सरकारी कर्मचारी मन के बीमा राशि के दर म बढ़ोतरी

रायपुर, 29 मई 2017। राज्य शासन हर छत्तीसगढ़ शासकीय कर्मचारी समूह बीमा योजना 1985 के अंशदान अउ अनुरूपी बीमा राशि के दर म एक जुलाई 2017 ले शत-प्रतिशत बढ़ोतरी करत प्रति इकाई (यूनिट) के दर 60 रूपया करे के निर्णय ले हावय। वित्त विभाग ले ए आशय के परिपत्र सनिवार 27 मई को इहां मंत्रालय (महानदी भवन) से अध्यक्ष राजस्व मण्डल बिलासपुर सहित सब्बो विभागाध्यक्ष, संभागीय कमिश्नर अउ जिला कलेक्टर मन ल जारी कर दे गए हे।
परिपत्र म कहे गए हे कि कर्मचारी समूह बीमा योजना के अभी के दर मन एक जुलाई 2003 ले लागू हावय। ओ दर म बढ़ोतरी के प्रस्ताव शासन मेरन विचारधीन रहिस। कई कर्मचारी संघ मन से विचार करे के बाद राज्य शासन हर ओ दर म एक जुलाई 2017 (जून 2017 के वेतन जुलाई 2017 म देय) ले संशोधित बीमा राशि के दर निरधारित करे हे। नवा दर म समूह-ए-प्रथम श्रेणी कर्मचारी वर्ग के अभिदान हर महीना 480 रूपया अउ बीमा राशि चार लाख 80 हजार रूपया, समूह-बी-द्वितीय श्रेणी कर्मचारी वर्ग के अभिदान 360 रूपया हर महीना अउ बीमा राशि तीन लाख 60 हजार रूपया, समूह-सी-तृतीय श्रेणी कर्मचारी वर्ग के अभिदान 300 रूपया हर महीना अउ बीमा राशि तीन लाख रूपया अउ समूह-डी-चतुर्थ श्रेणी कर्मचारी वर्ग के अभिदान हर महीना 180 रूपया अउ बीमा राशि एक लाख 80 हजार रूपया निरधारित करे गए हे।
परिपत्र म कहे गए हे कि पहिली के जइसे अभिदान के हर एक इकाई के 30 प्रतिशत हिस्सा बीमा निधि अउ बांचे 70 प्रतिशत हिस्सा बचत निधि म जमा होही। सेवा निवृत्त होए म शासकीय सेवक मन ल ओखर बचत निधि खाता म जमा राशि के भुगतान ब्याज सहित करे जाही। सेवा म रहत शासकीय सेवक के मृत्यु हो जाय म ओखर आश्रित कुटुंब ल बीमा राशि के पात्रता होही अउ एखर अलावा ए योजना के तहत बचत निधि खाता म संचित राशि के भुगतान घलोक ब्याज सहित करे जाही। एक जुलाई 2017 से अभिदान (बीमा निधि, बचत निधि) के बढ़े दर उन जम्‍मो कर्मचारी मन ल अनिवार्य होही, जऊन अभी हाल म समूह बीमा योजना 1985 के सदस्य हावय। अइसन शासकीय सेवक मन ल अभिदान के बढ़े दर स्वीकार करे या नइ करे के विकल्प के पात्रता नइ होवय। अइसन सब्बो शासकीय सेवक जऊन अभिदान के संशोधित दर के अधिसूचित करे जाय के बाद सेवा म आहीं, ओ मन घलोक अनिवार्य रूप ले एक जुलाई 2017 ले अभिदान (बीमा निधि, बचत निधि) के संशोधित दर के संगेच योजना म सम्मिलित होहीं। ए अधिसूचना के जारी होए के तारीक के बाद सेवा म अवइया कर्मचारी मन ल शासकीय सेवा के कार्यभार संभाले के तारीक ले 30 जून 2017 तक अभी हाल म प्रभावशील दर के अंतर्गत बीमा रक्षण राशि के लाभ दे जाही। परिपत्र म कहे गए हे कि राज्य शासन के सेवा म कार्यरत अखिल भारतीय सेवा के अधिकारी मन ल ये वाले लाभ नइ मिलय काबर कि ओ मन छत्तीसगढ़ शासकीय कर्मचारी समूह बीमा योजना 1985 के सदस्य नइ हें। ओ मन केन्द्रीय सरकारी कर्मचारी समूह बीमा योजना 1980 के सदस्य हावंय।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment