मुख्यमंत्री सामिल होइन दरगाहन के समाधान शिविर म


  • चारामा क्षेत्र के 44 मजरा-टोला के विद्युतीकरण दिसम्बर 2017 तक होही पूरा

  • लो वोल्टेज के समस्या के घलोक होही समाधान

  • चारामा म स्वीकृत 132 के.व्ही. विद्युत उपकेन्द्र के निर्माण जल्द चालू करव

  • मुख्यमंत्री हर समाधान शिविर म दे निर्देश

  • दरगाहन म नल-जल योजना के टंकी अउ विद्युत लाइन विस्तार के स्वीकृति





रायपुर, 15 मई 2017। चारामा क्षेत्र के गांव मन म लो वोल्टेज के समस्या के जल्द होही समाधान। मुख्यमंत्री डॉ. रमन सिंह हर आज मंझनिया कांकेर जिला के चारामा विकासखंड के ग्राम दरगाहन म आयोजित समाधान शिविर म चारामा क्षेत्र म लो वोल्टेज के समस्या के समाधान बर चारामा म स्वीकृत 132 के.व्ही. क्षमता के विद्युत उपकेन्द्र के निर्माण के काम जल्द चालू करे के निर्देश विद्युत विभाग के अधिकारी मन ल दीन। ए केन्द्र के बने ले गांव मन म लो वोल्टेज के समस्या के समाधान हो जाही। उमन कहिन कि चारामा क्षेत्र के 44 मजरा-टोला मन ल विद्युतीकरण करे के काम ए साल दिसम्बर तक पूरा कर लेहे जाही। अधिकारी मन हर समाधान शिविर म बताइन कि ए विद्युत उपकेन्द्र बर टेंडर के प्रक्रिया पूरा हो गे हावय अउ जमीन अधिग्रहण के काम प्रगति म हावय। मुख्यमंत्री हर आम जनता के सामने खुला मंच म लोक सुराज अभियान म आए आवेदन मन उपर करे गे कार्रवाई के समीक्षा करिन।
मुख्यमंत्री हर गांव वाले मन के आग्रह म दरगाहन के नल-जल योजना बर टंकी निर्माण अउ गांव म विद्युत लाइन विस्तार के मंजूरी प्रदान करिन। उमन गिरहोला हाई स्कूल के उन्नयन एही सत्र ले हायर सेकेण्डरी स्कूल के रूप म करे के घोषणा समाधान शिविर म करिन। गांव वाले मन के आग्रह म उमन अटल चौक म एक हैंडपम्प के स्वीकृति प्रदान करिन। उमन गांव के मुक्तिधाम म शेड निर्माण बर 6 लाख रूपया के मंजूरी प्रदान करिन। मुख्यमंत्री हर गांव के आंगनबाड़ी केन्द्र के निरीक्षण घलोक करिन। मुख्यमंत्री हर आंगनबाड़ी के बच्चा मन ले अपनेपन अउ आत्मीयता के संग बातचीत करिन। मया पाके लइका मन मुख्यमंत्री के संग घुलमिल गें। उमन उहां सामुदायिक भागीदारी ले बाल भोज कराए के व्यवस्था बर ग्रामवासी मन के सराहना करिन। आंगनबाड़ी म एक अक्षय पात्र रखे गए हावय, जेमां मनखे स्वेच्छा ले अनाज अउ सब्जी देवत हावंय। आंगनबाड़ी म सामान्य, कुपोषित अउ गंभीर कुपोषित बच्चा मन के फोटू घलोक लगाए गे हावय। गिरहोला गांव के हाईस्कूल के दू छा़त्र उदित देवांगन अउ राहुल कुमार साहू ल मुख्यमंत्री हर समाधान शिविर के मंच म बुलाकार सम्मानित करिनस। एमां ले एक छात्र उदित देवांगन कक्षा दसवीं के बोर्ड परीक्षा म मेरिट म स्थान बनाए म सफल रहे हे अउ एक छात्र राहुल कुमार साहू एक अंक ले मेरिट म आए से चूक गए हे। मुख्यमंत्री हर दुनों छात्र मन के उत्साहवर्धन करिस अउ ओ मन ल उज्ज्वल भविष्य बर आशीर्वाद प्रदान करिस। अधिकारी मन हर शिविर म गांव वाले मन ले आए आवेदन मन उपर करे गे कार्रवाई के जानकारी मंच म दीन। मुख्यमंत्री हर दरगाहन कलस्टर के छै ग्राम पंचायत, चारभांठा, चावड़ी, दरगाहन, गिरहोला, सिरसिदा अउ जैसाकर्रा म लोक सुराज अभियान के अंतर्गत गांव वाले मन से प्राप्त आवेदन मन के निराकरण बर करे गे कार्रवाई के समीक्षा आम जनता के आघू करिन। मुख्य सचिव श्री विवेक ढांड घलोक ए अवसर म उपस्थित रहिन।





Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment