गरियाबंद मं खुलही किसान उपभोक्ता बजार


  • कृषि मंत्री श्री अग्रवाल हर दीस 50 लाख रूपया के स्वीकृति

  • गरियाबंद ल जैविक जिला बनाए बर सबो विभाग मन ल समन्वय ले काम करे के निर्देश

  • कृषि मंत्री हर लीस जिला अधिकारी मन के समीक्षा बैठक


रायपुर 17 मई 2017। कृषि मंत्री श्री बृजमोहन अग्रवाल ह जिला मुख्यालय गरियाबंद मं किसान-उपभोक्ता बाजार शुरू करे के स्वीकृति दे हावे। एखर खातिर उमन 50 लाख रूपया मंजूर करे हावे। श्री अग्रवाल हर कल रात म गरियाबंद के कलेक्टोरेट के सभाकक्ष मं लोक सुराज अभियान के तहत गरियाबंद जिला के समीक्षा बैठक मं किसान-उपभोक्ता बाजार के स्वीकृति देवत ए खातिर जरूरी तैयारी तुरंते शुरू करे के निर्देश दीन। उमन बताइन कि किसान उपभोक्ता बाजार केवल किसान ही अपन नगदी फसल मन के उपज ल बेच सकहीं। ए बाजार ले किसान मन अऊ उपभोक्ता मन ल फायदा होही। बाजार मं कोचिया अऊ बिचौलिया मन बर कोनो जघा नइ होही।
कृषि मंत्री श्री अग्रवाल हर बैठक मं गरियाबंद ल जैविक जिला बनाए बर सबो विभाग मन ल मिलके काम करे के निर्देश दीन। उमन जिला के सबो विकासखण्ड मन मं गौशाला बर 25-25 एकड़ जमीन आरक्षित करे अउ खरीफ फसल बर खाद-बीज के भण्डारण सुनिश्चित करे के संग अग्रिम उठाव बर किसान मन ल प्रेरित करे के निर्देश दीन। श्री अग्रवाल हर गरियाबंद जिला मं सिंचित रकबा बढ़ाए बर प्रधानमंत्री कृषि सिंचाई योजना अंतर्गत माईक्रो एरिगेशन के प्लान बनाए बर कहिस। किसान मन ल उंखर जमीन के माटी स्वास्थ्य कार्ड के वितरण 30 मई तक सुनिश्चित करे अउ जिला मं स्थित सबो बांध अउ एनीकट मन के 15 दिन के भीतर सर्वे करके टूटफूट के मरम्मत कराए के निर्देश दीन। श्री अग्रवाल हर गांव मन के किनारे ले बहइया नदी-नाला मं नरेगा के माध्यम ले गहरीकरण अउ चौड़ीकरण करके चेकडेम बनाए बर प्रस्ताव बनाए के निर्देश घलोक दीन। जलाशय मन ले सिंचाई बर बनाय गए नहर मन से अइसन क्षेत्र जिहां सिंचाई के पानी दे के प्रस्ताव नइ हे, वो क्षेत्र मंन म जमीन के भीतर ले पाईप बिछाए के कार्ययोजना बनाए के निर्देश दीन। उमन सब्बो जिला कार्यालय मन मं शिकायत पंजी संधारित करके आम जनता ले आए आवेदन मन ल दर्ज करत नियमानुसार निराकृत करे बर निर्देशित करिन।
कृषि मंत्री श्री अग्रवाल हर लोक सुराज अभियान के तहत आए आवेदन अउ ओखर निराकरण के घलोक विस्तार ले समीक्षा करिन। कलेक्टर श्रुति सिंह हर बताइस कि लोक सुराज अभियान के तहत गरियाबंद जिला मं 95 हजार 358 आवेदन प्राप्त होए रहिस, जेमा ले 92 हजार 233 आवेदन मन के निराकण करे जा चुके हे अउ 3125 लंबित हे। श्री अग्रवाल ले पंचायत अउ ग्रामीण विकास, लोक स्वास्थ्य यांत्रिकी, विद्युत मंडल, खाद्य अउ नागरिक आपूर्ति, जल संसाधन, कृषि, उद्यानिकी, पशुधन विकास विभाग, मंडी बोर्ड आदि विभाग ल लोक सुराज अभियान के समय प्राप्त आवेदन अऊ ऊंखर निराकरण के संगेच विभागीय गतिविधि मन के समीक्षा करिन।
ए अवसर म संसदीय सचिव श्री गोवर्धन मांझी, राजिम विधानसभा क्षेत्र के विधायक श्री संतोष उपाध्याय, गरियाबंद जिला पंचायत के अध्यक्ष डॉ श्वेता शर्मा, नगर पालिका परिषद गरियाबदं के अध्यक्ष श्रीमती मिलेश्वरी साहू, कलेक्टर श्रुति सिंह, पुलिस अधीक्षक जितेन्द्र मीणा संग जम्‍मों विभाग के जिला प्रमुख अधिकारी उपस्थित रहिन।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment