हमला विरासत म मिले समस्या मन ले जूझना परत हे : रमन के गोठ

.. तेखर सेती हमर सफलता असाधारन हे
इक्कीसवीं कड़ी के होईस प्रसारण


जम्मो संगी-जहुंरिया, सियान-जवान, महतारी-बहिनी मन ला जय जोहार कहत प्रदेश के मुख्‍य मंत्री डॉ. रमन सिंह ह आज के 'रमन के गोठ' के सुरूवात करिन। उमन आज के गोठ म छत्तीसगढ़ माध्यमिक शिक्षा मण्डल के कक्षा दसवीं अउ कक्षा बारहवीं के नतीजा उपर गोठ करत कहिन कि ये बछर के नतीजा पउर साल ले बहुत अच्‍छा आए हे। ये बछर जादा लइका मन पा होए हे। उमन ए खातिर लइका मन ल, उंखर पालक मन ल अउ जमो गुरूजी मन बधाई तको दीन। उमन कोनो कारन से जउन लइका मन पास नइ हो पाइन या मनमाफिक नम्‍बर नइ ला पाइन उमन ल कहिन कि चिंता करे के जरूरत नइ हे भलुक अब ज्यादा तैयारी ले आघू के परीक्षा देवव अउ बने सहिन पास होवव।
उन ऐहू कहिन कि मोर मानना हे कि अइसे कोनो परीक्षा जिनगी के आखरी परीक्षा नइ होवय, आघू अड़बड़ अवसर मिलथे, तेमा आप मन अपन आप ल साबित कर सकत हौ। कक्षा बारहवीं में ये समें अव्वल आए पांच जिला मन म बालोद, मुंगेली, कांकेर, बेमेतरा अउ कबीरधाम के नाम हे। ये जमो जिला मन म शहर बहुत छोटे हे अउ कम हे, गांव जादा हे। तेखर बाद भी टॉप फाइव म ये जिला मन के आए के मतलब हे, गांव मन म शिक्षा के स्तर में सुधार आए हे।
उमन 27 में ले 23 जिला मन म लड़की मन के जादा नम्‍बर पाये के बात म खुशी जाहिर करिन। इही बात म उमन आघू कहिन कि येकर मतलब ये हे कि बालिका शिक्षा ल बढ़ावा देहे के हमार प्रयास सफल होवत हे, ये उपलब्धि खातिर मैं आज बेटी मन ल, उखंर पालक मन ल, उखंर स्कूल के गुरूजी मन सब ल बधाई देवत हंव। बेटी मन के ये सफलता के गोठ करत उमन माननीय प्रधानमंत्री जी के ‘बेटी बचाओ-बेटी पढ़ाओ’ के नारा ल गोहरावत कहिन कि हम येला सफल बनावत हन।
हालेच म केन्द्र सरकार कोति ले राष्ट्रीय स्तर म कराए गए सर्वे म छत्तीसगढ़ के ‘अंबिकापुर’ शहर देश में अव्वल आए हे ये संबंध म अउ छत्तीसगढ़ म चलत ‘स्वच्छता मिशन’ उपर उदघोषक के सवाल के जवाब देवत मुख्‍यमंत्री ह कहिन कि
सबले पहिली तो मैं अंबिकापुर के प्रशासन अउ जनता बधाई देवत हंव, काबर कि ओमन छत्तीसगढ़ के नाव रोशन करिन। दू लाख के आबादी वाले शहर मन के श्रेणी म अंबिकापुर ल पहिली नम्‍बर मिलना सहीच म बड़का उपलब्धि आए। आन शहर मन के बारे म उमन कहिन कि हम अभी प्रक्रिया से गुजरत हन। हमन राष्ट्रीय लक्ष्य 2019 के एक बछर पहिलिच अक्टूबर 2018 तक छत्तीसगढ़ ल स्वच्छता मिशन के मापदण्ड के अनुरूप स्वच्छ बनाए के लक्ष्य रखे हन अउ ऐ दिशा म आघू बढ़त हन। उमन कहिन कि ‘स्वच्छता सर्वेक्षण’ एक अयना ये जउन बीच के अंतराल म हमला सचेत करथे कि देश अउ प्रदेश के तैयारी कइसे हे अउ कतका तेजी ले आघू बढ़ना हे। छत्तीसगढ़ के संदर्भ में हम प्रदेश म स्वच्छता के अधोसंरचना अउ संस्कार निर्माण खातिर एक बेहतर लड़ाई लड़त हन। राज्य के सामाजिक-आर्थिक-भौगोलिक परिस्थिति अउ विरासत म मिले समस्या मन ल हल करत हमला एक संग कई क्षेत्र मन म काम करना परत हे, तेकर कारन हमला कोनो सफलता साधारण प्रयास ले नइ मिलय, हमला असाधारण प्रयास करे ल परथे। उमन ये बारे म गोठ करत अंतरराष्ट्रीय गायत्री परिवार के संस्थापक, महान चिंतक, आचार्य श्रीराम शर्मा जी के विचार ल तको साझा करिन।
भारतीय लोकतंत्र के इतिहास म 26 मई 2014 के ऐतिहासिक नतीजा अउ मोदी ल मिले जनादेश के संगें-संग 3 साल के शासनकाल म मोदी जी के बनाए योजना अउ उंखर लिए निर्णय के विस्‍तार ले गोठ करत मोदी के बड़ई करिन। उमन कहिन कि उंखर लाभकारी योजना ले आम जनता ल फायदा मिलते हे। उमन केन्‍द्र सरकार के जम्मो योजना के बात करत वो योजना ले जनता ल होवत लाभ के चर्चा करिन।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment