सुकमा हमला म सामिल नक्सली समेत 19 नक्सली गिरफ्तार

छत्तीसगढ़ के नक्सल प्रभावित सुकमा जिला म पुलिस दल ह 19 नक्सली मन ल गिरफ्तार करे हे। गिरफ्तार नक्सली मन म नौ झन उपर बुरकापाल हमला म सामिल होए के आरोप हे। सुकमा जिला के पुलिस अधिकारी मन हर आज बताए हें कि पुलिस हर बुरकापाल हमला म सामिल नौ नक्सली मन ल जिला के चिंतागुफा अऊ चिंतलनार थाना क्षेत्र ले गिरफ्तार करे गए हे। उहें खबर अउ लगे हे कि 10 अऊ नक्सली मन ल कुकानार थाना क्षेत्र ले गिरफ्तार करे गए हे। ये नक्सली मन बीते फरवरी महिना म ट्रक म आगी लगाए अऊ पुलिस दल उपर हमला करे के घटना म सामिल रहिन हें। आप मन जानतेच होहू कि अप्रैल महीना के 24 तारीक को सुकमा जिला के चिंतागुफा थाना क्षेत्र के अंतर्गत बुरकापाल म नक्सली मन पुलिस दल उपर हमला कर दे रहिन ए हमला म सीआरपीएफ के 25 जवान शहीद हो गए रहिन।
पुलिस अधिकारी मन के कहना हवय कि घटना के बाद पुलिस दल हर चिंतलनार, चिंतागुफा अऊ बुरकापाल क्षेत्र ले अंदाजन 12 मनखे मन ल हिरासत म लेके पूछताछ शुरू करे रहिन हें। पूछताछ के बेरा म नौ झन मन बुरकापाल हमला म सामिल होए के बात ल स्वीकार करे हें। बुरकापाल हमला म सामिल होए के आरोप म पुलिस ह चिंतागुफा क्षेत्र से सोढ़ी लिंगा (30 वर्ष), सोढ़ी मुडा (45 वर्ष), पोडियामी जोगा (38 वर्ष), मड़कम भीमा (18 वर्ष), रावा आयता (20 वर्ष) अऊ मड़कम सोमडू (34 वर्ष) ल गिरफतार करे गए हे। जबकि चिंतलनार क्षेत्र ले वेटटी माला (26 वर्ष), मुचाकी नंदा (39 वर्ष) अऊ माडवी कोसा (40 वर्ष) ल गिरफ्तार करे गए हे। गिरफ्तार नक्सली माओवादी मन के दंडकारण्य आदिवासी किसान मजदूर संगठन के सदस्य आंय।
पुलिस अधिकारी मन के मुताबिक एक अऊ घटना म पुलिस ह 10 जनमिलिशिया सदस्य मन ल कुकानार पुलिस थाना क्षेत्र ले गिरफ्तार करे हे। ये नक्सली मन ल सीआरपीएफ, डीआरजी अऊ जिला बल के संयुक्त दल हर गिरफ्तार करे हे। ये 10 झन नक्सली बीते फरवरी महिना के 26 तारीक को जगदलपुर सुकमा रद्दा के कुकानार क्षेत्र म पुलिस दल उपर गोलीबारी करे रहिन हे अऊ दू ट्रक मन म आगी लगा देहे रहिन। अधिकारी मन बताईन कि जम्‍मो गिरफ्तार नक्सली मन ल स्थानीय अदालत म पेश करे गीस जिहां ले ओ मन ल जेल भेज दे गए हे।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment