित खुशी देखे गीस। कोदोभाट म अमराई के छांव म मुख्यमंत्री के चौपाल लगीस, जहां उमन ग्रामीण मन ल सरकार के कई ठन योजना मन के जानकारी दीन। एखर संगें-संग उमन लोगन ले पूछताछ करके गांव म ए योजना मन के क्रियान्वयन के स्थिति के घलोक जायजा लीन। डॉ. सिंह हर ग्रामीण मन से चर्चा के बाद उंखर जरूरत ल ध्यान म रखत मौके म कई निर्माण कार्य के तुरंते मंजूरी दीन। उमन कहिन ग्राम पंचायत मुख्यालय कोदोभाट अउ ओखर आश्रित ग्राम बयालपुर म दू सामुदायिक भवन के निर्माण करे जाही अउ एखर बर पांच-पांच लाख रूपया मंजूर करे जाही। उमन मनरेगा के तहत कोदोभाट-कोहकामेटा सड़क निर्माण के घलोक स्वीकृति तुरंते प्रदान करिन।
डॉ. सिंह हर मनरेगा के तहत गांव म दस सिंचाई कूप निर्माण के घलोक मंजूरी दीन अउ कहिन कि किसान मन एखर बर आवेदन करव। ऊंखर सफल कुंआ म सौर सुजला योजना के तहत सिंचाई पम्प दे जाही। मुख्यमंत्री हर ग्राम पंचायत कोदोभाट के दू वार्ड म पेयजल व्यवस्था बर सोलर सिंचाई पम्प घलोक मंजूर करे के घोषणा करिन। अमराई म लगे चौपाल ले लहुटत समय मुख्यमंत्री हर पेड़ से आम तोड़के तन्मय नाम के एक लइका ल दीस।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

1 comments: