श्रीमती रमशिला साहू ह श्री थॉवर चंद गहलोत संग करिस मुलाकात


  • छत्तीसगढ़ मं दिव्यांग विद्यार्थी मन बर 500 अउ 100 बिस्तर के 12 छात्रावास के होही निर्माण

  • राज्य के 22 शासकीय भवन मन ल दिव्यांगजन मन बर बाधा रहित बनाए जाही

  • केन्द्र ले पहिली किश्त मं साढ़े छः करोड़ रूपिया जारी






रायपुर, 31 मई 2017। दिव्यांग विद्यार्थी मन बर छत्तीसगढ़ मं पांच सौ अऊ सौ बिस्तर के कुल 12 छात्रावास के निर्माण के स्वीकृति जल्दीच केन्द्र ले मिले के संभावना हे। नई दिल्ली के शास्त्री भवन मं छत्तीसगढ़ के महिला अउ बाल विकास मंत्री श्रीमती रमशिला साहू अऊ केन्द्रीय समाजिक न्याय व अधिकारिता मंत्री श्री थावर चंद गहलोत के बीच आज होए मुलाकात मं केन्द्रीय मंत्री श्री गेहलोत छत्तीसगढ सरकार के प्रस्ताव मन ल जल्दी स्वीकृति करे के आश्वासन दीन। श्रीमती रमशिला साहू हर बताइन कि छत्तीसगढ़ मं सुगम्य भारत अभियान के अंतर्गत 22 शासकीय भवन मन ल दिव्यांगजन मन के अनुकूल बनाए बर केन्द्र कोति ले कुल 14 करोड़ 17 लाख के प्रस्ताव भेजे गए रहिस। केन्द्रीय मंत्री हर ए काम बर साढ़े छः करोड़ के राशि पहिली किश्त के रूप मं आज जारी कर दीस।
श्रीमती साहू हर बताइस कि, सुगम्य भारत अभियान के अंतर्गत छत्तीसगढ़ मं दिव्यांग विद्यार्थी मन बर 500 सीट के छै अऊ 100 सीट के छै छात्रावास भवन निर्माण के प्रस्ताव केन्द्रीय मंत्री ल देहे गये हे। केन्द्रीय मंत्री हर एखर जल्दी स्वीकृति देहे के भरोसा देहे हे। श्रीमती साहू हर बताइस कि दिव्यांगजन मन के कल्याण बर 27 जिला मन मं कौशल उन्नयन प्रशिक्षण केन्द्र के स्थापना करे जाना हे। उमन प्रति केन्द्र भवन निर्माण, अउ हितग्रही ल प्रतिवर्ष प्रशिक्षित करे बर केन्द्र ले 72 करोड़ के राशि प्रदाय करे के घलोक मांग करे हे।
श्रीमती साहू ह, छत्तीसगढ़ के कई ठन प्रस्ताव जइसे - सेनसरी पार्क बर 50 लाख रूपिया, ए.डी.आई.पी. योजना के तहत सहायक उपकरण अउ कृत्रिम अंग बर 10.83 लाख रूपिया, दुर्ग ग्रामीण विधानसभा क्षेत्र बर सर्वसुविधायुक्त वरिष्ठ बहु सेवा केन्द्र स्थापित करे बर एक करोड़ रूपिया के राशि संग साल 2016-17 मं कई ठन योजना मन के अंतर्गत एक करोड़ 79 लाख रूपिया के केन्द्रीय सहायता दे जाय के घलोक मांग केन्द्र से करे हे। श्रीमती साहू हर केन्द्रीय मंत्री ल बताइन कि प्रस्ताव केन्द्र ल भेजे गए हे। केन्द्रीय मंत्री हर छत्तीसगढ़ के मांग मन ल गंभीरता से लेत प्रस्ताव मन म जल्दी जरूरी कार्यवाही करे के भरोसा देहे हे।








Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment