जांजगीर के 46 मजदूर अमृतसर म बंधक, छोड़ाए के उदीम

रायपुर, छत्तीसगढ़ के जांजगीर-चांपा जिला के ठाकुरदिया, सलखन, तुलसी अउ शक्ती नगर के रहईया 46 मनखे ल पंजाब के अमृतसर जिला के अटारी म बंधक बनाकर रखे गए हे। ये जानकारी जांजगीर-चांपा के विधायक मोतीलाल देवांगन हर देहे हे।
विधायक के कहना हे कि ए संदर्भ म उमन प्रदेश के श्रममंत्री, पुलिस महानिदेशक, संभागायुक्त बिलासपुर, कलेक्टर व पुलिस अधीक्षक जांजगीर-चांपा ल चिट्ठी लिखके, बंधक बनाय गए मजदूर मन ल तुरंते छोड़ा के ऊंखर गांव वापस लाए अउ दोषी मन उपर कठोर कार्रवाई करे के मांग करे हवंय।
ए मामला म जांजगीर-चांपा के पुलिस अधीक्षक अजय यादव के कहना हे कि उमन ल विधायक के चिट्ठी मिल गए हे। पुलिस ए मामला म पूरा संजीदगी के संग लगे हे। जल्दीच राज्य के टीम पंजाब रवाना करे जाही। अटारी के ग्रेंडा थाना क्षेत्र के पुलिस थाना कान्हागढ़ म तैनात एसआई मनिंदर सिंह हर घलोक कार्रवाई के भरोसा देहे हे। ए मामला म पंजाब के पुलिस कमिश्नर एस.एस. श्रीवास्तव ह, हर संभव मदद के भरोसा देहे हावय। अमृतसर के पुलिस अधीक्षक सरदार जगप्रीत सिंह ह तो साफ-साफ कहिस कि, "आप मन नाम अउ जघा बतावव मैं अभी तुरंते कार्रवाई करहूं।"
जांजगीर-चांपा विधायक मोतीलाल देवांगन हर बताइस कि "जांजगीर-चांपा विधानसभा क्षेत्र के ग्राम ठाकुरदिया निवासी रेशम लाल सांडे अउ रतन लाल सांडे अउ चंद्रिका बाई सतनामी ह उंखर से संपर्क करके बताए हें कि ठेकेदार रामू बिहारी, जेकर ससुराल ग्राम पोंड़ी राछा विकासखंड नवागढ़ म हावय। ओ हर ए मजदूर मन ल ग्राम बगना थाना खासा पोस्ट गीचा तहसील अटारी जिला अमृतसर (पंजाब) ले जाके बंधक बनाके रख ले हावय।"
उमन कहना हे कि ए बंधक मजदूर मन ल कई महिना ले न तो मजदूरी देहे जात हे अउ न ही काखरो से संपर्क करे देवत हें। मजदूर मन ह कोनो तरा ले मोबाइल म लुका के विधायक मेर बात करके जम्‍मो 46 मनखे ल छोड़ाए के गिलौली करे हें। विधायक हर तुरंते प्रदेश के श्रममंत्री, पुलिस महानिदेशक, संभागायुक्त बिलासपुर, कलेक्टर व पुलिस अधीक्षक जांजगीर-चांपा ल चिट्ठी लिखके ए मामला के शिकायत करे हवंय।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment