खाद्य अधिकारी मन के राज्य स्तरीय समीक्षा बैठक


  • उज्ज्वला योजना म ए साल 15 लाख महिला मन ल रसोई गैस कनेक्शन देहे के लक्ष्य
  • रसोई गैस कनेक्शन वितरण अऊ राशन कार्ड म आधार नम्बर अउ बैंक खाता नम्बर के सीडिंग म गति लाय के निर्देश 

रायपुर, 28 जून 2017। खाद्य, नागरिक आपूर्ति अऊ उपभोक्ता संरक्षण विभाग के सचिव श्रीमती ऋचा शर्मा के अध्यक्षता म आज इहां मंत्रालय (महानदी भवन) म प्रदेश के सबो जिला मन के खाद्य अधिकारी मन अऊ खाद्य संचालनालय के अधिकारी मन के राज्य स्तरीय समीक्षा बैठक आयोजित करे गइस। खाद्य सचिव ह बैठक म प्रधानमंत्री उज्जवला योजना के तहत रसोई गैस कनेक्शन वितरण अऊ राशन कार्ड म आधार नम्बर अउर बैंक खाता के सीडिंग म गति लाय के निर्देश दीन। उमन विभागीय योजना मन के प्रगति के जिलेवार समीक्षा करिन। 
बैठक म खाद्य सचिव श्रीमती शर्मा ह बताइस कि प्रधानमंत्री उज्जवला योजना के तहत चालू वित्तीय साल 2017-18 म राज्य म गरीब परिवार के 15 लाख महिला मन ल रसोई गैस कनेक्शन देहे के लक्ष्य रखे गीए हे। ए लक्ष्य के अनुसार सबो पात्र हितग्राही मन ल योजना के लाभ दिलाना हे। एखर लिए उमन ग्राम पंचायत मन के सहयोग ले जादा ले जादा के.वाय.सी. फार्म भरवाके गैस एजेंसी म जमा करवाए के निर्देश सबो जिला खाद्य अधिकारी मन ल दीन। उमन कहिन कि के.वाय.सी. फार्म म नाम, पता, आधार नम्बर अउ बैंक खाता नम्बर संग आन सबो जानकारी सही अऊ पूरा भरवाए जाय, ताकि गैस कनेक्शन बर आवेदन निरस्त झन होवय अऊ ओ मन ल योजना के लाभ मिल सकय। उमन ह दुर्गम क्षेत्र मन म पहिली चरण म 19 जिला मन म गैस वितरक गोदाम निर्माण के प्रगति के समीक्षा करिन अऊ कहिन कि जहां वितरक क्रियाशील हो गे हें उहां घलोक के.वाय.सी. फार्म भरवाके जमा करवावंय ताकि गैस कनेक्शन वितरण के प्रक्रिया जल्‍दी शुरू हो सकय। उमन राजनांदगांव जिला के वासड़ी, औंधी अउर खड़गांव म, उत्तर बस्तर (कांकेर) जिला के भूलावंड अउर भैंसासूर म, जशपुर जिला के मनोरा म अऊ रायगढ़ जिला के बरमकेला म निर्माणधीन गैस वितरक गोदाम ल जल्‍दी पूरा कराने के निर्देश दीन। एखर संग ही दूसर चरण म सोला जिला मन म गोदाम निर्माण बर जमीन आवंटन के कार्रवाई शुरू करे के घलोक निर्देश दीन। 
बैठक म राशन कार्ड मन म आधार सीडिंग, बैंक खाता नम्बर सीडिंग, दाल-भात केन्द्र, राशन दुकान मन म राशन सामान के समयबद्ध भण्डारण आदि के जिलेवार समीक्षा करे गइस। खाद्य सचिव ह सबो जिला खाद्य अधिकारी मन ल अवइया तीन महिना के भीतर राशन कार्ड मन म आधार-बैंक खाता नम्बर सीडिंग अऊ राशन कार्ड प्रमाणीकरण के काम पूरा करे के निर्देश दीन। बैठक म बताए गीस कि राज्य म कुल 58 लाख 18 हजार 708 राशन कार्ड हे। एमां सदस्य मन के संख्या दू करोड़ दस लाख 62 हजार 228 हे। एमां ले 55 लाख 86 हजार 542 राशन कार्ड मन के आधार सीडिंग अऊ एक करोड़ 94 लाख 96 हजार 528 सदस्य मन के आधार सीडिंग पूरा हो चुके हे। अइसनहे कुल राशन कार्ड मन म 54 लाख 45 हजार राशन कार्ड मन म बैंक खाता नम्बर सीडिंग हो चुके हे। श्रीमती शर्मा ह राज्य म संचालित 163 दाल-भात केन्द्र मन के नियमित जांच करे अऊ हर महीना जांच प्रतिवेदन भेजे के निर्देश दीन। उमन खाद्य अधिकारी मन ल जरूरी चीज अधिनियम के अन्तर्गत जारी नियंत्रण आदेश के पालन सुनिश्चित कराए अऊ अधिनियम के तहत करे गए कार्रवाई के जानकारी मासिक सूचना प्रणाली (एमआईएस मॉड्यूल) म देवाए के निर्देश दीन। बैठक म खाद्य विभाग के विशेष सचिव श्री एम.के.सोनी अउर संयुक्त सचिव श्री जी.एस. सिकरवार, संचालक खाद्य श्री डोमन सिंह, राज्य नागरिक आपूर्ति निगम के प्रबंध संचालक श्री सुनील जैन, खाद्य संचालनालय के वरिष्ठ अधिकारी अऊ सबो जिला  खाद्य अधिकारी उपस्थित रहिन। 
Share on Google Plus

About Sanjeeva Tiwari

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment