सबका-साथ सबका विकास सम्मेलन म सांसद श्री अभिषेक सिंह होइन सामिल


  • शासन के योजना मन आमजन अउ गरीब मन के उत्थान बर: श्री दयालदास बघेल

  • कवर्धा म 4.40 करोड़ के लागत ले बनइया हाईटेक बस स्टैण्ड के शिलान्यास


रायपुर, 13 जून 2017। पर्यटन, संस्कृति अउ सहकारिता मंत्री श्री दयालदास बघेल हर कहिन कि केन्द्र अउ राज्य शासन कोति ले संचालित सब्बो योजना मन आमजन अउ गरीब मन के उत्थान बर हावय। योजना मन के माध्यम ले सबो के विकास कइसे अउ कऊन प्रकार से होवय एखर प्रयास करे गये हे। श्री बघेल कल कबीरधाम (कवर्धा) जिला मुख्यालय के गांधी मैदान म आयोजित सबका साथ सबका विकास सम्मेलन ल संबोधित करत रहिन। उमन कहिन कि शासन के योजना मन से समाज के आखरी सिरा म खड़े मनखे मन ल लाभ मिलय, एकर समुचित प्रयास करे गए हावय। ए अवसर म क्षेत्रीय सांसद श्री अभिषेक सिंह, राज्य पिछड़ा वर्ग आयोग के अध्यक्ष श्री सियाराम साहू, रायपुर विकास प्राधिकरण के अध्यक्ष श्री संजय श्रीवास्तव, जिला पंचायत कवर्धा के अध्यक्ष श्री संतोष पटेल, नगरपालिका परिषद अध्यक्ष श्रीमती देवकुमारी चंद्रवंशी संग बीएसएनएल के अधिकारी-कर्मचारी अउ बड़ संख्या म नागरिक उपस्थित रहिन। कार्यक्रम म श्री बघेल ह सबो जनप्रतिनिधि मन के संग कवर्धा म 4 करोड़ 40 लाख के लागत ले बनइया हाईटेक बस स्टैंड के शिलान्यास करिन।
श्री दयालदास बघेल हर कार्यक्रम ल संबोधित करत कहिन कि केन्द्र शासन के जन धन योजना म गरीब से गरीब मनखे के खाता खोले गीस अउ हितग्राही मूलक सबो योजना मन के राशि सीधा ऊंखर खाता म जाए लगिस, एखर अलावा मुद्रा बैंक योजना के तहत पढ़े लिखे युवा मन ल अपन रोजगार करे बर ऋण प्रदाय करे जात हावय। उमन शासन के जमो योजना मन के बखान करत कहिन कि येकर लाभ आप मन लेवव।
ए अवसर म सांसद श्री अभिषेक सिंह ह कहिन कि केन्द्र सरकार के तीन साल के कार्यकाल पूरा होए म ए कार्यक्रम के आयोजन करे गए हे। छत्तीसगढ़ संग देश के सब जिला मन म पब्लिक सेक्टर के युनिट मन ल कार्यक्रम के जिम्मेदारी देहे गए हे। उमन कहिन कि जिला म वनांचल संग आन क्षेत्र मन म सड़क, बिजली के बाद एक नवा मांग के रूप म मोबाईल टॉवर के मांग होवत हावय। क्षेत्र के युवा वर्ग वॉट्स एप संग आन तकनीक से लैस होवत जात हें। उमन बताइन कि जिला म एक संग 38 बीएसएनएल टॉवर लगे हावय। वनांचल क्षेत्र मन म कुसुमघटा, बोक्करखार, अंजना, आमानारा संग आन जघा मन म घलोक बीएसएनएल के टॉवर लगे हावय। उमन कहिन कि भविष्य म कवर्धा म बीएसएनएल 4जी कनेक्शन के सुविधा मिलही। एखर अलावा दूरस्थ अंचल के जनता बैंकिंग सेवा ले जुड़ जाही। आम आदमी ल मिलइया कई ठन हितग्राहीमूलक योजना मन के तहत राशि सीधा ऊंखर खाता म जावय, अइसन करे जात हावय। बैंकिंग सुविधा के एखर से विस्तार होही। उमन विकासखंड सहसपुर लोहारा के ग्राम पंचायत नवघटा अउ गांगपुर के जनता से विडियो काफ्रेंसिंग के जरिये बातचीत करिन अउ ए दूनो ग्राम पंचायत के मनखे मन ल हार्दिक बधाई अउ शुभकामना दीन। उमन बताइन कि लोहारा विकासखंड के हरेक ग्राम पंचायत म केन्द्र सरकार के योजना ल हाई स्पीड इंटरनेट कनेक्टिविटी से जोड़ना हावय। 33 ग्राम पंचायत मन के कनेक्टिविटी जुड़ गे हावय। उमन कहिन कि भविष्य म ब्रॉडबेंड के सुविधा बढ़ही अउ इहां के ग्राम पंचायत मन म वीडियो काफ्रेंसिंग घलोक हो सकही।
सांसद श्री अभिषेक सिंह हर कहिन कि वनांचल क्षेत्र मन म आवागमन के सुविधा बढ़ाए बर सड़क मन के विस्तार करे गए हावय अउ वोमा काम शुरू कर दे गए हावय। बिजली के समस्या दूर करे बर 21 सबस्टेशन के स्वीकृति देहे गए हावय। उमन कहिन कि केन्द्र अउ राज्य शासन के योजना मन के उद्देश्य समाज के हर वर्ग ल आगू बढ़ाना हावय। उमन कहिन कि लोगन म संस्कृति वैचारिक बदलाव आना चाही। स्वच्छ भारत के तहत शौचालय मन के निर्माण कराए जात हावय, एखर से स्वच्छता बढ़ही। माता, बहिनी मन के सम्मान बाढ़ही। प्रधानमंत्री आवास योजना अउ प्रधानमंत्री उज्ज्वला योजना संचालित हावय, जेखर तहत 2022 तक हर गरीब तिर अपन पक्का मकान होही। उन्‍हें उज्ज्वला योजना के तहत प्रदेश के 35 लाख लोगन ल चूल्हा अउ गैस कनेक्शन मिलही। ए अवसर म नगर पालिका अध्यक्ष श्रीमती देवकुमारी चंद्रवंशी हर कहिन कि प्रधानमंत्री के मार्गदर्शन म सबका साथ, सबका विकास होवत हावय। तमाम योजना मन आम नागरिक मन बर लागू करे गए हावय। उमन केन्द्र शासन के योजना मन के उल्लेख करिन। उमन कहिन कि ए अवसर म कवर्धा बर हाईटेक बस स्टैण्ड के शिलान्यास करे जाना एक बहुत बड़े उपलब्धि हावय। एखर लिए उमन प्रदेश के मुख्यमंत्री डॉ. रमन सिंह ल विशेष रूप ले धन्यवाद ज्ञापित करिन।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment