छत्‍तीसगढ़ के आधा विधायक अउ मंत्री मन के कटही टिकट

रायपुर, प्रदेश म चौथइया पइत जीत के सरकार बनाए बर उदीम करत भाजपा ह अपन विधायक अउ मंत्री मन के काम ल देख के टिकट बांटही। अभी के विधायक मन ल अपन राजनीति ल सरलग राखे बर सिरिफ एक साल के मौका मिलही, काबर कि पार्टी के सुरूवाती सर्वे रिपोट के अनुसार ए पईत 50 परसेंट विधायक मन के टिकट कट सकत हे।
लोक सुराज अभियान ले वापस लौटे मुख्यमंत्री डॉ. रमन सिंह हर घलोक एखर बात के संकेत दे दे हावय। यानी ये वाले तय हावय कि चौथईया पइत मनखे नहीं, उंखर काम के मान होही। जउन जीत सकहीं उही मन ल विधायक के टिकट देहे जाही। लोक सुराज अभियान के बेरा मुख्‍यमंत्री ह गांव-गांव जाके शासन-प्रशासन के संगें संग जनप्रतिनिधि मन के काम के घलव समीक्षा करे हावंय। हर जिला म जम्‍मो वर्ग के लोगन ले मिल के जनप्रतिनिधि मन के काम के बारे म जानकारी लेहे हावंय।
खबर हवय के ये पईत के चुनाव म 50 परसेंट सीट मन म नवा आदमी ल टिकट देहे जाही। प्रदेश के 90 सीट म 49 विधायक भाजपा के हावय अउ 13 मंत्री हावय। कहूं विधायक मन बेरा रहत पार्टी के मनमुताबिक अपन काम-धाम म नइ लगहीं त उंखर अगला टिकट कट जही।
विधायक मन के टिकट बंचाए म ऊंखर कामकाज के संगें-संग सोशल मीडिया घलोक बड़का आधार होही। पार्टी ह उत्तरप्रदेश चुनाव म ए बुता करके देख डारे हे अउ ये उदीम ले उत्‍तर प्रदेश म भारी बहुमत तको आइस हे। पाछू समें पार्टी के अध्‍यक्ष अमित शाह ह रायपुर म मंत्री मन मेर पूछे रहिस कि आप मन के ट्विटर एकाउंट हवय के नहीं। मंत्री मन म बृजमोहन अग्रवाल, राजेश मूणत, अजय चंद्राकर, महेश गागड़ा, केदार कश्‍यप, रमशिला साहू मन ट्विटर म सक्रिय हवंय फेर इंखर ट्विटर ल कमिया-पहटिया ह चलावत हवय के मंत्री मन खुदे चलावत हवय अभी गम म नई आवत हे।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment