स्थानीय निकाय मन के आत्मनिर्भरता ले विकास म आही तेजी: श्री चंद्रशेखर साहू

राज्य वित्त आयोग के रायपुर संभाग के बैठक म जनप्रतिनिधि मन ह दीन कई महत्वपूर्ण सुझाव
रायपुर, 23 जून 2017, छत्तीसगढ़ राज्य वित्त आयोग के अध्यक्ष श्री चंद्रशेखर साहू के अध्यक्षता म, आज इहां रायपुर संभाग के स्थानीय निकाय मन के निर्वाचित पदाधिकारि मन अउ शासकीय अधिकारी मन के संयुक्त बैठक, दू सत्र म आयोजित करे गीस। आयोग कोति ले प्रतिवेदन तैयार करे ले पहिली, अपन अनुशंसा बर उपयोगी सुझाव लेहे खातिर ए बैठक रखे गए रहिस। आयोग के सदस्य श्री नरेशचंद्र गुप्ता घलोक ये बैठक म उपस्थित रहिन। 
आयोग के अध्यक्ष श्री चंद्रशेखर साहू ह पंचायत प्रतिनिधि मन ल वित्त आयोग के काम के तरीका के जानकारी दीन अउ उमन ले सुझाव मांगिंन। बैठक म श्री साहू ह कहिन - तीन स्तर वाले पंचायत मन संग जमो स्थानीय निकाय मन ल ये विचार करना होही कि करारोपण प्रणाली कइसे सुदृढ़ करे जाय अउ कइसे कर मन के माध्यम ले पंचायत मन के आमदनी बढ़ाए जाय। उमन स्थानीय निकाय मन के वित्तीय स्थिति मजबूत बनाए म जोर देवत कहिन कि निकाय मन ल आत्मनिर्भर बनना होही। सरकार ले अनुदान उपर निर्भरता विकास म बाधक बनथे, एखर खातिर निकाय जतका आत्मनिर्भर होही वोतकेच जादा विकास हो पाही। स्थानीय निकाय मन ल विचार करना होही कि ओ मन अपन आय के साधन कइसे बढ़ा सकत हावंय। श्री साहू ह कहिन कि स्थानीय निकाय मन ल अपन खरचा म कटौती घलोक करना होही, जेखर से वित्तीय बोझ कम हो सकय। उमन कहिन कि लोगन के अपेक्षा मन बाढ़त हावय अउ जब अपेक्षा मन बाढ़त हावय त जादा धन के जरूरत होत हे। उमन राज्य के पंचायत मन के प्रशंसा करत कहिन कि स्वच्छ भारत मिशन के लक्ष्य पूरा करे म पंचायत मन अपन दायित्व बहुत अच्‍छा निभावत हें। संभाग स्तरीय बैठक म जनप्रतिनिधि मन सुझाव घलोक दीन। पंचायत प्रतिनिधि मन सुझाव देवत कहिन कि पंचायत मन ल अउ जादा अधिकार देहे के जरूरत हावय। जनप्रतिनिधि मन पंचायत मन ल विकास कार्य बर सीएसआर मद के राशि देवाए के घलोक सुझाव दीन। उमन जादा जनसंख्या वाले जिला जनपद अउ ग्राम पंचायत मन म कार्यालय कर्मचारी बढ़ाए के घलोक जरूरत बताइन। 
Share on Google Plus

About Sanjeeva Tiwari

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment