राज्य म अन्तर्राष्ट्रीय योग दिवस के तैयारी शुरू


  • उच्‍च शिक्षा मंत्री श्री पाण्डेय के अध्यक्षता म बैठक

  • एन.एस.एस. के विद्यार्थी मन बर 15-21 जून तक होही योग फेस्ट के आयोजन

  • एन.एस.एस. के वार्षिक पत्रिका ’समर्पण’ अउ टेलीफोन डारेक्टरी के विमोचन


रायपुर 16 मई 2017। अन्तर्राष्ट्रीय योग दिवस के तैयारी छत्तीसगढ़ म घलोक शुरू हो गए हे। ये दिवस हर साल 21 जून को मनाए जाथे। राज्य सरकार के उच्‍च शिक्षा विभाग हर घलोक एखर बर अपन तैयारी चालू कर दे हावय। ए सिलसिला म उच्‍च शिक्षा मंत्री श्री प्रेमप्रकाश पाण्डेय हर आज इहां मंत्रालय (महानदी भवन) म विभागीय अधिकारी मन, राष्ट्रीय सेवा योजना (एन.एस.एस.) के अधिकारी मन, विश्वविद्यालय अउ कॉलेज के प्राध्यापक मन के बैठक लीन। श्री पाण्डेय हर ओ मन ल योग दिवस के पहिली 15 जून ले राज्य म राष्ट्रीय सेवा योजना इकाईय मन ले जुड़े छात्र-छात्रा मन के शिविर योग फेस्ट के रूप म आयोजित करे के निर्देश दीन। ये शिविर 21 जून तक चलही।
बैठक म उच्‍च शिक्षा मंत्री श्री पाण्डेय हर राष्ट्रीय सेवा योजना के वार्षिक पत्रिका ‘समर्पण’ अउ एक टेलीफोन डायरेक्टरी के घलोक विमोचन करिस। अधिकारी मन हर बैठक म बताइन कि पाछू साल राजधानी रायपुर के कृषि विश्वविद्यालय परिसर म 4 दिवसीय योग-फस्ट शिविर आयोजित करे गए रहिस, जेमा राज्य के एन.एस.एस. के विद्यार्थी सामिल होए रहिन। उच्‍च शिक्षा मंत्री श्री प्रेमप्रकाश पाण्डेय हर कहिन कि राष्ट्रीय सेवा योजना ले छात्र-छात्रा मन के अध्ययन के संग ग्रामीण परिवेश ल जाने अउ समझे अउ सामाजिक दायित्व मन के निर्वाह करे बर अवसर मिलथे। अइसन शिविर मन के उद्देश्य छात्र-छात्रा मन ल जादा ले जादा विकासोन्मुखी कार्यक्रम मन ले जोड़े के हावय। उमन कहिन कि राष्ट्रीय सेवा योजना के विद्यार्थी योग के फायदा के बारे म जानकारी, शहरी अउ ग्रामीण क्षेत्र के लोगन तक पहुंचा सकत हावंय। योग सकारात्मक ऊर्जा प्रदान करथे, ये मनखे के शारिरिक अउ मानसिक विकास बर बहुत जरूरी हावय।
बैठक म अपर मुख्य सचिव श्री सुनील कुजुर हर अपन कॉलेज के अनुभव मन ल साझा करत कहिन कि ओ मन घलोक छात्र जीवन म राष्ट्रीय सेवा योजना ले जुड़े रहिन। उमन राष्ट्रीय सेवा योजना ले जुड़े जम्‍मो लोगन ल ऊंखर अच्छा सामाजिक कार्य मन बर बधाई अउ शुभकामना दीन। बैठक म डॉ. समरेन्द्र सिंह हर राष्ट्रीय सेवा योजना के गतिविधि मन के विस्तृत जानकारी दीन। बैठक मं पंडित रविशंकर विश्वविद्यालय रायपुर, स्‍वामी विवेकानंद तकनीकी विश्वविद्यालय भिलाई अउ इंदिरा गांधी कृषि विश्वविद्यालय ले राष्ट्रीय सेवा योजना के उल्लेखनीय कार्य के प्रस्तुतिकरण दे गीस।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment