कृषि मत्री श्री अग्रवाल पहुंचिन मठपुरैना के समाधान शिविर म

आवेदन मन के निराकरण लउहे करे करे के दीन निर्देश





रायपुर 08 मई 2017। कृषि मत्री श्री बृजमोहन अग्रवाल हर आज लोक सुराज अभियान के तहत रायपुर नगर निगम अंतर्गत मठपुरैना म आयोजित समाधान शिविर म कई विभाग मन म एक-डेढ़ महीना पहिली ले मिले आवेदन मन के निराकरण नइ होए म गुसियईन । श्री अग्रवाल हर जिला प्रशासन अऊ नगर निगम रायपुर के वरिष्ठ अधिकारी मन ल ए मामला के तुरंत जांच करके रिपोट देहे अउ एखर खातिर जिम्मेदार अधिकारी अऊ कर्मचारी मन के खिलाफ कार्रवाई करे के निर्देश दीन।
श्री अग्रवाल दोपहर बाद समाधान शिविर म पहुंचके सबसे पहिली कई विभाग के लगाए गए स्टाल मन के अवलोकन करिन। एखर बाद लोक सुराज अभियान के तहत कई ठन विभाग मन ल मिले मांग अऊ शिकायत ले संबंधित आवेदन मन के निराकरण के समीक्षा शुरू करिन। मठपुरैना समाधान शिविर म रायपुर नगर निगम के नौ वार्ड के आवेदन मन के समीक्षा करे गीस। श्री अग्रवाल हर खाद्य विभाग ल ए वार्ड मन के निवासी मन ले आए आवेदन मन के बड़ संख्या म लंबित होए म सबसे पहिली जिला प्रशासन अऊ नगर निगम के खाद्य विभाग के अधिकारी मन ल तलब करिन। अधिकारी मन हर बताय कि सब्बो आवेदन राशनकार्ड म नाम जोड़ने अउ नवा राशन कार्ड बनाए के संबंध म हावे। कृषि मत्री हर खाद्य विभाग के अधिकारी मन ल राशन कार्ड बनाए या राशनकार्ड म नाम जोड़े के आवेदन मन के चेकलिस्ट बनाए के निर्देश दीन। नगर निगम के अधिकारी मन ले कहिन कि राशनकार्ड ले संबंधित आवेदन मन ल खाद्य विभाग ल भेजत समय आवेदन मन म पूरा विवरण दर्शाया जाना चाही। नगर निगम से अनुमोदन के आधार म ही राशनकार्ड बनाए जाथे। श्री अग्रवाल हर खाद्य विभाग ले संबंधित आवेद मन के 30 मई तक निराकरण कर रिपोट भेजे के निर्देश दीन।
श्री अग्रवाल हर श्रमिक मन के कार्ड बनाए जाय के धीमी प्रगति म घलोक असंतोष व्यक्त करिन। श्रम विभाग के अंतर्गत 7860 आवेदन आए के जानकारी दे गीस। जिला प्रशासन के श्रम विभाग के अधिकारी मन हर बताइन कि आवेदन मन म कार्रवाई करत श्रमिक कार्ड बनाए के काम चलत हे। श्री अग्रवाल हर अधिकारी मन ले कहिन कि चाईस सेंटर मन के माध्यम ले श्रमिक कार्ड बनाए के आवेदन लेहे जात हे। कार्ड बने के बाद ओकर वितरण घलोक चाईस सेंटरों के माध्यम ले होना चाही। श्री अग्रवाल हर नगर निगम के अधिकारी मन ल निर्देशित करत कहिन कि श्रमिक कार्ड बनाए के आवेदन मन म समस्त जरूरी औपचारिकता पूरा करे के बाद श्रम विभाग ल भेजे जाय।
कृषि मत्री हर निराश्रित पेंशन के आवेदन मन के निराकरण के जानकारी घलोक अधिकारी मन से लीन। कृषि मत्री के पूछे म अधिकारी मन हर बताइन कि सामाजिक सुरक्षा पेंशन स्वीकृति ले संबंधित 300 आवेदन मन के निराकरण हो चुके हे। श्री अग्रवाल हर कहिन कि ए हितग्राहि मन ल पेंशन भुगतान बर खाता खोलवाए के कार्रवाई बिना देरी करे करे जाय। शिविर म भैरवनगर अऊ परशुराम नगर के निवासीम न हर पेयजल के आपूर्ति नइ होए के शिकायत करिन। कृषि मत्री हर एखर खातिर लोक स्वास्थ्य यांत्रिकी विभाग के अधिकारी मन से सवाल करिन। उमन तुरंत पाईप लाईन बिछाके पेयजल देवाए के निर्देश दीन। उमन ल कुशालपुर अऊ लाखेनगर के टंकी ल पूरा नइ भरे के जानकारी मिले म अधिकारी मन से पूछताछ करे गीस। अधिकारी मन हर बताइन कि ए टंकी मन ले निरधारित लक्ष्य के पानी सप्लाई करे बर पाईप लाईन बिछाए के काम चलत हे। श्री अग्रवाल हर ए स्थिति म असंतोष व्यक्त करत कहिन कि गर्मी के मौसम म लोगन ल पीये के पानी देहे खातिर पाईप लाईन बिछाए के काम जल्द से जल्द पूरा होना चाही।
शिविर म रायपुर विकास प्राधिकरण के उपाध्यक्ष श्री रमेश ठाकुर, छत्तीसगढ़ भवन अउ सन्निर्माण कर्मकार कल्याण मडल के उपाध्यक्ष श्री सुभाष तिवारी, जोन छै अध्यक्ष श्री सालिक सिंह ठाकुर, पार्षद श्री सतनाम सिंह पनाग, पार्षद श्री मनोज वर्मा, पार्षद श्री शमीम अख्तर संग सर्वश्री विजय अग्रवाल, चूड़ामणि निर्मलकर अऊ आन स्थानीय जनप्रतिनिधि बड़ संख्या म उपस्थित रहिन।




style="display:block"
data-ad-client="ca-pub-3208634751415787"
data-ad-slot="4115359353"
data-ad-format="link">

Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment