पटवारी हर सोम-मंगल ग्राम पंचायत भवन म मिलही

रायपुर, 29 मई 2017। राज्य सरकार हर पटवारी मन ल ऊंखर मुख्यालय के ग्राम पंचायत भवन म हरेक सोमवार अउ मंगलवार के दिन अनिवार्य रूप ले मौजूद रहे के आदेश जारी कर दे हावय। मुख्यमंत्री डॉ. रमन सिंह के निर्देश म लउहे अमल करत राजस्व विभाग हर इहां मंत्रालय (महानदी भवन) ले ये आदेश जारी करे हावय। आदेश के अनुसार पटवारी हर सोमवार अउ हर मंगलवार को बिहनिया 10.30 बजे ले संझा 5.30 बजे तक अपन पटवारी हल्का के मुख्यालय स्थित ग्राम पंचायत भवन म उपस्थित रहिहीं अउ किसान मन अउ गांव वाले मन के राजस्व विभाग ले संबंधित समस्या मन के निराकरण करहीं।
आप मन जानतेच होहू कि मुख्यमंत्री डॉ. रमन सिंह ह ए साल के प्रदेश व्यापी लोक सुराज अभियान के समय गांव मन के सघन दौरा म किसान मन के ये शिकायत मिले रहिस कि कई पटवारी अपन मुख्यालय म उपस्थित नइ रहंय एखर वजह से ओ मन ल राजस्व संबंधित कागद मिले म परेशानी होथे। मुख्यमंत्री ह किसान मन के ए समस्या ल गंभीरता से लेहे रहिन ओ मन आश्वासन देहे रहिन कि एखर बर जल्‍दी निर्देश जारी करे जाही। उमन 09 मई को राजधानी रायपुर म आयोजित राजस्व विभाग के समीक्षा बैठक म अधिकारी मन ल ये सुनिश्चित करे के निर्देश दीन कि पटवारी अनिवार्य रूप ले अपन मुख्यालय के ग्राम पंचायत भवन म हर सोमवार अउ मंगलवार के दिन मौजूद रहय।
मुख्यमंत्री के निर्देश के परिपालन म राजस्व विभाग ले जारी आदेश म कहे गए हे कि कहूं पटवारी तीर एक से जादा पटवारी हल्का के प्रभार हावय त वो अपन असली पदस्थापना वाले पटवारी हल्का मुख्यालय के ग्राम पंचायत भवन म उपस्थित रहि के जमीन संबंधी समस्या मन के जानकारी लेहीं अउ आवेदन तको लेहीं। जऊन आवेदन पत्र, समस्या मन के निराकरण ग्राम पंचायत भवन ले ही संभव होही, वो आवेदन पत्र के निराकरण उही दिन करहीं। अऊ आवेदन, जेकर निराकरण पटवारी ले करे जाना होही ओखर निराकरण ओ हफ्ता के आन दिन म करही। जऊन आवेदन मन के निराकरण तहसील स्तर ले होना हावय, वो आवेदन पत्र ल संबंधित तहसीलदार ल प्रस्तुत करहीं। हरेक सोमवार अउ मंगलवार के दिन पटवारी मन ल अपन हल्का मुख्यालय के ग्राम पंचायत भवन म ऊंखर समक्ष मौखिक या लिखित रूप ले मिले समस्या अउ ओकर निराकरण ल एक रजिस्टर म लिखहीं। अउ संबंधित आवेदनकर्ता मन से हस्ताक्षर घलोक लेंहीं। पटवारी अपन ग्राम पंचायत भवन म निरधारित स्थल ल छोड़के नइ जाय।
आदेश म स्पष्ट कहे गए हे कि सोमवार अउ मंगलवार के दिन कोनो अधिकारी या पदाधिकारी मन पटवारी मन ल अपन कार्यालय म नइ बलावंय अउ न ही ओखर कोनो आन काम म डयूटी लगाए जाय। आदेश म यहू कहे गए हे कि कोनो अधिकारी के संग पटवारी मन ल आहूत करे या अऊर काम म ड्यूटी लगाय के कारण कहूं पटवारी अपन हल्का मुख्यालय के ग्राम पंचायत भवन म तय करे दिन मन म म उपस्थित नइ होही त संबंधित अधिकारी के विरूद्ध अनुशासनात्मक कार्रवाई करे जाही।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment