मुख्यमंत्री के घोषणा के छठवां दिन ले मिले लगिस बैंकिंग सेवा

महानदी के उदगम क्षेत्र मं लोक सुराज के एक बड़का उपलब्धि


रायपुर, 12 मई 2017। महानदी के उदगम स्थल सिहावा मं मुख्यमंत्री डॉ. रमन सिंह के घोषणा के सिरिफ एक हफ्ता के भीतर गांव वाले मन ल आज ले बैंकिंग सुविधा मिले लगिस। आप मन जानतेच होहू कि प्रदेश व्यापी लोक सुराज अभियान के तहत मुख्यमंत्री छै दिन पहिली सात मई के दिन उहां अचानक पहुंचे रहिन। उमन सिहावा मं आयोजित समाधान शिविर मं स्थानीय मनखे मन के अनुरोध म सिहावा मं बैंक के प्रारंभिक सेवा लउहे शुरू करे के घोषणा करे रहिन अऊ मुख्य सचिव श्री विवेक ढांड ल एखर खातिर जल्दी कार्रवाई करे के निर्देश दे रहिन। मुख्यमंत्री हर कहे रहिन कि लोगन ल बैंक सेवा मन ले जोड़े बर फिलहाल वैकल्पिक व्यवस्था करे जाही अऊ बहुत जल्दी उहां कोनो राष्ट्रीयकृत बैंक के शाखा घलोक शुरू करे जाही।
राज्य सरकार के अधिकारी मन तत्परता ले पहल करत मुख्यमंत्री के घोषणा के छठवांच दिन उहां छत्तीसगढ़ ग्रामीण बैंक के तरफ ले बिजनेस कॉरेस्पांडेंट नियुक्त कर दीन। ये ग्रामीण बैंक के माइक्रो एटीएम अऊ ग्राहक सेवा केन्द्र के रूप मं काम करही। सिहावा क्षेत्र के सर्वश्री अंजोर सिंह, चंद्रशेखर शांडिल्य, जनपद सदस्य श्रीमती प्रीति यदु, सरपंच श्रीमती उषा देवी नाग, पंच श्री किशन नाग अऊ आन कई गांव वाले मन हर बैंकिंग सुविधा शुरू होए म एला अपन बर अऊ अपन क्षेत्र के हजारों मनखे मन बर लोक सुराज अभियान के एक बड़े उपलब्धि बताए हें। गांव वाले मन हर एखर खातिर मुख्यमंत्री ल धन्यवाद दीन। स्थानीय निवासी श्री अंजोर सिंह के कहना रहिस कि ग्राम पंचायत मुख्यालय सिहावा ए इलाका मं व्यापार-व्यवसाय के प्रमुख केन्द्र के रूप मं तेजी ले उभरत हावे। राईस मिल, पोल्ट्री फार्म संग कई ठन विभाग मन के बहुत अकन स्थानीय कार्यालय इहां संचालित होवत हे। एला देखत बैंक सुविधा के जरूरत इहां अड़बड़ दिन ले महसूस करे जात रहिस हे।
गांव वाले मन बताइन कि राष्ट्रीयकृत बैंक सिहावा ले दस किलोमीटर दूरिहा विकासखण्ड मुख्यालय नगरी मं हे, जिहां अड़बड़ भीड़ रहिथे। सिहावा के लोगन मन ल ओ बैंक शाखा मं जाय म भिनसरहा ले मंझनिया नइ तो संझा तक लाईन म अगोरे ल परथे, फेर अब सिहावा मं ग्रामीण बैंक के माइक्रो एटीएम अऊ ग्राहक सेवा केन्द्र शुरू हो जाए ले हमन ल अड़बड़ राहत मिलही। सिहावा मं बैंक सुविधा शुरू हो जाय म तीर-तखार के गांव पाईकभाठा, सोनागर, पंडरीपानी, सेमरा, बिरगुड़ी, टांगापानी, चर्रा अऊ सिरसिदा संग अंदाजन 24 गांव मन के 25 हजार के आबादी ल एखर लाभ मिलही। सरपंच श्रीमती उषादेवी नाग ह कहिस- ख्एकर से अब हमार क्षेत्र के गांव वाले मन म बचत के प्रवृत्ति ल प्रोत्साहन मिलही अऊ इलाका मं बैंक सेवा के संग आर्थिक विकास के नवा दौर के शुरूआत होही। धमतरी जिला के कलेक्टर डॉ. सी.आर. प्रसन्ना हर आज सिहावा मं छत्तीसगढ़ ग्रामीण बैंक के ग्राहक सेवा केन्द्र (बिजनेस कॉरेस्पांडेंट) अउ माइक्रो एटीएम के शुभारंभ करिस। लीड बैंक मैनेजर श्री अमित रंजन हर बताइस कि सिहावा मं बैंक शाखा स्थापित करे बर जिला प्रशासन के सहयोग ले उदीम करे जात हे
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment