जेल म बंद अभय सिंह ले मिलिस भूपेश, रमन सरकार उपर लगाइस आरोप




रायपुर। छत्तीसगढ़ कांग्रेस अध्यक्ष भूपेश बघेल ह दू दिन पहिली सरगुजा जेल म कैदी अभय सिंह मेर मिले रहिस हे। बताथें कि कैदी अभय सिंह ह 2013 म झीरम घाटी म होए नक्सली हमला ले पहिली अइसनहे कोनो वारदात होए के अंदेशा जताए रहिस हे।
ये मुलाकात के बाद भूपेश बघेल ह सरकार उपर बड़का आरोप लगाए हावय। भूपेश के मानन त झीरम घाटी हमला के पहिली सरकार ह नक्सली मन ल करोड़ों रुपया देहे रहिस, कथें कि अभय सिंह तीर एखर दस्तावेजी प्रमाण हावय, अउ ओखर सीडी घलोक मौजूद हावय। कांग्रेस हर ए पूरा मामला के सीबीआई मेर जांच कराए के मांग करत हावय। कांग्रेस हर पुलिस के भूमिका उपर घलोक सवाल उठाए हावय।
इतवार को बीजेपी के वरिष्ठ नेता सच्चिदानंद उपासने हर भूपेश बघेल अउ अभय सिंह के मुलाकात उपर सवाल उठात भूपेश उपर सरकार के खिलाफ षडयंत्र रचे के आरोप लगाए रहिस हे अउ गृह मंत्री ले मामला के विस्तृत जांच के मांग करे रहिस हे। तेखर बाद मीडिया के आघू भूपेश हर अपन मुलाकात के बारे म बताइस।
बताथें कि अभय सिंह ह साल 2002 के आसपास पुलिस विभागेच म मुखबिरी के काम करय। एखर खातिर ओला पुलिस के बड़े अफसर के जइसे सम्मान घलोक मिलत रहे हे। फेर 2013 म झीरम घाटी हमला के पहिली नक्सली हमला अउ पुलिस के भूमिका के बात कहिके अभय सिंह ह पुलिस के शंका म आ गीस। अभय सिंह कई मामला म जेल म बंद हावय। कांग्रेस के मानन त ओला प्रताड़ित घलोक करे जात हावय।






Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment