भाई ल गिफ्ट मं दीस चोरी के मोबाइल, फोन चालू करतेच पकड़ाइस

चोरी करके चोर तिरिथ-बरथ चल देथे






कवर्धा, पंडरिया के निहाल मोबाइल दुकान मं चोरी कदइया शातिर चोर ल क्राइम ब्रांच हर पकड़े हे। आरोपी तीर ले 11 नग मोबाइल अऊ 40 हजार रुपया नकद के संग एलईडी टीवी, पल्सर मोबाइल अऊ सेलून के कुछ सामान जब्त करे गए हे।
बिरसपतवार के दिन पुलिस अधीक्षक कार्यालय मं पुलिस अधीक्षक डी.रविशंकर हर मामला के खुलासा करिस। पुलिस अधीक्षक हर बताइस कि आरोपी हर चोरी के एक मोबाइल अपन भाई ल गिफ्ट करे रहिस। ओखर भाई हर जइसे फोन चालू करिस, हमला लोकेशन मिल गए। एखर बाद आरोपी ल गिरफ्तार कर ले गीस। आरोपी के नाम लोकेश श्रीवास, पिता कपिल श्रीवास (24), साकिन नवापारा थाना पांडातराई हे। अभी हाल मं वो कैलाश नगर मं रहत रहिस अऊ बस स्टैंड मं सेलून चलात रहिस हे।
लोकेश एखर पहिली सन 2015 मं नवीन बाजार के कपड़ा दुकान मं चोरी के आरोप मं गिरफ्तार होए रहिस हे। आरोपी हर भिलाई के सुपेला मं सन् 2016 मं एक दुकान ले 80 हजार रुपया चोराए के आरोप घलोक स्वीकार करे हे। ए रूपया ले आरोपी हर पल्सर बाइक खरीदे रहिस, जऊन ल जब्त कर ले गए हे। पंडरिया के निहाल मोबाइल शॉप मं 19-20 अपरेल के रात कन चोरी होए रहिस हे। एखर बाद ले पुलिस आरोपी के तलाश करत रहिस हे। आरोपी ल गिरफ्तार करे मं क्राइम ब्रांच के टी.आई. दुर्गेश्वरी चौबे, एस.आई. सचिन गुमाश्ता, प्रधान आरक्षक चंद्रकांत तिवारी संग टीम के आन सदस्‍य के योगदान रहिस, जेखर बर एसपी हर पूरा टीम ल बधाई देहे हे।
पांडातराई के मोबाइल दुकान मं चोरी करइया ये आरोपी हर बताइस कि चोरी करे के बाद वो घूमे ल निकल जात रहिस हे। सन् 2016 मं सुपेला भिलाई मं चोरी करे के बाद वो ह वैष्णोदेवी के दर्शन करे बर चल देहे रहिस हे। एखर पहिली घलोक आरोपी चोरी करे के बाद गुजरात, उज्जैन संग आन कई ठन तिरिथ घूमके आ गए हे।








Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment